Denny Kral, čłon Serbskeje koparskeje wubranki, je koparski abejcej w Sportowej jednotce Njebjelčicy a pola Budissy Budyšin nawuknył. Rodźeny Njebjelčan wosta Łužicy tež po tym swěrny a wuwi so w rjadach muži pola Budissy k stajnemu hrajerjej. Před lětom dźěše wón w regionalnej lize k FC Hornjej Łužicy Neugersdorf, wottam před někotrymi tydźenjemi pak k ZFC Meuselwitzej. Tójšto fachowcow na polu kopańcy so krokej serbskeho koparja dźiwa. Tak tež Tadej Cyž z Njebjelčic, kiž je so z Dennyjom Kralom za naš wječornik rozmołwjał.

Dennyjo, w Neugersdorfje sy minjenu sezonu nimale wšitke winowatostne partije za FC Hornju Łužicu Neugersdorf (FCO) wotměł a sy tam jedyn z wukonosylnych koparjow był. Čehodla njejsy pola FCO wostał?

D. Kral: Chcu hišće dalši krok doprědka hić, so wosobinsce dale wuwić a na kóždy pad z přećelku hromadźe ćahnyć. Tohodla njejsym so wjace za Hornju Łužicu rozsudźił.

Nětko dźeš potajkim k ZFC Meuselwitzej. Sy tež kontakt k wyšoklasowym mustwam měł, na přikład w třećej lize?

D. Kral: Ně, naprašowanja k wyšoklasowym mustwam žane njemějach.