Z wudaća: štwórtk, 25 junija 2015

Žane dojednanje tarifow dla

Offenbach. W tarifowym konflikće wo mzdy pěstowarkow a socialnych dźěła­ćerjow njemóžachu so komunalni dźěło­dawarjo a dźěłarnistwo ver.di dojednać, wujednawanski rozsud přewzać, kaž dźensa w Offenbachu zdźělichu. Ver.di chce so nětko swojich čłonow prašeć a 13. awgusta znowa jednać započeć. Hač do toho nochcedźa stawkować.

Centrum nowinarskeje swobody

Lipsk. Žurnalisća, zwjazki a medijowe domy chcedźa přichodnje zhromadnje ranjenja nowinarskeje swobody zjawnje narěčeć. Něhdźe 20 organizacijow je za to dźensa w Lipsku Europski centrum za swobodu nowin a medijow załožiło. Wón ma ranjenja nowinarskeje swobody w Europje dokumentować a potrjechenym žurnalistam pomhać. Srědki přinošuja EU, wonkowne ministerstwo a Sakska.

Gabriel Merkel gratulował

Na 5. DAK- běhu firmow wobdźěli so wčera w Budyšinje wjace hač 700 sportowcow. Mjez nimi bě tež mustwo Pěskečanskeho Zieglerec metal wobdźěłaceho zawoda. Prěni raz wjedźeše čara tež po Mosće měra. Prěni w cilu běchu Tino Sickert, Marco Friedrich a Maik Petzold po 17 minutach. Najspěšniši žónski team běchu Running­ Bankers­ z Ludoweje banki, pola mužow Handy Runners z firmy Seidel Communications a pola měšanych mustwow Red Runner­s wokrjesneje lutowarnje. Foto: C. Schumann

▶Dale na stronje

Z přeswědčiwym wuslědkom su Biskopičenjo prof. dr. Holma Großu (njestronjan) za swojeho noweho wyšeho měšćanostu wuzwolili. Nětko trjeba Marketingowa towaršnosć Hornja Łužica-Delnja Šleska (MGO) noweho jednaćela. Axel Arlt je z Holmom Großu wo předstejacej dobje přechoda MGO rěčał.

Wutrobnu gratulaciju k wuzwolenju za wyšeho měšćanostu Biskopic! Kak dołho dotalne zastojnstwo hišće wukonjeće?

Prof. dr. H. Große: Jednaćel Marketingoweje towaršnosće Hornja Łužica-Delnja Šleska sym znajmjeńša hišće hač do 31. julija. Nowe zastojnstwo w Biskopicach nastupju po wšěm zdaću 1. awgusta. Dokelž je to sobota, budu 3. awgusta prěni dźeń w radnicy. Wostanu pak tež dale aktiwny za naš region, mjez druhim jako předsyda spěchowanskeho towarstwa Łužica z.t.

Kotra procedura budźe trěbna, zo by so naslědnik abo naslědnica namakał/a?

Prof. dr. H. Große: Přichodne dny budźe­ městno jednaćela MGO zjawnje wupisane. Wotpohladane znowawobsadźenje městna z naslědnikom/naslěd­nicu stanje so najzašo 1. oktobra 2015, najpozdźišo 1. januara 2016.

Měšćanscy radźićeljo wo přichodźe Pastwineje hory debatowali

Kamjenc (BG/SN). Kak ma z jewišćom na Kamjenskej Pastwinej horje dale hić? Wo tymle prašenju su wčera w tamnišej měšćanskej radźe hišće raz horco debatowali. Wšako wuběži wuspěšny koncept wot lěta 1992, zo skupina Puhdys tam sezo­nu zahaja. Wuchodna rockowa band so, kaž je znate, kónc lěta rozpušći. Kamjenscy zarjadowarjo zhubja tak hudźbny podawk, kotryž je dotal stajnje w­o­koło swjatkow mnohich přiwisnikow rockoweje hudźby přiwabił.

Při stawku zalutowane mzdowe kóšty w pěstowarnjach města Budyšina budu nětko na dobro tychle zarjadnišćow. Město wotpowěduje tak žadanju woby­dlerskeje iniciatiwy.

Budyšin (CK/SN). Štož je Budyski wyši měšćanosta Christian Schramm (CDU) wčera na poslednim a dohromady 260. regularnym posedźenju měšćanskeje ra­dy­ w swojej hamtskej dobje dožiwił, bě absolutna nowosć. Dźěći w pěstowarskej starobje sćěhowachu na klinje swojich staršich, što so na radnej žurli stawa. Tak młodych připosłucharjow měšćanscy radźićeljo hišće ženje njemějachu.

