Z wudaća: srjeda, 10 februara 2016

srjeda, 10 februara 2016 13:00

Krótkopowěsće (10.02.16)

Rozprawa wuběrka předleži

Wojerecy. Nachwilny poradźowacy wuběrk Piwarska haska 1 Wojerowskeje měšćanskeje rady je na swojim wčera­wšim posedźenju kónčnu rozprawu swojeho dźěła zestajił. Dokument chcedźa měšćanskej radźe na jeje posedźenju w měrcu předpołožić. Wuběrk bě so z přičinami zaběrał, čehodla bě saněrowanje wobydlerskeho centruma w měsće 700 000 eurow dróše hač planowane.

Natwarja wjelči centrum

Berlin. Pjatnaće lět po nawróće wjelkow do Němskeje je zwjazkowe ministerstwo za wobswět skupinje wědomost­nikow nadawk dało, wjelči poradźo­wanski centrum natwarić. W nim chcedźa prěni króć scyła informacije wo wjelkach w Němskej zběrać a zamołwitym w zwjazkowych krajach spřistupnić, zwjazkowa ministerka za wobswět Barbara Hendricks (SPD) dźensa připowědźi.

Bartsch: CSU won z knježerstwa

wozjewjene w: Krótkopowěsće
Swoju kóždolětnu akciju na městnje je zapósłanc CDU w Sakskim krajnym sejmje Marko Šiman (2. wotlěwa) dźensa składnostnje Politiskeje popjelneje srjedy zaso přewjedł. Lětsa poby z hosćimi kaž Marju Michałkowej a Alojsom Mikławškom (wobaj CDU) mjez druhim w Budyskim policajskim rewěrje, hdźež jeho policajski prezident Conny Stiehl (3. wotprawa) wo dźěle zastojnikow kaž tež wo planowanych twarskich naprawach w objekće informowaše. Foto: SN/Maćij Bulank

wozjewjene w: Kraj a swět
srjeda, 10 februara 2016 13:00

Jan Budar: Njeńdźe wo to, štó dobudźe

Konflikt mjez iniciatiwu a Domowinu rozrisać

Budyšin (SN/JaW). Wjetšina wobdźělnikow online-naprašowanja SN měni, zo měła Domowina z iniciatiwnej skupinu Serbski sejm rěčeć. Tež bywši załožbowy direktor Marko Suchy je so w SN za to wuprajił a měni, zo je Serbski sejm „móžna forma“ zastupnistwa.

Rěčnik iniciatiwy dr. Měrćin Wałda hódnoći to pozitiwnje a argumentuje z wuslědkom dźěłoweje skupiny załožby z lěta 2011, „zo bě so dotalne zastupnistwo Serbow we wobstejacej formje jako njeskutkowne wopokazało“. Předsyda rady Załožby za serbski lud Jan Budar měni, zo „njewobradźeja nam nowe formy awtomatisce wjace abo cyle nowych zastupjerjow, kotřiž so za serbske naležnosće gratu přimaja.“ Skeptisce widźi tež zapřijimanje zwonkaserbskeje zjawnosće do teleje diskusije. Předsyda Domowiny Dawid Statnik rjekny, zo smě w demokratiji kóždy swoje měnjenje podać.

wozjewjene w: Kraj a swět

Budyšin (UM/SN). Wo stawje a perspektiwach sakskeje azyloweje politiki rěčeše wčera wječor we wobłuku „Budyskich rozmołwow“ Sakski nutřkowny minister Markus Ulbig (CDU) w Budyskej ludowej bance. Wopytowarjo dožiwichu derje přihotowaneho ministra, kotryž njeda so tež wot přispomnjenjow njespokojnosće mylić a kotryž bu na kóncu wot wjetšiny přitomnych z přikleskom roz­žoh­nowany. Ulbig přizna, zo njebě w Sakskej – runja Němskej – w poslednich měsacach lěta 2015 wulkeho nawala ćěkancow dla žane porjadne přiwzaće móžne. „Mjeztym pak je so situacija normalizowała a zmylki w systemje so pokazuja“, Ulbig rozłoži. Sakska je mjeztym přijimarnje za 20 000 ludźi zarjadowała. Tuchwilu je 5 000 městnow wobsadźenych. W cyłym kraju wužiwaja hišće pjeć sportownjow. „Zaměr je, přijimarnje w Drježdźanach, Lipsku a Kamjenicy koncentrować.“ Požadarjo azyla bjez akty při Zwjazkowym zarjedźe za migraciju a ćěkancy (BAMF) a bjez perspektiwy na přebywanje hižo komunam njepřepodadźa. „Zwjazkowy zarjad wostanje dale rozsudny dypk systema. Tam dyrbja nuznje kapacity zwyšić“, podšmórny Ulbig.

wozjewjene w: Kraj a swět
srjeda, 10 februara 2016 13:00

Nowozasydlenje

Čorna Pumpa (SN/JaW). Na industrijnišću Čorna Pumpa w gmejnje Sprjewiny Doł chcetej so dwě firmje zasydlić. To sobudźěłaćer managementa Holger Fahrland SN wobkrući. Wo kotrej so jedna nochcyše rjec. „Tuchwilu mjenujcy hišće z woběmaj jednamy.“ Kaž Fahrland dale zdźěli, je jedne předewzaće hižo w braniborskim dźělu parka zasydlene a chce na sakskim nowy zawod twarić a přećahnyć. Tamne skutkuje wuspěšnje po wšej Europje a je filialu załožiło, z kotrejž chce so w Sprjewinym Dole zasydlić. Wobě firmje chcetej so 17. februara gmejnskej radźe Sprjewiny Doł předstajić.

