Na mnohich městnach kuzło łužiskich jutrow sylnje skutkowało
Jutry 2017 su nimo a z wotběhom su zawěsće wšitcy spokojom. Předewšem 1 564 křižerjow serbskich a dwurěčnych procesionow kaž tež dalši jutrowni jěcharjo we Wóstrowcu a Cerkwicy bě zwjeselene. Jónu, zo je wšitko bjez wjetšich njezbožow wotběžało, a zdobom, zo bě wjedro lětsa – hač na mjeńše wuwzaća – jara dobre. A to byrnjež wjedrarjo něšto cyle hinaše wěšćili. Tule je kuzło łužiskich jutrow sylnje skutkowało a dobremu poradźenju přinošowało.
Skutkowało je tež wozjewjenje poselstwa wo zrowastanjenju Chrystusa přez křižerjow na konjach na přichwatanych hosći. Wopytowar z Plessy pola Elsterwerdy, kotryž wobdźiwaše křižerjow ze swojej přećelku lětsa prěni króć, rjekny, zo běchu tole za njeho najrjeńše jutry, kotrež bě hdy dožiwił. Runje tak skutkowaše po wšěm zdaću kuzło łužiskich jutrow na Drježdźansko-Mišnjanskeho biskopa Heinricha Timmereversa, kotryž dožiwi křižerjow w Radworju a Budyšinje. Chětro emocionalnje dźakowaše so wón serbskim mužam za spjelnjenje nadawka na wutornej dźaknej Boži mši w Róžeńće.