Carsten Rentzing je nowy krajny biskop Sakskeje ewangelsko-lutherskeje krajneje cyrkwje. Kónc meje wuzwoleny 47lětny naslěduje Jochena Bohla, kiž poda so nětko na wotpočink.

Drježdźany (dpa/SN). Ze swjatočnymi kemšemi bu Carsten Rentzing jako krajny biskop Ewangelsko-lutherskeje krajneje cyrkwje Sakskeje sobotu w Drježdźanskej Křižnej cyrkwi zapokazany. Wón nawjeduje nětko něhdźe 728 000 ewangelskich wěriwych w swobodnym staće. Wodźacy nawodźa cyrkwjow žohnowachu wjelelětneho fararja z Markneukirchena, prjedy hač dósta hamtski rjećaz spožčeny, kotryž bě wot lěta 2004 nosył Jochen Bohl. 65lětny poda so po jědnaće lětach skutkowanja w najwyšim zastojnstwje sakskeje krajneje cyrkwje na wotpočink. Tak zakónči jedyn z najmarkantnišich biskopow ewangelskeje cyrkwje Němskeje swoju aktiwnu słužbu.