Napjata situacija teroroweho warnowanja dla w Brüsselu traje. To drje ludźi we wšědnym žiwjenju dale bóle poćežuje, podusyć so woni přiwšěm njedadźa, kaž je Milenka Rječcyna zwěsćiła.
Brüssel. Metro w belgiskej stolicy Brüsselu njejězdźi. Zachody do podzemskeje zjawnowobchadneje syće su zašlahane. Na mnohich centralnych naměstach steja zdźěla wulke wojerske awta. Patruljowacy wojacy a policisća so tam tuchwilu sylnje do wobraza belgiskeje metropole zarjaduja. Wšitke zjawne zarjadowanja běchu wot zańdźeneho kónca tydźenja wotprajene, samo tajke za dźěći. Na zelenišćach a w parkach knježi kazany měr. Wulke nakupowanske centery su zawrjene, wjetše nakupowanišća w jednotliwych měšćanskich štwórćach pak dźěłaja. Mějićeljo hosćencow a barow wšak jara rozdźělnje z napjatej situaciju wobchadźeja. Ći jedni hosći witaja, druzy su je na njewěsty čas zawrěli.
