Zo wěriwi ze wšitkich serbskich katolskich wosadow zhromadny nyšpor swjeća, so tak často njestawa. Jedna tajka přiležnosć bě zawčerawšim w Chrósćicach składnostnje domchowanki.
Chrósćicy (aha/SN). Na nastork Towarstwa Cyrila a Metoda ze swojej sekciju wěda a skutk swjeća wot lěta 2008 na łuce Při Hatkach w Chrósćicach wosebity nyšpor na domchowanku, zwjazanu ze žohnowanjom konjacych zapřahow. Wone so tež zawčerawšim, njedźelu, zaso při Fulkec hórce hromadźachu a podachu so wottam nimo Domu swjateje Ludmile hač na łuku při Hatkach.
Budyšin (SN/MWj). Po załoženju spočatk junija tohole lěta je nowe towarstwo „Witamy was w Budyšinje“ (Willkommen in Bautzen) nětko jako powšitkownowužitne připóznate a je dźěłać započało. Tole zdźěli čłon předsydstwa towarstwa Andreas von Geibler. Po tym zo su wšitke prawniske, notarielne a organizatoriske prašenja rozrisane, nětko tež prěnje přizjewjenja dochadźeja. Towarstwo załožili běchu aktiwni čłonojo zwjazka „Budyšin wostanje pisany“. Wone ma podobne zaměry a wobhladuje so jako wudospołnjenje zwjazka. Towarstwo „Witamy was w Budyšinje“ spožča čestnohamtskemu dźěłu z ćěkancami a za integraciju w Budyšinje zjawno-prawniski wobłuk a přichodnje nadźijomnje słyšomny a demokratisce legitimowany hłós, kaž w nowinskim wozjewjenju rěka.
Wostrowc. Njewšědnu rubiznu běchu sej njeznaći na terenje klóštra Marijineho doła we Wostrowcu wupytali. Tam pokradnychu tele dny bronzowu postawu swjateho Franciskusa. Wona bě na zornowcowym kamjenju přišrubowana, z kotrehož ju paduši wutorhnychu. Hódnotu něhdźe 80 centimetrow wulkeje plastiki trochuja na něhdźe 5 000 eurow. Kriminalisća zawěsćichu slědy a nětko za skućićelemi slědźa. Hač su paduši figuru wobškodźili, njeje znate.
Budyšin. We wobłuku swojeje akcije za wjace wobchadneje wěstoty „Blitz für Kids“ je policija we wobłuku Zhorjelskeje policajskeje direkcije w minjenymaj tydźenjomaj na 34 městnach před zakładnymi šulemi spěšnosć měriła. Při tym kontrolowachu zastojnicy 1 249 jězdźidłow. Z nich bě 182, potajkim něhdźe kóžde sedme, přespěšne. 69 přeńdźenjow zwěsćichu w prěnim tydźenju, hdyž policisća hromadźe ze šulerjemi šoferam takrjec jeno žołtu kartu pokazachu. Druhi tydźeń lepichu 113 přespěšnych, kotřiž maja nětko płaćić.
Fischbach (SN). Smjertna zražka zawčerawšim popołdnju na zwjazkowej dróze B 6 pola Fischbacha, při kotrejž stej dźěsći w starobje pjeć a štyri lět žiwjenje přisadźiłoj, po wšěm zdaću žane wobchadne njezbožo njebě. Tole zdźělatej Zhorjelske statne rěčnistwo a tamniša policajska direkcija w zhromadnym wozjewjenju.
Po tuchwilnym stawje přepytowanja wuchadźeja z toho, zo je nan dźěsći, 46- lětny Kosowsko-Albanjan, tak mjenowany rozšěrjeny suicid pospytał. Pozadk njeskutka su swójbne rozestajenja. Mandźelska podhladneho bě so njedawno wot njeho dźěliła. Dźěsći měješe wón minjeny kónc tydźenja kaž dorěčane při sebi. Nětko wón přesłyšowarjam přizna, zo chcyše holcu a hólca kaž tež sebje samoho z wotpohladnej zražku do štoma morić. Mjeztym zo wobskorženy zražku zranjeny přežiwi, wobě dźěsći hišće na městnje njezboža zemrěštej.
