Aus der aktuellen Ausgabe vom Montag, 22 Mai 2017

Póst Germania Budyšin

– Sokoł Ralbicy/Hórki 3:0 (1:0)

Zestawa hosći: Ch. Gloxyn – K. Matka (58. Lulak), Zynda, B. Bjeńš, M. Matka, D. Gloxyn, Šewc, Wowčerk (58. Šěn), Kurjat (48. Domaška), S. Bjeńš, Korjeńk

Hra přećiwo ćělnje robustnemu teamej bě so za koparjow Sokoła derje započała. Z Fabianom Korjeńkom a Stefanom Bjeńšom nadběhowaštaj prědku agilnaj hrajerjej a sej ze sylnym pressingom stajnje bule wuwojowaštaj. Nažel pak běchu wotzamknjenja přesłabe. Hač do 20. min. so domjacy pomału zhrabachu, škit Sokoła pak steješe wěsće a tohodla so před wrotami Chrystofa Gloxyna tež wulce njepaleše. Wot 25. do 45. min. mějachu Ralbičenjo hosćićela dospołnje pod kontrolu a pokazachu wulkotnu kopańcu. Nažel pak njewuskoči žana móžnosć, dokelž bul w poslednim wokomiku husto wotskoči abo kónčna přihrawka precizna dosć njebě. Z prěnjej strašnej akciju pak nawjedowachu krótko do połčasa nadobo Budyšenjo. Jedyn z nich wuwojowa sej w srjedźnym polu bul a třěli jón z 25 metrow nisko na wrota. Gloxyn zamó kulowatu kožu hišće na žerdź wotwobarać. Wottam pak skoči wona Marcej Müllerej před nohu, a tón njeměješe žadyn problem k 1:0 přetworić.

Marie-Luisy Pjetašec (naprawo), hrajerce Biskopičanskeho KT 08, je so wčera wulki skok poradźił. Zhromadnje z koparkami RB Lipsk postupi wone z Biskopičankami krajneje ligi Sakskeje do regionalneje ligi. SV Babelsberg 03 bě w krajnej lize Braniborskeje koparkam z Podstupima doma z 2:3 podležał. Foto: Jörg Stephan

Awtor dźensa Křesćan Korjeńk

„Nětk, hdyž mamy, štož smy chcyli“, drje je w sporće bjezwuwzaćnje wuprajenje dobyćerjow. Haj, nad wuspěchom so radować směć, jón tež hišće ze swojimi přećelemi abo přiwisnikami swjećić drje je to najrjeńše!

Prěni raz docpěchu najmłódši koparjo Serbskeho gymnazija Budyšin (SGB) kónčne wurisanje Sakskeje pod hesłom „Młodźina trenuje za olympiju“. Woni přesadźichu so w regionalnym finalu na Budyskej Młynkec łuce přećiwo dalšim třom gymnazijam wuchodneje Sakskeje a su třeće hólče mustwo SGB, kotrež pojědźe spočatk junija do Lipska.

SGB – Augustum Haniny gymnazij Zhorjelc 2:0

Hnydom wot spočatka přewzachu hólcy SGB iniciatiwu a sej někotre šansy wuwojowachu. Traješe pak dźewjeć mjeńšin, prjedy hač zaklinka. Flanku Dawida Žura podlěši Caspar Dźisławk do šěsnatki, hdźež steješe Niklas Šnajder na prawym městnje a do praweho delnjeho kuta k 1:0 přetwori. Psychologisce wažne nawjedowanje padny krótko do połčasa. Nětko tłóčachu Zhorjelscy gymnaziasća na wrota Daniela Weclicha. Škit wokoło Corbiniana Šefera pak měješe nadběhi pod kontrolu. W 15. min. juskachu serbscy šulerjo druhi raz, jako so Leon Šołta na lěwym boku do šěsnatki předrě a so z mócnej třělwu wo kónčne 2:0 postara.

SGB – Gymnazij bratra a sotry Scholl Lubij 1:1

Wokrjesna wyša koparska liga

Germ. Budyšin – Ralbicy/Hórki 3:0 (1:0)

Wojerecy – Bukecy1:1 (1:1)

Kulow – Ottendorf-Okrilla 2:0 (1:0)

