Z wudaća: wutora, 09 februara 2016

Dźěłowe městna zachować

Praha. Čěski energijowy koncern ČEZ je sej wěsty, zo móhł po móžnym přewzaću brunicoweje wotnožki koncerna Vattenfall 8 000 dźěłowych městnow we Łužicy zachować. „Njeplanujemy rewoluciju“, rjekny šef koncerna Daniel Beneš powěsćerni dpa. „Brunicowe jamy su derje wobstarane. Njetrjebamy čěski personal město němskeho zasadźić.“

Karnewal wotprajeny

Dieburg. Wjedro je karnewalistam tež dźensa, póstnisku wutoru, swjedźeń skazyło­. Kaž policija zdźěli, dyrbjachu w Hessenskej wjacore zarjadowanja hrožaceho njewjedra dla wotprajić. Tež w porynsko-pfalcskim Ramsteinje-Miesenbachu přećah norow wupadny. Wobdźělnicy běchu město toho do měšćanskeje hale na swjedźeń prošeni.

Wobchad w Praze blokowali

Po trochowanju organizatorow je sej něhdźe 15 000 ludźi wčerawši róžowopóndźelny ćah w Kulowje wobhladało. Na něhdźe 30 swjedźenskich wozach zaběrachu so jich twarcy z wjetšimi a mjeńšimi njedostatkami wulkeje a małeje politiki, kaž tule na Konječansko-Šunowskim. Wjace wo tym čitajće na 4. stronje. Dalše wobrazy pod www.serbske-nowiny.de Foto: SN/Maćij Bulank

Kak móhli so přiběracych ličbow ćěkancow wobróć? Smy so w Serbach wobhonili, hač dyrbjeli so hranicy Němskeje zawrěć a z brónjemi zakitować.

Jadwiga Malinkowa, fararka w Slepom: Je to wopačny puć, ludźi w nuzy ze zawrjenymi hranicami abo samo z brónjemi witać. Nimo toho njewidźu, kak dyrbjało so to praktisce přesadźić. Přeju sej za swojej dźěsći, zo móžetej w Europje bjez hranicow wotrosć. Abo chcemy woprawdźe zaso zawrjene hranicy kaž w NDRskim času? Přećiwo přičinam, čehodla ludźo ćěkaja, dyrbimy něšto činić a tež wo našim žiwjenskim standardźe rozmyslować.

Marko Šiman, zapósłanc CDU w Sakskim krajnym sejmje: Hdyž Schengenski rum hižo wjele měsacow njefunguje, dyrbi němski stat sam skutkowne naprawy k zawěsćenju swojich mjezow přesadźić. Ilegalne zapućowanje do Němskeje tež z Čěskeje a Pólskeje njeje akceptabelne. Tule je zwjazkowe knježerstwo wužadane, zo by mjezy zawěsćiło, zapućowacych registrowało a ilegalnemu ranjenju mjezow zadźěwało. Štóž nětko njejedna, wohrožuje Europsku uniju.

Wo rozšěrjneju serbskeho sydlenskeho ruma hižo njerěčeć

Budyšin/Choćebuz (SN/JaW). Hač do 31. meje maja gmejny wokrjesow Dubje/Błóta, Hornje Błóta/Łužica a Sprjewja-Nysa hišće přiležnosć, próstwu wo pruwowanje přisłušnosće a wuznawanje k namrětemu serbskemu sydlenskemu rumej braniborskemu ministerstwu za wědomosć, slědźenje a kulturu zapodać. „Dotal stej měsće Lubin a Kalawa kaž tež gmejna Łukojce próstwu stajili. Mjez druhim z Kopańcami (Neuhausen) a Baršćom wo tym hišće jednamy“, rjekny naměstnik jendaćela Domowiny a městopředsyda rady za serbske naležnosće Braniborskeje Marcus Końcaŕ. Běžnych jednanjow dla pak nochcył so konkretnišo wuprajić.

Ze sobotnym wustupom Serbskeho ludoweho ansambla w Radworju je so lětuša ptačokwasna sezona zakónčiła. Wuměłcy zhladuja wróćo a zwěsćeja za swój wukon připóznaće.

