Thomas Oppermann nowe zwjazkowe kraje zakituje

Brüssel/Berlin (dpa/SN/K). We wadźeńcy wo tym, kak ćěkancow sprawnje rozdźělić, je prezident parlamenta EU Martin Schulz wone staty raznje kritizował, kotrež su přećiwo krutej kwoće. Wone dyrbja skónčnje blokować přestać, „je to njedostojna hra“. Aktualne połoženje mjenowaše wón „wohańbjace“. Předsyda konferency němskich biskopow, kardinal Reinhard Marx, wupraji so w telewiziji ARD za připućowanski zakoń. Płoty a murje njejsu pomocliwe, wón zwura­zni. „Najprjedy dyrbi płaćić: Při našich hranicach njesmě nichtó wumrěć.“ Tež mjez ćěkancami wójny abo chudoby dla rozeznawać njeje žane rozrisanje.

W debaće wo tym, zo je hida na cuzych we wuchodnej Němskej pječa wosebje wurazna, šef frakcije SPD Thomas Oppermann nowe zwjazkowe kraje zakituje. Tajke diskusije nima wón za wu­nošne. Tež na zapadźe „prawicarscy politiscy kriminelni přebywarnje ćěkancow nadpaduja“, Oppermann wuswětli, „bohužel nachadźa so tajke počinanje prawicarskoekstremistiskeje sceny po cyłej Němskej, nic jenož na wuchodźe.“