Skupinske dźěło wažne było

46. centralna olympiada serbskeje rěče zakónčena

Sebnitz. Lětuša 46. centralna olympiada serbskeje rěče w Sebnitzu, hdźež wobdźělichu so šulerjo 6. lětnikow z Hornjeje, srjedźneje a Delnjeje Łužicy, je so dźensa po třoch dnjach zakónčiła. K najlěpšej hornjoserbskej skupinje, kotruž wuznamjenichu z predikatom „jara derje“, słušachu Johanna Šurec a Clemens Paselinsky z Budyskeho Serbskeho gymnazija, Johann Birnick z Wojerowskeho Lessingoweho gymnazija, Carolina Koklic z Worklečanskeje a Linda Matikec z Ralbičanskeje srjedźneje šule. Najlěpšu delnjoserbsku skupinu tworjachu Witaj-šulerjej Anne Wunderlich a Axel Söhr zhromadnje z B-serbšćinarjemi Romy Glinga, Karlu Küch, Claudijom Schröderom, Wincentom Weichertom.

Prěni króć bě na olympiadźe zhromadne dźěło prašane a nic hižo wukon jednotliwca. 56 wobdźělnikow z rozdźělnymi rěčnymi wuměnjenjemi spjelnješe swoje nadawki w skupinje štyrjoch do pjeć šulerjow.

K zahajenju zarjadowanja póndźelu dźakowaše so Ludmila Budarjowa, předsydka Serbskeho šulskeho towarstwa, kotrež je zdobom nošer olympiady, wosebje wučerjam za jich dźěło. „Běch dźensa na wuhódnoćenju pódla, zo bych sama sćěhowała, kak so skupinske dźěło na wukony šulerjow wuskutkuje. Zwoprawdźenje ideje je kwalitu wubědźowanja zběhnyło.“ K zakónčenju olympiady přepoda Ludmila Budarjowa wobdźělnikam certifikaty a myta.

Klětu ma wučerka Budyskeho Serbskeho gymnazija Sylwija Šěnowa na čole fachowych wučerjow skutkować, kotřiž olympiadu wobsahowje přihotuja. (MiR)

Lětuša 46. centralna olympiada serbskeje rěče w Sebnitzu, na kotrejž wobdźělichu so wot póndźele šulerjo 6. lětnikow z Hornjeje, srjedźneje a Delnjeje Łužicy, je so dźensa zakónčiła. Najlěpšej, dobyćerskej skupinje so nad swojim wuspěchom jara radowaštej. Foto: M. Bulank

Naprašowanja wotpokazali

Žadyn rozsud wo wopłóčkach w Prawoćicach a Swinjarni

Chrósćicy. Zaměrowy zwjazk za wopłóčki Při Klóšterskej wodźe (AZV) chce Panecy w Porchowskej gmejnje centralnej wopłóčkowej syći přizamknyć. Z jednym napřećiwnym hłosom (gmejna Ralbicy-Róžant) je zwjazkowa zhromadźizna wčera wobzamknyła twarske dźěła wupisać. Předwidźanej samsnej wobzamknjeni za Swinjarnju a Prawoćicy radźićeljo šmórnychu, sćěhujo namjet Pančičanskich a Chróšćanskich radźićelow, jej z dnjoweho porjada wzać. „W přichodnymaj měsacomaj so z tym wospjet zaběramy. Prawočenjo a Swinjarčenjo měli so hišće raz wobšěrnje z temu wopłóčki zaběrać“, rjekny předsyda AZV Maćij Brycka.

Wjace hač 50 zajimcow je posedźenje zaměroweho zwjazka wčera sćěhowało. Pančičanski radźićel Markus Kreuz namjetowaše spočatnje wobydlersku hodźinu naprašowanjow, čemuž pak dosć radźićelow njepřihłosowaše. Ralbicy-Róžant a Chrósćicy hłosowachu za naprašowanje, Worklecy přećiwo tomu a Porchow so hłosa wzda. Runje tak so Pančicy-Kukow hłosa wzdachu, byrnjež wottam namjet za to přišoł, štož mjez mnohimi přitomnymi njezrozumjenje zbudźi. „Runje tajka naprašowanska hodźina je w demokratiskim porjedźe wažna“, měnješe Rainer Gröbner, hižo 20 lět předsyda Kamjenskeho towarstwa Dom a ležownosć. „Wulka ličba skóržbow přećiwo zaměrowemu zwjazkej je dopokaz za jeho špatne zjawnostne dźěło. To njeje w zmysle wobydlerja, ale wusměrja so přećiwo njemu.“ Hižo dźeń do toho na posedźenju Budyskeho wokrjesneho sejmika bě so Gröbner zaměroweho wopłóčkoweho zwjazka dla na krajneho radu Michaela Hariga (CDU) wobroćił. Wón chce so nětko z naležnosću bliže zaběrać.

Trěbnosć dalšich rozmołwow za Prawoćicy a Swinjarnju widźi André Wowčer, rěčnik wobydlerskeje iniciatiwy za zmysłapołne ekologiske wotwodźowanje wopłóčkow. „Runje za tutej wsy dyrbjało so hišće raz intensiwnje wuradźować. Zdźěłać ma so porjadny koncept, kotryž wotpowěduje woli wobydlerjow a je na dobro gmejny. Dyrbi so pruwować, hač su separatne abo skupinske rozrisanja móžne. Nadźijomnje so na přichodnym posedźenju zaměroweho zwjazka wobydlerska hodźina naprašowanjow přewjedźe, přetož wjele prašenjow ludźom pod nochćemi pali“, podšmórny André Wowčer. (AK)

Wjace hač 50 zajimcow je so wčera na posedźenju zaměroweho zwjazka za wopłóčki Při Klóšterskej wodźe w Chrósćicach wobdźěliło. Na wobydlersku hodźinu naprašowanjow pak woni podarmo čakachu. Wjetšina gmejnskich radźićelow bě namjet za tajke naprašowanja wotpokazała. Foto: A. Kirschke