Chlěb w srjedźišću
Wojerecy. Přichodne zarjadowanje w rjedźe „Zetkanišćo strowe zežiwjenje“ jutře, 30. septembra, w 19 hodź. na Wojeroskej dźěćacej a młodźinskej farmje steji cyle w znamjenju chlěba. Njedźichowski pjekar Tobias Wölkel porěči wo tym, kak w jeho pjekarni chlěb pjeku, a zapósłanc Sakskeho krajneho sejma Sebastian Fischer (CDU) předstaji někotre recepty w zwisku chlěbom. Wobdźělenje płaći wosom eurow na wosobu.
Na Serbske blido
Choćebuz. „Hry něhdy a dźensa“ rěka hesło přichodneho Serbskeho blida jutře, srjedu, we 18 hodź. w Choćebuskim Serbskim muzeju. Přeprosyli su sej Ursulu Starikowu z Janšojc, z kotrejž chcedźa so wo hrach za čas jeje dźěćatstwa rozmołwjeć. Nimo toho wěnuja so wopytowarjo hrě, kotraž je w kooperaciji ABC a Serbskeho muzeja nastała.
Stawizniske popołdnjo
Rowno (JoS/SN). Něhdźe 900 wopytowarjow přiwabił je mjeztym hižo 16. dworowy swjedźeń zawčerawšim, njedźelu, na Rownjanskim Njepilic statoku. Zahajili su jón ze serbsko-němskimi kemšemi z fararku Jadwigu Malinkowej. Na to njejsu sej hosćo při hudźbje šalmajoweje kapały jenož rańše piwko słodźeć dali, ale pozdźišo tež wobjed. Na burskich wikach poskićachu wudźěłki ze zahrodki a z pola runje tak kaž měd a wosebitosće z domjaceho swinjorězanja. Atrakcija bě butrowa žona Christel Jaschke z Běłeje Wody, kotraž na městnje butru dźěłaše a ju předawaše.
Motor Kumwałd
– Sokoł Ralbicy/Hórki 1:2 (0:0)
Zestawa hosći: Gloxyn – Lulak, von Köding, B. Bjeńš, Matka, S. Bjeńš, Šołta, B. Bejma, T. Bejma (65. Nuck), Wałda (73. F. Bejma), Kurjat
Po přestawce tydźenja nastupichu koparjo Sokoła Ralbicy/Hórki II pola Motora Kumwałd, kotryž běše dotal njeporaženy. W rjadach Sokoła pobrachowaštaj kapitan Pětr Domaška a Fabian Korjeńk. Za to bě Šołta zaso pódla. Trenar Thomas Schultz mustwo taktisce přestaji, tak zo bě prědku jenički nadběhowar Gabriel Kurjat. Sokoljo chcychu defensiwnje kompaktnje stać a w srjedźnym polu přewahu tworić. Woni tuž sćerpnje hrajachu a łakachu na swoje móžnosće. Najlěpšu měješe w prěnim połčasu Kurjat po nahłej přihrawce Tomaša Bejmy. Samlutki běžeše wón na wrota přećiwnika, třěli pak kulowatu kožu nimo wrotow.
Tradicije mamy, zo bychu so zdźerželi a pěstowali. Runje tajka je zakónčenje hornjołužiskeho Wopačanskeho cupa běharjow na Butrowej horje pola Biskopic. Tež na tradicionalne słónčne wjedro móžachu so atleća zaso spušćeć.
Tak je so tójšto sportowcow wospjet pospytało na rjanej, ale naročnej čarje po lěsnych šćežkach horje a dele po Butrowej horje. Někotři z nich wšak wojowachu wo poslednje dypki, zo bychu swoju poziciju w cyłkownym hódnoćenju hišće raz polěpšili. Mjez serbskimi dźěćimi běchu to Larissa Měrćinkec (WU14), Janoš (MU12) a Juraj Nuk (MU10) ze Serbskeho šulskeho a zetkawanskeho centruma Budyšin, startowace za Budyske lochkoatletiske towarstwo OSLV. Larissa a Janoš běštaj sej swoje slěborne resp. złote cyłkowne městno hižo do běha zawěsćiłoj, tak zo njetrjebaštaj wjace z połnej paru běžeć. Larissa doběhny po 2,5 km na 2. městno, Janoš bu na 1,2 km pjaty. Najmłódši pak dyrbješe so hišće chětro napinać, a z 3. městnom w swojim běhu poradźi so Jurajej wo jenički dypk hišće skok na cyłkowny bronzowy podest.