wozjewjene w: Hospodarstwo
srjeda, 10 februara 2016 13:00

Nowotwar mosta skónčnje wupisany

Železniski móst nad Budyskej Zeppelinowej chcedźa lětsa w awgusće znowa twarić počeć. Předewzaće Deutsche Bahn (DB) Netz AG je nadawk před něšto dnjemi wupisał. Wo projekće so hižo wjele lět rěči.

Budyšin (UM/SN). Wosebje za zapósłanca Sakskeho krajneho sejma Marka Šimana (CDU) je to zawěsće dobra powěsć. Wot 2006 zasadźa so wón za to, zo so tele „wuško“ na hłownej wobchadnej čarje w Budyskim juhu wotstroni a so stary móst z nowym naruna. Skónčnje je tak daloko: Na šěsć wusko popisanych stronach je DB Netz AG nětko trěbne naprawy a požadanja wupisała.

Sprěnja matej so stary móst a dwuposchodowe twarjenje wuhibkarnje potorhać. Nowotwar ma 18,25 metrow (dotal 9 m) šěroki a 4,50 metrow (dotal 3,50 m) wysoki być. Tak móhli so přichodnje tež wulke nakładne awta bjez problema pod mostom zetkać. Dotal móže tam jenož jedne wjetše jězdźidło srjedźa nimo. Wosebje wot toho časa, zo so zapadna tangenta wužiwa, je to k haćenjam wjedło a wobchad chětro poćežowało. Tež 250 metrow kolijow maja ponowić. Zo bychu ćahi při twarjenju dale jězdźić móhli, je pjeć pomocnych mostow trěbnych.

wozjewjene w: Łužica
srjeda, 10 februara 2016 13:00

Pisa semesterske dźěło wo Serbach

wozjewjene w: Kubłanje
srjeda, 10 februara 2016 13:00

Luboraz přećiwo pruwowanju

Luboraz (SN/JaW). Město Luboraz njebudźe braniborskemu ministerstwu za wědomosć, slědźenje a kulturu zapodać próstwu­ wo pruwowanje přisłušnosće k namrětemu serbskemu sydlenskemu rumej. Tole je měšćanski parlament na swojim­ posedźenju předwčerawšim wobzamknył. Kaž zdźěli wčera popoł­dnju naměstnica zarjadniskeho direktora města we wokrjesu Dubja-Błóta Kerstin Chilla žurnalistam, je wjetšina zapósłancow pruwowanje wotpokazało.

Po rešeršach SN su na wuradźowanju třo zapósłancy za zapodaće próstwy hłosowali, štyrjo přećiwo tomu a dalši třo so hłosa wzdachu. Předsyda rady za serbske naležnosće w Braniborskej Torsten Mak praji na naprašowanje našeho wječornika: „Sym jara zrudźeny z rozsuda. W Luborazu je hišće serbska substanca, nic drje telko kaž druhdźe, ale wona hišće je. Tuž rozsud prawje njerozumju. Nětkole dyrbimy rozmyslować, što to za nas rěka. Je woprawdźe škoda, wšako bě na spočatku rozmołwow ze zastupnikami Luboraza wšitko hišće hinak wupadało.“

wozjewjene w: Kraj a swět
srjeda, 10 februara 2016 13:00

To a tamne (10.02.16)

Cyły lěs pokradnyli su njeznaći w sewjernej Braniborskej. Něhdźe wosom hektarow chójnoweho lěsa pola města Premnitz su skućićeljo dospołnje podrězali, policija zdźěli. Štomy běchu mjez sto a 120 lětami stare a hač do 30 metrow wysoke. Z wida policije bě padustwo profesionelnje přihotowane, wšako wužiwachu skućićeljo ćežku techniku k pušćenju a wosebite nakładne awta k wottransportowanju. Hač do 2 000 štomow so na tele wašnje zhubi. Wobsedźerka je škodu hakle nětko zwěsćiła. Paduši běchu drje wot spočatka decembra w lěsu „dźěłali“.

Z 3,55 promilemi alkohola w kreji je kolesowar w Königs Wusterhausenje padnył a so při tym zranił, policija zdźěla. Spočatnje tukachu na wobchadne nje- zbožo. Muža dowjezechu do chorownje, wšako hrožeše zajědojćenje z alkoholom.

wozjewjene w: To a tamne
Dźěłaćerjo a technikarjo su dźensa hižo spřihotowanu nadobu CSU w Hali třoch krajow w Passauwje zaso wottwarili. Wčerawšeho njezboža ćaha dla su wšitke politiske strony w Bayerskej dźensa planowanu Politisku popjelnu srjedu wotprajili. Tež na zwjazkowej runinje wjacore zarjadowanja wupadnu. Foto: dpa/Armin Weigel

wozjewjene w: Kraj a swět

Serbska debata

nowostki LND