Konječanscy blidotenisća wicemišter

srjeda, 17. meje 2017
artikl hódnoćić
(0 )
Prěnje blidotenisowe mustwo DJK Konjecy sobotu w Njeswačidle. Zady wotlěwa su to Maćij Kokla, Michael Elstner a Pětr Bejma; prědku wotlěwa Dierk Šewc, André Čórlich a Alojs Čóška.  Foto: Křesćan Gruhn Prěnje blidotenisowe mustwo DJK Konjecy sobotu w Njeswačidle. Zady wotlěwa su to Maćij Kokla, Michael Elstner a Pětr Bejma; prědku wotlěwa Dierk Šewc, André Čórlich a Alojs Čóška. Foto: Křesćan Gruhn

Za neutralnymi blidami w Njeswačidle wuhrachu blidotenisća mustwa DJK Konjecy jako suwereny dobyćer stafle I a MSV Budyšina 04 IV jako dobyćer stafle II, prěnjeje wokrjesneje ligi wokrjesa Budyšin wokrjesne mišterstwo. Wobaj cyłkaj nastupištej w najsylnišej zestawje. Pola dwójkow wupadaše dołho za tym, zo budu Konječenjo z 2:1 nawjedować. Pětr Bejma/Dierk Šewc dobyštaj jasnje z 3:0 André Čórlich/Michael Elstner přěhraštaj z 0:3. Načolna dwójka Maćij Kokla/Alojs Čóška nawjedowaše hižo po sadźbach z 2:1. W štwórtej při stawje 10:6 trjebaštaj hišće jenički dypk, a delanscy blidotenisća bychu po dwójkach 2:1 nawjedowali. Kokla, najlěpši Konječan cyłeje sezony, pak so na kolenje tak ćežko zrani, zo njemóžeše dale hrać. Konječenjo so při­wšěm njepodachu a wojowachu wo kóždy dypk. Čóška w prěnjej hrě snadnje podleža, Čórlich a Šewc dobyštaj swojej duelej, tak zo Budyšenjo ze 4:3 nawjedowachu. Bejma a Elstner nawjedowaštaj w přichodnymaj partijomaj po sadźbach hižo 2:0. Wupadaše za tym, zo budu serbscy blidotenisća po połojcy z 5:4 prědku. Tola z toho ničo njebu, wobaj wjac hač njezbožownje z 2:3 přěhraštaj.

wozjewjene w: Sport
Prošu přizjewće so, chceće-li komentar podać

Serbska debata

nowostki LND