Třeći raz je zastupnistwo Swobodneho stata Sakskeje w Praze na lětni swjedźeń do Serbskeho seminara přeprosyło. Kónc tydźenja steješe Hornja Łužica w srjedźišću zarjadowarjow.
Praha (CŠ/SN). Z chlěbom a selu je Sylwija Panošina ze Serbskeho kulturneho centruma Slepo hosći witała. Nimo nawodnicy zastupnistwa Stefanie Rehm, społnomócnjeneho swobodneho stata dr. Davida Michela, wiceprezidentki Sakskeho krajneho sejma Andreje Dombois (CDU) a Kristiny Larischoveje z čěskeho wonkowneho ministerstwa postrowi tež Budyski krajny rada Michael Harig (CDU) wobdźělnikow. Mjez nimi běštaj za Domowinu čłon zwjazkoweho předsydstwa Jurij Łušćanski a referent Clemens Škoda.
Harig witaše hosći hnydom štyrirěčnje a wuzběhny wosebitosć Hornjeje Łužicy jeje bikulturnosće dla. Wón skedźbni na mjeno wotewrjeneje Sakskeje. Hladajo na wukročenja w Heidenauwje a druhdźe hrozy strach, zo so to do prašenja staji. „Hornja Łužica móže porno tomu dobry přikład za kulturnu bohatosć być.“