1. ST Ćisk 27 94  : 20 67

2. Sokoł Ralbicy/Hórki 27 70  : 35 52

3. Rakečanske ST 27 70  : 48 52

4. ST Hnašecy-Dobruša 27 59  : 49 48

5. LSV Hory 27 62  : 45 41

6. SC Großröhrsdorf 27 38  : 33 41

7. Póst Germ. Budyšin 27 48  : 53 37

8. Motor Kumwałd 27 49  : 63 35

9. Wojerowski FC 27 56  : 49 33

10. ST Kinspork/Łužnica 27 45  : 43 32

11. Módro-běli Kulow 27 45  : 48 32

12. ST Wjelećin 27 56  : 92 28

13. Drohotka Ramnow 27 38  : 59 26

14. Zeleno-běli Bukecy 27 46  : 78 26

15. TSV Połčnica  27 45  : 69 24

16. FV Ottendorf-Okrilla 27 36  : 73 21

krajna liga – žony

1. RB Lipsk 23  117 : 10 67

2. FC Silesia Zhorjelc 23 84  : 33 53

3. Biskopičanske KT 24 59  : 35 48

4. Kamjeničanski FC 25 71  : 47 42

5. Přezjednota Lipsk-juh 25 51  : 39 38

6. 1. FFC Wacker Lipsk 25 43  : 50 36

7. Heidenauske ST 24 50  : 63 35

Dobyće 2:0 přećiwo Wacker Nordhausenej budźe zawěsće dalša hra FC Energije Choćebuz, kotraž přińdźe w chronice na strony z duelemi, hdźež je FCE tójšto šansow wuwostajił. Tež hdyž postaraštaj so Benjamin Förster w 2. min. a Streli Mamba po 28 mjeńšinach wo spěšne 2:0, njejsu Choćebuženjo w poslednej domjacej hrě nanajlěpše šansy k dalšim wrotam wužiwali. Wosebje w štwórć hodźinje do kónca mějachu pjeć wuběrnych składnosćow, z kotrymž bychu publikumej porjadne­ zakónčenje wobradźili. Popřał to swěrnym fanam bych, kotřiž docpěchu z grandioznej ličbu 100 000 wopytowarjow na 17 domjacych hrach rekord w lize. Georg Zielonkowski

Před pjeć lětami přisłušeše Willi Paška hišće Serbskej koparskej wubrance, a to na europeadźe 2012 w Hornjej Łužicy. „Dopominam so rady na tehdyše dožiwjenja. Wosebje, dokelž běch jenički Serb z Delnjeje Łužicy, kotrehož do kadra powołachu. To bě wulka česć za mnje. Moji hornjołužiscy sobuhrajerjo nimo toho nimale wšitcy we wyšich koparskich klasach kopački šnórowachu. A ja sym hač do dźensnišeho přeco hišće zastupjer wokrjesneje klasy w Delnjej Łužicy. Sportowsce pak sym po zdaću derje sobu dźeržeć móhł. Wosebje zajimawe bě, zo su koparjo a zamołwići w našim kwartěrje w Smochćicach kaž tež druhdźe nimale bjezwuwzaćnje serbsce rěčeli. To je mi chětro pomhało so zaso raz hłubšo z rěču zaběrać“, skicěruje dźensa 30lětny swoju situaciju we wubrance.

Jan Malink přednošował

Budyšin. Z wulkim zajimom je wčera popołdnju 30 serbskich a němskich zajimcow wuwjedźenja superintendenta Jana Malinka w Budyskim Serbskim muzeju k 500 lětam serbskeho ewangelskeho žiwjenja sćěhowało. Wodźenje bě poskitk we wobłuku 40. mjezynarodneho dnja muzejow.

Policija pyta za skućićelemi

Choćebuz. Po namócnych rozestajenjach wosrjedź Choćebuza z pjeć zranjenymi pyta policija z wotmachom za skućićelemi. Dotal pozadki njeznaja, kaž rěkaše. Sobotu wječor bě mjez swjećacymi němskimi a wjacorymi syriskimi mužemi k zwadźe dóšło. W tym zwisku so pjeć němskich muži w starobje 28 do 33 lět kałnjenja a rěznjenja dla zrani. Třoch móžachu mjeztym z chorownje pušćić.

Předewzaćelske myto do Załomja

Drježdźany/Załom. Nawodaj Załomskeho zawoda k předźěłanju płodow, nan Maximilian Deharde a syn Werner, staj myto „Sakski předewzaćel lěta 2017“ dóstałoj. Při tym běchu posudźowarjo dobre hospodarske połoženje zawoda runje tak hódnoćili kaž jeju wobchadźenje z přistajenymi a čestnohamtske aktiwity.

Waldschmidt HSV wuchował

16. Krabatowy swjedźeń nowe impulsy za zhromadne dźěło dał

Metlika/Njebjelčicy (JK/SN). Z rjanymi dožiwjenjemi a z tójšto idejemi za přichodne wuspěšne dźěło wróćichu so wčera wječor čłonojo Krabatoweho towarstwa a Smjerdźečanscy rejwarjo ze słowjenskeho městačka Metlika. Tam běchu so wobdźělili na 16. Krabatowym swjedźenju, wotměwacym so we wobłuku Vinskeho Vigreda (Winoweho nalěća). Metlika je nimo toho, zo tam wurjadne wino plahuja, znate jako srjedźišćo tamnišeho Krabatoweho towarstwa. Wokolina Metliki, kotrež leži na mjezy ke Chorwatskej, je domizna Janka Šajatovića, alias Jana Šadowica.

Čłonojo łužiskeho Krabatoweho towarstwa mějachu składnosć, zbližić sej někotre žiwjenske stacije Šajatovića, na přikład gymnazij, hdźež bě pječa wuknył, a hród, z kotrehož bu do słužby sakskeho kurwjercha Jana Jurja II. wupósłany.

Židźino (SN/JaW). Zwjazk serbskich spěwarskich towarstwow (ZZST) nawjeduje nětko muska trójka. Na hłownej wólbnej zhromadźiznje minjeny pjatk w Židźinom wobkrući 24 delegatow čłonskich chórow Pětra Cyža jako předsydu. Za noweju městopředsydow wuzwolichu za Delnju Łužicu Geralda Schöna a za Hornju Łužicu Janeka Wowčerja. Schön přewozmje zastojnstwo wot Jaroslava Pukača, Wowčer wot Leńki Thomasoweje. Wobaj njeběštaj hižo kandidowałoj. Předsydstwu přisłušeja dale Angelika Häneltowa (chór Meja), Melanie Bulankowa (chór Lipa), Sylwija Jancyna (chór Budyšin), Susann Herrmann (žónski chór Lubin) a Cornelia Vahder (žónski chór Janšojce).