Předsyda čěskeho wustawoweho sudnistwa kritizuje reformy w Pólskej

Brno (dpa/SN). Najwyši sudnik Čěskeje republiki Pavel Rychetský wobhladuje wuwiće w susodnej Pólskej jara starosćiwje. Tež weto prezidenta Andrzeja Dudy nastupajo zakoń wo noworjadowanju krajneje sudniskeje rady a najwyšeho sudnistwa je w jeho wočach jeno dźělny wuspěch. Duda bě wobaj zakonjej póndźelu blokował, na druhim boku pak noworjadowanje powšitkowneje justicy podpisał. „To je runje tajki hoberski nadpad na njewotwisnosć sudniskeje mocy kaž tamnej zakonjej“, kritizowaše předsyda čěskeho wustawoweho sudnistwa, kotrež ma swoje sydło w Brnje, w telewizijnym sćelaku ČT.

„Demokratija woznamjenja dialog, a tón smy w Pólskej dotal parowali“, Rychetský­ rjekny. Wo reformje justicy njesměła jenička politiska strona rozsudźić, byrnjež wona wjetšinu w parlamenće měła. „Nazhonjenja z 1930tych lět a z kónca Weimarskeje republiki wuča, zo móže so demokratija tež sama zničić“, 73lětny napomina.