Z wudaća: póndźela, 23 nowembera 2015

Sokoł Ralbicy/Hórki – TSV Wachau 1:1 (1:0)

Zestawa domjacych: Gloxyn – Matka (68. B. Bjeńš), Schultz, S. Bjeńš, Lulak, Šołta, Korjeńk (68. Kurjat), T. Bejma, Wałda (80. Bejmak), Domaška, B. Bejma

85 přihladowarjow dožiwi wčera, delansku kermušnu njedźelu, słabu hru koparjow Sokoła Ralbicy/Hórki. Wot spočatka hač do kónca mějachu woni ćeže, hru měrnje natwarjeć. Taktika hosći so połnje wudani – wěsće stać a přez kon­tery k wuspěchej dóńć – jeničke wrota za Sokoł padnychu krótko do połčasa, jako docpě niska přihrawka Antoniusa Wałdy Pětra Domašku w šěsnatce. Tón bjez problema bul přez liniju storči. Hižo do toho pak dyrbjeli domjacy nawjedować. Woni dóstachu pjeć metrow před wrotami indirektny wólny kop, dokelž přiwza wrotar z Wachauwa bul swójskeho škitarja z ruku. Prjedy hač so Lulak wušmjata, pak bě hižo prěnja noha hóstneho škitarja při bulu. Kaž přez cyłu partiju pobrachowaše Sokołam tež při tutej šansy jasny koncept.

Načolny duel krajneje koparskeje ligi mjez Jednotu Kamjenc (třeća tabulki) a Chemiju Lipsk (prěnja tabulki) je so wčera 1:1 skónčił. Hru widźało bě 416 ludźi, něhdźe połojca z nich bě z Lipska. Wrota třělištaj Stefan Höer za Kamjenc a Daniel Heinze za Lipsk. W tabulce pak stej so wobě mustwje wo poziciju pohubjeńšiłoj. Foto: Jörg Stephan

FSV Łuty – SJ Chrósćicy 1:3 (1:1)

Zestawa hosći: Králíček – Pöpel, Šiman, Cyž, Schulze, Dehn, Runt, Domaška (65. Budar), Młynk, Šafář, Bogusz (50. Zahrodnik)

Po tym zo bě sudnik po zahwizdanju mjeńšinu mjelčenja za wopory atentatow w Parisu zapołožił, startowachu koparjo z Chrósćic hnydom z wrotami. Petr Šafář dósta bul do šěsnatki, wobkruži wrotarja a škitarja a suny hrajny nastroj k 0:1 nisko do wrotow (6.). Krótko na to měještaj Fabian Pöpel a Felix Dehn dalšej składnosći. Dale a bóle pak koncentracija hosći popušći a lochkomyslnosć přiběraše. Łutowčenjo přińdźechu wo­sebje z dołhimi třělwami přeco zaso strašnje do jich šěsnatki a w 24. min. wurunachu. Po wólnym kopje před wrota podlěši domjacy nadběhowar Pohl kulowatu kožu k 1:1 (24.) do saka. Chróšćenjo mějachu swoju lubu nuzu z agilnym hosćićelom. Hač do połčasa dźěše při sněhowym dešću stajnje tam a sem, wulke móžnosće pak wuwostachu.

SJ Njebjelčicy – ST Marijna hwězda 3:4 (2:3)

Zestawa domjacych: Ričel – Kral, Haška, Hrjehor, Hanuza, Dubaw, Cyž, Hommel, Hoelzel (60. Šołta, 71. Mjechela), Lejnart, Čornak

Zestawa hosći: O. Schmidt (46. Vacek) – Sbjeznie, P. Schmidt, Rab (76. Winkler), Škoda, Wróbl, Lipič, Bělk (60. Langner), T. Jurš, D. Jurš, Peschmann

