We wěstym zmysle jako kontradypk k wótrym Budyskim podawkam přeprosy ewangelsko-lutherska wosada swj. Pětra 17. septembra na hudźbny nyšpor do tachantskeje cyrkwje. Mnozy wopytowarjo běchu přišli, přetož muzikalisce staj koncert wuhotowałoj znaty serbski chór Budyšin a serbski organist Feliks Brojer. Překwapjenka bě, zo powita a rozžohnowa wosadu farar Johannes Probst w derje zrozumliwej serbskej rěči. Tež psalm bu serbsce čitany. Tole, tak so mi zda, pokazuje na nowu samozrozumliwosć mjezsobnosće wobeju narodow, kotruž w minjenych lětach tu a tam wobkedźbowach. Serbske a němske smě porno sebi stać, bjez toho zo ma so to owusprawnić.