Wojerecy (UH/SN). Za šulerjow 4. lětnika, kotřiž wuknu serbšćinu jako cuzu rěč, wuhotuje Domowinska župa „Jan Arnošt Smoler“ Budyšin přeco na kóncu šul­skeho lěta wosebitu pře­kwapjenku. Tak bě župa hižo druhe lěto z hosćom Wojerowskeje dźěćaceje a młodźinskeje farmy w nošerstwje Křesćansko-socialneho kubłanskeho skutka.

Tak pohosći farma tež dźensa dopoł­dnja 45 zakładnych šulerjow z Hućiny, Barta, Bukec, Wulkeje Dubrawy a Rakec, kotrychž přewodźachu wučerki za serbšćinu kaž tež někotre maćerje. Zo by so wulět za holcy a hólcow tež wobsa­howje wudanił, je sej nawodnica farmy Liane Semjank ze swojimi sobudźěła­ćerjemi wosebitu čaru po pjeć stacijach wumysliła. Rjadownje móžachu so tam wuměnjeć. Šulerjam předstajichu tak teren­ farmy­ ze wšitkimi zwěrjatami, w hornčerni móžachu sami hornčerić, mějachu składnosć, na farmowym konje Stelli jěchać­ a polěpšichu swoje serbskorěčne znajomosće při hrě z memory-kartkami, na kotrychž su serbske nałožki a powěsćowe figury widźeć.

Paket z 13 žiwymi hadami je awstralska policija sćazała. Pašowanje reptilijow bě so při rutinowej kontroli w mjezynarodnej rozdźělerni pósta w Melbournje wukopało. Paket pochadźeše z Indoneskeje. Kaž awstralski ratarski zarjad zdźěli, su hady morili.

Zo by swojeho njepřijomneho něhdy­šeho lubowarja skónčnje wotbyła, je žona­ z Delnjeje Sakskeje zhromadnje z mandźelskim krawne mordarstwo inscenowała. Wona lehny so na špundowanje, da so z kečupom namazać a fotografować. Foto pósła něhdyšemu lubowarjej, kiž ju hižo dlěje z mejlkami a intimnymi fotami přesćěhowaše, dokelž chcyše so wjećić. Jako muž foto wuhlada, alarmowaše policiju, kotraž „wopor a skućićela“ žiweju namaka.

Protestujo přećiwo internetnemu posrědkowarjej priwatnych taksijowych posłužbow Uber su šoferojo taksijow dźensa wažne dróhi Parisa blokowali, mjez druhim zwiski k lětanišću. Při tym kóncowachu awta priwatnych ludźi, kotřiž za Uber dźěłaja, byrnjež to w Francoskej zakazane było. Foto: dpa/Ian Langsdon

Brüssel (dpa/SN). NATO žada sej wot Ukrainy jako reakciju na swoju wojersku podpěru widźomne reformy. „Ukraina dyrbi swój podźěl spjelnić. Reformy su při tym njewobeńdźomne“, rjekny generalny sekretar NATO Jens Stoltenberg dźensa w Brüsselu k rozmołwam zakitowanskich ministrow čłonskich statow wojerskeho zwjazka ze zastupnikami z Kijewa. Trěbne su zasadne napinanja, wón potwjerdźi. Knježerstwu w Moskwje Stoltenberg­ wumjetowaše, zo konflikt na wuchodźe Ukrainy aktiwnje wobwliwuje. „Ruska separatistow dale z wukubłarjemi, brónjemi a wojakami zasta­ruje.“ NATO podpěruje Ukrainu z wojer­skimi poradźowarjemi kaž tež pjenježnje we wobłuku nawjedowanja, komunika­ciskich systemow, logistiki a wotwo­ba­ranja hackerowych nadpadow.

Inowaciski centrum zahaji dźěło

Podstupim/Choćebuz (SN/ch). Inowaciski centrum Moderna industrija Braniborska na Braniborskej techniskej uniwersiće Choćebuz-Zły Komorow (BTU) započnje w juliju dźěłać. Tak nastanje nowy­ kontaktny a poradźowanski běrow za małe a srjedźostawske předewzaća, kotrež chcedźa wužadanjam přiběraceho splećenja produkcije z informaciskimi technologijemi wotpowědować. Braniborska je kraj srjedźneho stawa. Nimale 95 procentow zawodow w předźěłacym přemysle su małe a srjedźne předewzaća. W inowaciskim centrumje dóstanu wone radu a podpěru ekspertow z wědomosće a slědźenja.

Rozsudźa wo spěchowanju