Kaž hižo časćišo su Njebjelčanscy koparjo spočatk hry trochu zaspali, a tak hosćo spěšnje 2:0 nawjedowachu. Najprjedy zaměstni jich kapitan Křesćan Bělk bul poměrnje lochko we wrotach Daniela Ričela (9.). Nimale ze samsneje pozicije docpě štyri mjeńšiny po tym Paul Schmidt druhe wrota za swoje mustwo (13.). Na to běžeše kulowata koža lěpje w rjadach domjacych. Tadej Cyž zniži z wótrej niskej třělwu w 21. min. na 1:2. Roberta Lejnartowy pas před wrota pak Gabriel Čornak snadnje misny (28.). Wólny kop Lejnarta njezamóchu Chrystof Dubaw, Leopold Hoelzel kaž tež Čornak přetworić (32.). Jako so Lejnart w 37. min. do soloběha poda, wón z niskej a wótrej třělwu wuruna (37.). Z myslemi běchu Njebjelčenjo najskerje hižo w přestawce, ale po Ričelowym wot­placnjenju wy­sokeho bula bě Dawid Jurš na městnje a storči jón k 2:3 do saka.

Kopańca, krajna liga

FSV Zwickau II – Glauchau 6:2 (2:1)

Heidenau – Markkleeberg 1:2 (0:1)

Hohenstein-E. – BSC Freiberg 6:0 (1:0)

Wocl Riesa – Pirna-Copitz 3:1 (1:0)

Zhorjelc – FC Grimma 0:1 (0:0)

Kamjenc – Chemija Lipsk 1:1 (1:1)

Rapid Kamjenica – FC Eilenburg 0:5 (0:3)

Reichenbach – Taucha 4:0 (3:0)

1. Wocl Riesa 13 30 : 15 27

2. Chemija Lipsk 12 32 : 12 26

3. FC Grimma 13 23 : 15 25

4. Kamjenc 12 22 : 8 23

5. FSV Zwickau II 13 20 : 13 23

6. FC Eilenburg 13 25 : 21 21

7. Markkleeberg 13 24 : 21 19

8. Hohenstein-E. 13 28 : 20 18

9. Zhorjelc 13 17 : 16 18

10. Pirna-Copitz 13 17 : 21 16

11. Heidenau 13 13 : 18 16

12. Glauchau 12 13 : 23 12

13. Reichenbach 13 12 : 19 11

14. BSC Freiberg 13 12 : 33 11

15. Rapid Kamjenica 12 14 : 26 10

16. Taucha 13 10 : 31 6

Wokrjesna wyša liga

Bukecy – Póst Budyšin 3:4 (0:3)

Kulow – Hory0:0 (0:0)

Połčnica – ST Ćisk2:1 (0:1)

Kumwałd – Rakecy1:0 (1:0)

Großröhrsdorf – Wjelećin 8:0 (2:0)

Ralbicy/Hórki – Wachau 1:1 (1:0)

Łuty – Chrósćicy1:3 (1:1)

1. Chrósćicy 14 37 : 7 38

2. Hory 13 38 : 8 30

3. Kumwałd 12 33 : 14 26

4. Hnašecy 12 29 : 13 23

5. Großröhrsdorf 14 31 : 27 23

6. Ralbicy/Hórki 13 26 : 13 20

7. Póst Budyšin 14 35 : 33 20

8. Rakecy 13 23 : 18 19

9. ST Ćisk 13 26 : 26 19

10. Połčnica 14 23 : 22 16

11. Ramnow  12 25 : 25 16

12. Kinspork 13 22 : 27 15

13. Kulow 13 18 : 20 13

14. Bukecy 13 15 : 36 8

15. Wachau 13 18 : 45 8

16. Wjelećin 13 16 : 47 7

17. Łuty 13 12 : 46 7

Wokrjesna liga, stafla II

Hórnikecy – Wětnica/Hola 0:0 (0:0)

Njeswačidło – Lubuš2:3 (2:2)

Šćeńca – Bluń2:5 (0:1)

Nowe Město II – Ćisk II 1:2 (1:1)

Hory II – Wojerecy 1919 0:1 (0:0)

Ralbicy/Hórki II – FC Łužica 0:5 (0:2)

HZ Łaz – Nadr. Hrabowka 2:1 (2:0)

Wokrjesna liga, stafla III

Großröhrsd. II – Wósl./Skaskow 4:1 (2:1)

Němske Pazlicy – Frankenthal 1:4 (0:3)

Haselbachtal – Sepicy 2:6 (0:2)

Měšćenjo a dalši minjeny pjatk w Kamjencu derje nakupowali

Kamjenc (SN/mwe). Dwanaty króć wotmě so 20. nazymnika – kaž kóžde lěto pjatk do smjertneje njedźele – w Ka­mjencu nakupowanska nóc. Wjace hač 70 wikowarjow a přemysłownikow bě so swědomiće na jedyn z wjerškow lěta blisko radnicy, na Budyskej dróze hač k delnjemu dźělej města na Wojerowskej přihotowało.

