Halle (dpa/SN). Durinski krajny předsyda AfD Björn Höcke steji wot dźensnišeho w Halle před sudnistwom. Wón je pječa w swojich narěčach dwójce hesło nacionalsocialistiskeje SA, paramilitariskeje organizacije NSDAP, wužiwał. Wobskorženy je wón wužiwanja symbolow wu­stawje so spřećiwjacych a teroristiskich organizacijow. Do zahajenja procesa bě wučer stawiznow twjerdźił, zo njeje swój čas wědźał, wo kajke hesło so jedna. Při wólbach krajneho sejma chce 52lětny ­jako načolny kandidat AfD nastupić. Krajny zarjad za wustawoškit zastopnjuje stronu jako prawicarskoekstremistisku a ju wobkedźbuje.

Konkretnje dźe wo parolu SA „wšitko za Němsku“. Höcke bě je dwójce wužiwał, jónu w saksko-anhaltskim Magdeburgu a jónu w durinskej Gerje. Po informacijach rěčnicy sudnistwa saha měra chłostanja wot pjenježneje pokuty hač k tři lět trajacemu jastwu.

Do zahajenja procesa je so před twarjenjom sudnistwa něhdźe 250 přećiwnikow Höckeho zhromadźiło.

Zhromadna deklaracija na wjeršku w Brüsselu přećiwo nowej namocy

Brüssel (dpa/SN). Europska unija namołwja Israel a Iran, so dalšeje mjezsobneje namocy wzdać. Wšitke strony su doraznje namołwjene, so zdźeržliwje zadźeržeć a žane dalše naprawy njezahajić, kotrež móhli napjatosće w regionje při­wótřić. Tak rěka w deklaraciji statnych a knježerstwowych šefow, kotruž su minjenu nóc na wjerškowym zetkanju EU w Brüsselu wozjewili. EU čuje so zamołwita, k wotputowanju napjatosćow w regionje přinošować, w dokumenće rěka.

Pozadk zhromadneho stejišća je strach, zo móhł so konflikt na Bliskim wuchodźe na wulku wójnu wuwiwać, hdyž Israel z raznej wojerskej akciju na kónctydźenski iranski nadpad z raketami a trutami na Israel wotmołwi. Nastork iranskeho nadpada bě pozdatny israelski nadpad na iranske wulkopósłanstwo w syriskej stolicy Damaskusu, při kotrymž běštaj iranskaj generalej žiwjenje přisadźiłoj. Po najnowšim iranskim nadpadźe bě Israel připowědźił, zo měri so nětko na objekty iranskeho wójska.

Wšě generacije, ludźo wšelakeho pochada a rozdźělneho politiskeho swětonahlada su so we wčerawšej diskusiji wo nacijach w našich kónčinach słowa jimali. Kwintesenca stej dwě konkluziji: Mamy zmužići dosć być, swoje městno w zjawnym rumje zabrać a principy ciwilizowaneho wobchadźenja přesadźić – a so wot prawicarskich cwólbow njezatrašić dać. Při tym njeńdźe wo to, kursy za sebjezakitowanje poskićować, ale instrumentarij za zaručenje wěstoty wučerpać, policiju a partnerow ciwilneje towaršnosće sčasom zapřijeć. Druha tema pak je: Prawicarske syće rekrutěruja młodostnych, kiž pytaja zhromadnosć, kotruž wšědny dźeń paruja. Snadź nam zawidźa, zo w Serbach tajka zhromadnosć knježi, kotruž sami w němskej towaršnosći hižo njeznaja. Proklamacije, zo njech je region někak pisany a swětej wotewrjeny, njedosahaja. Wosebje sportowe towarstwa pokazuja wuspěšnje, kak młodym ludźom socialnu domiznu sposrědkować. Marcel Brauman

Salzwedel (dpa/SN). Plany za wudobywanje litiuma w Němskej, mjez druhim w Saksko-Anhaltskej, steja hakle na spočatku. Krajny zarjad za geologiju a hórnistwo Saksko-Anhaltskeje je powěsće ­dementowało, zo je pječa wudobywanje litiuma dowolił. Minjeny tydźeń bě ­předewzaće Neptune Energy zdźěliło, zo je licency za wudobywanje litiuma a zemskeje ćopłoty dóstało.

Hórniski zarjad zdźěli, zo je jenož tak mjenowane prawo na přiswojenje zemskich pokładow spožčiło. „Ručež chce předewzaće zemske pokłady woprawdźe wudobywać, dyrbi wotpowědny zawodny plan z próstwu wo dowolnosć předpołožić.“ W tym zwisku maja so potrjechene gmejny na procesu wobdźělić.

Litium wužiwaja mjez druhim za baterije elektriskich jězdźidłow. Je to nimo kobalta najwažniša surowizna za bate­rije. Tole tež w mobilnych telefonach a kompjuterach litium zasadźuja. Wjetše pokłady litiuma maja w Němskej we wjacorych kónčinach, mjez druhim w Rudnych horinach, w porynskej hrjebi a w na sewjeru Saksko-Anhaltskeje. W Porynsko-Pfalcy litium hižo wudobywaja.