Podstupim (dpa/K/SN). Tež po krajnym „wjeršku“ nastupajo reformu wokrjesow w Braniborskej wostanu fronty skostnjene. Wyši měšćanosća Brandenburga, Choćebuza a Frankfurta běchu so w Podstupimje z ministerskim prezidentom Dietmarom Woidku (SPD) a dalšimi načolnymi zastupnikami krajneho knježerstwa zetkali, wočakujo, „zo nam statna kenclija praji, kak wotmysli podpěrać sylnjenje wyšich srjedźišćow, štož wona zjawnje twjerdźi. K tomu njejsmy pak ničo słyšeli“, rěka w dźensa wozjewjenym zhromadnym stejišću.

Wyši měšćanosća spomnjenych třoch městow wustupuja raznje přećiwo tomu, zo ma so jich komunam wzać status bjezwokrjesneho města a zo maja přichodnje być wobstatk přisłušneho wokrjesa. Kaž Choćebuski wyši měšćanosta Holger Kelch (CDU) rjekny, chcyše na zetkanju zhonić, „kak tomu je zwokrjesnjenje wonych­ třoch městow nuznje trěbne“. A wón přispomni: „Nochcu žanu reformu, kotraž atmosferu w kraju kazy.“ Braniborska čerwjeno-čerwjena koalicija planuje, w kraju měć jeno dźewjeć wokrjesow a bjezwokrjesne město Podstupim.