Hłowny organizator nakupowanskeje nocy w Lessingowym měsće je towarstwo Cityjowa iniciatiwa Kamjenc. Wobchodnikam a dalšim čłonam poboku su hakle njedawno załoženy cityjowy management kaž tež město a jeho sobudźěłaćerjo w radnicy. Tak je so hibićiwa cityjowa managerka Anne Haselbach sobu wo trěbne spěchowanske srědki starała. Z měšćanskeho zarjadnistwa pomhachu mjez druhim z tym, zo přerjadowachu w nakupowanskej nocy wobchad a rjedźachu dróhi a hasy po zarjadowanju. Wšako bě nutřkowne město pjatk wot 15 do 24 hodź. za wobchad zaraćene, a awta móžachu tam jenož na wobmjezowanych městnach parkować.

W njeličomnych delanskich domjacnosćach su wčera kermušu swjećili, poslednju­ tohole lěta. Hižo sobotu wječor­ běchu zajimcy na kermušne reje do Konjec přeprošeni.

Ralbicy (aha/SN). „Kermuša je radostny swjedźeń. Wosebje tohodla, zo wopominamy poswjećenje swojeho Božeho domu“, zahaji wosadny farar Šćěpan Delan wčerawšu Božu mšu w Ralbičanskej cyrkwi. Swjatočne kemše stej dujerski orchester a cyrkwinski chór Lilija pod nawodom Achima Dučmana a Bernadet Šołćineje dostojnje wobrubiłoj. Na pišćelach hraješe Tomaš Wjenk.

Sprjejcy. Wustróžana bě sobotu popoł­dnju mać wosom měsacow stareho dźěsća w Sprjejcach. Wona bě swoju dźowku 55lětnej wowce k wuchodźowanju dowěriła. Jako so ta po dwěmaj hodźinomaj hišće nawróćiła njeje, poča so mać starosćić a informowaše policiju. Kaž pak so krótko na to wukopa, bě so 55lětna jenož w lěsu zaběžała. Prjedy hač policija wjetšu pytansku akciju zahaji, so wona nawróći.

Wojerecy (AK/SN). „Serbska swójba sedźi pódla was w hosćencu a so w swojej maćeršćinje­ rozmołwja. Kak byšće reagowali“, prašeše so dr. Katharina Elina sobotu wobdźělnikow dźěćaceje uniwersity we Wojerowskej kulturnej fabrice. „Bych so prašała, hač woni wo mni rěča“, rjekny dźesaćlětna Lila Beck, „bych pak swójbu rady zeznała.“ Dr. Katharina Elina nygny a na to nawjaza. Kulturnej pedagogowce dźěše wo předsudki a klišeje napřećo Serbam. Zakład předsudkow stej njewěda a njewěstosć. We wšědnym dnju su předsudki hłuboko zakótwjene. „Što nas wotdźeržuje cuzu rěč nawuknyć?“, chcyše Njeswačanka wědźeć. 25 serbskich słowow­ je wona dźěći sobotu nawučiła.

Wysoke počesćenje Łužičanomaj

Drježdźany. Wjelelětny předsyda towarstwa Iniciatiwa dźěći z Černobyla Georg Tietzen z Kamjenca a prelat Hubertus Comak ze Zhorjelskeje diecezy staj mjez dwanaće wosobami, kotrež sakski ministerski prezident Stanisław Tilich (CDU) zajutřišim ze Zwjazkowym zasłužbowym rjadom za přikładne skutkowanje na powšitkowne dobro počesći.

Prěnička Měrćina Wjenka wušła

Budyšin. Po dołhim času njesprócniweho pisanja předleži w LND prěnička prozy Měrćina Wjenka z titulom „Stary dom“. Wjenk słuša do kruha wjele lubjacych młodych pisacych, rěka z nakładnistwa. Lěta 2010 měješe swoje prěnje knižne wozjewjenje w rjedźe za teksty młodych awtorow „Paternoster“­. Wjenkowa kniha tež jako e-book wuńdźe.

Srjedu w Praze protestuja