Budyski wyši měšćanosta Alexander Ahrens (njestronjan) přija na dźensnišej póstniskej wutorje dopołdnja 20 dźěći ćěkancow. Předrasćeni jako princojo a princesny ćehnjechu holcy a hólcy do radnicy. Tam witaše jich Ahrens na póstnisku bjesadu z čerstwymi pampuchami, kiž dźěćom widźomnje zesłodźachu. Małych wopytowarjow radnicy přewodźachu čestnohamtscy pomocnicy, kotřiž ćěkancow w hospodźe na Flincowej wobstaruja. Foto: SN/Maćij Bulank

Góry (HA/SN). Domowinska skupina na Górach je jedna z najmłódšich mjez cyłkownje 40 skupinami župy Delnja Łužica. Hakle před něhdźe třomi lětami bu wona znowa załožena, po tym zo bě tajka hižo za čas NDR w serbskej wsy Bórkowskeho zarjada skutkowała. Z něhdźe dwaceći čłonami je so wona lěta 2013 wutworiła, předewšěm młodźi wobydlerjo jej přistupichu. Mjeztym liči tale Domowinska skupina hižo něhdźe 70 sobustawow. Su to zwjetša młodostni, tola tež srjedźna a starša generacija stej zastupjenej. Górska skupina liči z tym, zo lětsa hišće dalšich čłonow do njeje zdobudu.

Najwjetšu zasłužbu na tymle wuwiću na Górach ma studentka sorabistiki w Lipsku Jennifer Dünnbierojc. Młoda Delnjoserbowka, kotraž chce so ze serbskej wučerku stać, je zdobom předsydka skupiny a zastupuje ju w Zwjazkowym předsydstwje Domowiny. Domowinska skupina na Górach je so mjez druhim wo to postarała, zo haja we wsy po lětach přestawki zaso delnjoserbski nałožk zabiwanja kokota.

Ze swójskim fotom su třo paduši w Kamjenicy policiji dźěło wolóžili. Kaž Kamjeničanska policija zdźěli, běchu so paduši krótko do hód do bydlenja w Burgstädtće zadobyli. Tam spakosćichu mjez druhim klučiki awta. Hišće samsny dźeń zajědźechu z pokradnjenym awtom do paslow błyskača. Na foće su mužojo derje spóznać, policija zdźěli. Awto něšto pozdźišo namakachu, po tym zo běchu mužojo z nim 900 kilometrow jěli. Policija fota muži wozjewi a prosy wo pokiwy.

Z retlom a motorowej piłu staj so susodaj w Naunhofje pola Lipska do so dałoj. K rozestajenju dóńdźe, po tym zo bě muž z piłu kwětki susodki podrězał. Ta jemu na to z drjewjanej łatu na hłowu dyri a při tym zrani. Na to muž z mjeztym hasnjenej piłu žonje do ruki dyri. Wona pak wosta njezranjena. K starobje zwadźeneju susodow policija ničo njezdźěli.

Pomocnicy na městnje njezboža njedaloko hornjobayerskeho Bad Aiblingena. Tam běštej dźensa rano regionalnej ćahaj do so zrazyłoj. Za dźewjeć pasažěrow přińdźe wša pomoc přepozdźe. 90 ludźi so zrani. Foto: dpa/Josef Reisner

Wukrajnikow atakowali

Choćebuz (dpa/ch/SN). Wjacori mužojo su njedźelu na Choćebuskim hłownym dwórnišću skupinu muži z hidy na cuzych atakowali a jim wudma nadawali. Jako zastojnicy zakročichu, so dźěl skućićelow tež do nich da, zdźěli wčera policija. Spytachu do policistow teptać a jich bić, słužbny pos pak jich na distancu dźeržeše. Napitaj 21- a 23lětnaj z wokoliny Grodka buštaj nachwilnje zajataj. Zwjazkowa policija pruwuje po wuprajenju rěčnika, hač měł so statny škit do dalšich přepytowanjow sobu zapřijeć.

Kubłanje za dźěći ćěkancow