Budyšin (SN/bn). „Studijo hraje“ rěka rjad Němsko-Serbskeho ludoweho dźiwadła, z kotrymž so elewojo domu wot lěta 1994 publikumej na kóncu hrajneje doby ze swójskej inscenaciju předstajeja. Tele dny hotuja so w tym zwisku Aquina Žurec, Bernadet Šnajdrec a Ole Schmidt na premjeru. Štwórtk, 25. apryla, chcedźa kruch „Zhub so, baby, zhub so“ prěni raz w Budyskim Dźiwadle na hrodźe pokazać. Originalnu předłohu Cariny Lacroix běštej elewce samej do hornjoserbšćiny přełožiłoj, režiju wukonja Torsten Schlosser, zastupujcy schorjeneho nawodu činohrajneho studija při NSLDź Ralpha Hensela.
Chrósćicy (SN/bn). Přihoty za klětuši, potom 15. mjezynarodny folklorny festiwal Łužica – Łužyca – Lausitz su zaběželi. Wotměć ma so wot 26. do 29. junija. We wobłuku nowinarskeje rozmołwy wčera w sydarni Chróšćanskeho gmejnskeho zarjada předstajištaj so sobudźěłaćerjej Domowiny Katharina Jurkowa a Pětr Brězan jako nowaj nawodaj předwčerawšim konstituowaneho přihotowanskeho wuběrka, kotremuž přisłušeja nimo jeju Gabriel Krawc, předsyda Smjerdźečanskeje rejowanskeje skupiny, předsyda Serbskeho folklorneho ansambla Wudwor Błažij Handrik a Chróšćanski wjesnjanosta Marko Kliman. Swoju funkciju rozłožiwši rjekny Brězan, zo „su financy a logistika kaž tež zarjadowanja w Budyšinje a w Hochozy z nadawkowym ćežišćom“. Jurkowa koordinuje festiwalnej dnjej w Chrósćicach a zamołwja zjawnostne dźěło. „Hižo loni smy so dojednali wuwiwać nowe logo a nowy corporate design, z kotrymž chcemy po cyłym swěće na festiwal skedźbnić.
Drježdźany (syd/SN). Pod hesłom „Wiźeś – Sichtbar – Widźomne“ wuhotowachu Sakski filmowy zwjazk, serbsko-němska syć Lužycafilm a Załožba za serbski lud we wobłuku tele dny wotměwaceho so 36. filmoweho swjedźenja Drježdźany wčera „popołdnjo serbskich (krótko)filmow“ na hrodźe Lingnera w sakskej stolicy. Zaměr zarjadowanja, kotrež přiwabi něhdźe 70 zajimcow, „bě a je, serbske filmowstwo, kotrež wotměje so dotal takrjec na ‚kupje zabytych‘, srjedźišću branše přibližić“, podšmórny moderatorka Cosima Stracke-Nawka, kotraž bě format sobu nastorčiła.
Budyšin (CRM/SN). 80. narodniny komponista, wučerja, dramaturga a intendanta Detlefa Kobjele wopominaše Serbski ludowy ansambl (SLA) minjenu sobotu w swojim domje a wčera w Choćebuzu. Tak so spominanje na žiwjenski skutk wobhnadźeneho a za hudźbu so horjaceho syna pjekarja z Rogozna pola Choćebusa po rozmołwnym kole minjenu srjedu (SN rozprawjachu) nětko z tym zjima, zo so to bytostne jeho kompozitoriskeho tworjenja předstaji. Dźiwadźelnik Měrko Brankačk program moderěrowaše.
Bychu-li serbske lajske chóry do wuměłskeje ligi zastopnjowane byli, bychmy za chór Lipu z Pančic-Kukowa wosebitu ligu wunamakać dyrbjeli. Štož su wopytowarjo na žurli Bizoldec hosćenca w Haslowje minjenu sobotu wječor a wčera popołdnju dožiwić směli, bě w kóždym nastupanju wusahowace a jónkrótne. Hižo optiski napohlad – 45 přewažnje młodych spěwarkow a spěwarjow na jewišću – nima w Serbach swojeho runjeća. Program połny žiwjenskeje radosće z dirigentku Jadwigu Kaulfürstowej na čole bě wuraz wuměłskeje zdokonjanosće a zatwarjene překwapjenki dopokazachu kreatiwnosć, fantaziju a wjele humora.
Wulka próca by hišće lěpje mytowana była, bychu-li techniske móžnosće wužiwali. Originelny skeč swójbnych mjenow na přikład njejsu wšitcy wopytowarjo dospołnje zrozumili a solisća bychu z lěpšim mikrofonom tež w zadnich rynkach derje słyšeć byli. Cyłkowny zaćišć pak wostanje – njezapomnity. Marko Wjeńka
Haslow (SN/bn). Dwójce wupředata, kopata połna žurla Haslowskeho hosćenca a wichorojty aplaws swědča wo wuspěšnymaj koncertomaj pod hesłom „Lipa@přećeljo“, z kotrymajž chór Lipa wčera a předwčerawšim wospjet dopokaza, zo słuša „tónle format k najwoblubowanišim našeho ćělesa – za naš publikum runje tak kaž za spěwarjow“, kaž moderator Fabian Hejduška podšmórny. Přičina je po jeho słowach „prosće pisanosć programa“. Nimo „popowych štyri- resp. wjacehłósnych sadźbow“ z repertoira chóra připowědźi wón „nowy medley a štyri premjery“, mjez kotrymiž „je nowostka, kajkaž je w serbskej zabawjacej branši dotal njeznata“. Tak přichwaleny nowum wukopa so jako skeč, z kotrymž Lipjenjo pokazachu, kak hodźa so serbske swójbne mjena onomatopoetisce za dosć amizantny, zdźěla dadaistiski dialog:„Hej, duška!“ „Gaul first!“ „Apokalebza!“ „Ha nóž?“ „Kup pola ebay maka!“
Budyšin (CS/SN/MiR). Sabine Bauer-Helpert je so w lěće 1950 w Šěrachowje narodźiła. Maturu złoži w zapadnej Němskej a skutkowaše tam po tym dušepastyrsce hač k swojemu wuměnkej. Njewočakowana namakanka zapiskow swojeho w Bóšicach rodźeneho serbskeho pradźěda Johanna Zaute (1839 – 1909) je ju pohnuła, so hłubšo ze stawiznami zaběrać, po tym, zo běše so 2016 do Hornjeje Łužicy nawróćiła. Wuslědk je kniha „Johann Zautes Lebensfahrt“, kotraž je loni kónc lěta w Zhorjelsko-Žitawskim nakładnistwje Gunter Oettel wušła.