Minjeny kónc tydźenja bě sej kopar a trenar Chróšćanskeje SJ Pavel Runt, bydlacy w Liberecu, swojich chowancow do treningoweho lěhwa w Čěskej přeprosył. Wot štwórtka wječora hač do njedźele připołdnja přebywachu Chróšćanscy koparjo w Bedřichovje. Areal je wosebje mjez zymskimi sportowcami za přikładne loipy podłu Jizerskeje magistrale znaty. Tak běše koparjam hižo wot wšeho spočatka jasne, zo njebudu dny runjewon wočerstwjace.

Pjatk měješe čěska trójka Pavel Runt, Petr Šafář a Miroslav Sentivan něhdźe 30 km dołhu čaru na běžkach planowanu. Hač k wobjedu drje bě hišće motiwacija wulka. Po dobrej jědźi zdaše pak so druha połojca dale a dlěša być. Dołhe postupy njenamakachu žanoho kónca a cil njeběše wotwidźeć. Pomału tež nadkolena palachu a šćipachu a mocy popušćachu. Ćim wjetšej pak běštej posměwk a mjezsobna chwalba z wotplacnjenjom, jako so po někak šěsć hodźinach zaso do Bedřichova nawróćichu. Sawna a wochłódźenski pool běštej po strapacach witana wotměna.