Z wudaća: póndźela, 02 meje 2016

Sokoł Ralbicy/Hórki

– ST Wjelećin 0:0 (0:0)

Zestawa domjacych: Gloxyn – Korjeńk, B. Bjeńš, Zynda, Schultz, Šewc, Šołta, S. Bjeńš, Wałda (45. Bejma), Bejmak (80. M. Kurjat), G. Kurjat

Dokelž běštaj kontrahentaj z Großröhrsdorfa a Horow hižo sobotu přěhrałoj, móhli koparjo Sokoła Ralbicy/Hórki wčera z dobyćom abo remisom na druhe městno tabulki skočić. Woni wočakowachu mustwo z Wjelećina. Hišće před tydźenjomaj běchu jich w pokalu ze 6:0 domoj pósłali, tónkróć pak mějachu zbožo, zo njewopušćichu trawnik jako přěhračk.

Kaž hižo w minjenych tydźenjach pobrachowaše trenarjej Thomasej Schultzej kopica hrajerjow. Nimo zranjenych koparjow so wosrjedź tydźenja tež hišće Domaška za přichodne štyri hry wotzjewi, dokelž je krótkodobnje do dowola lećał. To móže delanskich koparjow w kónčnej fazy sezony chětro boleć, wšako bě nadběh wčera wšo druhe hač strašny. W prěnim połčasu woni ani jeničku wulku šansu njewuhrachu. Hdys a hdys stejachu Kurjat, Wałda abo Bejmak w nimohrě. Hišće časćišo pak flanka abo přihrawka nadběhowarjow njedocpě. Jenička móžnosć hosći dźěše snadnje wyše wrotow Gloxyna do wotkopa.

Póst Germania Budyšin

– SJ Chrósćicy 4:1 (0:0)

Zestawa hosći: Králíček – Zahrodnik, Šafář, Schulze, Bětnar (58. Młynk), Kunze, Runt, Domaška, Dehn, Věchet, Žur

Składnostnje dźesaćlětneho wobstaća towarstwa Póst Germania Budyšin su tam koparjo Chróšćanskeje SJ kónc tydźenja hakle sobotu wječor napoł šesćich nastupili. Tójšto přihladowarjow sćěhowaše brizantnu hru. Hosćo pak dyrbjachu so najprjedy jónu na chětro twjerdy a njeruny trawnik a na skakace bule zwučić. Budyšenjo, na njón zwučeni, přińdźechu lěpje do hry a pruwo­wachu tak hnydom Králíčeka. Chróšćenjo spytachu so z dołhimi třělwami do nadběha předrěć, njemějachu pak žadyn wuspěch.

Kelko finalnych hrow je trěbnych, zo bychu volleyballistki Drježdźanskeho SC dubl docpěli? Wotmołwu hižo wěm – wuslědk zańdźeneje hry tež, ale što so dźensa w Drježdźanskej Margon-arenje stawa, to tučasnje njewěm. Chowanče trenarja Waibla dyrbja dźensnišu hru přećiwo Stuttgartej dobyć, zo bychu so z mištrom stali.

FSV Wacker 90 Nordhausen

– FSV Budissa Budyšin 2:1 (2:1)

Zestawa hosći: Jakubov – Kolan, Patka, Pfanne, Kral, Fröhlich, Hoßmang, Rosendo, Reher (81. Hansch), Walther, Salewski (86. Kunert)

Wokrjesna wyša koparska liga

Hnašecy – Hory6:2 (5:1)

Połčnica – Kulow3:0 (0:0)

Bukecy – Rakecy0:3 (0:2)

Kumwałd – Wachau4:0 (2:0)

Großröhrsdorf – Kinspork 1:4 (0:1)

Póst Budyšin – Chrósćicy 4:1 (0:0)

Ralbicy/Hórki – Wjelećin 0:0 (0:0)

Łuty – Ramnow 0:4 (0:4)

1. Chrósćicy 27 63  : 25 63

2. Ralbicy/Hórki 26 62  : 26 49

3. Hory 26 67  : 32 49

4. Großröhrsdorf 27 70  : 48 49

5. Rakecy 27 55  : 42 45

6. Póst Budyšin 27 63  : 51 43

7. Hnašecy 25 58  : 36 40

8. Kumwałd 26 68  : 54 40

9. Ćisk 26 59  : 53 37

10. Połčnica 26 47  : 47 37

11. Ramnow  27 56  : 67 36

12. Kinspork 28 54  : 58 29

13. Bukecy 27 45  : 70 29

14. Kulow 26 47  : 48 28

15. Wjelećin 26 36  : 74 20

16. Wachau 26 37  : 78 19

17. Łuty 27 20  : 98 10

Serbski běhar, 26lětny Jakub Čórlich z Němcow, je so prěni króć na 43. Žitawskim hórskim běhu wubědźował, a wu­zwoli sej z pjeć distancow hnydom najdlěšu 35 km. Z brawuru je wón ćežku čaru­, kotraž wjedźeše horje a dele po cyłym Žitawskim hórstwje, zmištrował. Po 2:54:37 hodź. doběža Čórlich do cila. Tónle spěšny čas woznamjenješe za njeho 1. městno w starobnej skupinje (sk) 20-29 lět. A mjez cyłkownje 130, kotřiž do cila doběžachu, běše to jara dobre 16. městno! Na 17 km je tež Handrij Bejmak z Budyšina jara derje wobstał. W swojej sk 50-54 lět wubědźi sej jara dobre 3. městno w 1:23:16 hodź. To bě cyłkowne 54. městno mjez cyłkownje 290, zwjetša młódšimi muskimi starterami.

Wobdźělnicy lětušeho Žitawskeho hórskeho běha běchu z cyłeje Němskeje kaž tež z Pólskeje a Čěskeje. Jurij Nuk

Na połnej žurli Šunowskeje Fabrikskeje hospody je Serbski muski chór Delany wčera popołdnju 45lětne wobstaće swjećił a wopytowarjam ze spěwnym koncertom dušu zhrěł.

Šunow (bn/SN). Serbski muski chór Delany je wčera ze swjatočnym swjedźenskim koncertom w Šunowskej Fabrikskej hospodźe 45. narodniny swjećił. Mjez něhdźe 130 zahorjenymi wopytowarjemi bě nimo čestnych čłonow a něhdyšich dirigentow chóra tež předsyda Domowiny Dawid Statnik, kiž spěwarjam w mjenje třěšneho zwjazka a Kamjenskeje župy wutrobnje gratulowaše. „Dźak wam za swěru, z kotrejž serbski spěw posrědkujeće. Wostańće dale w mysli a wutrobje serbscy“, Statnik rjekny. Zastupowacy wjesnjanosta Tomaš Bjeńš přepoda chórej­ pjenježny dar a zwurazni přeće, „zo tež přichodnje našu hudźbu z wjeselom dale pěstujeće“. Tomu so zastupjerjo lajskeje dźiwadłoweje skupiny Konjecy-Šunow a chóra Lipa přizamknychu. Kapała­ Horjany hosćićelow a publikum z lóštnymi štuckami překwapi, zapiska na kóncu „Chcył něhdy w holi Mužakec“ a cyła žurla sobu spěwaše.

Wo dworowym swjedźenju Helmec swójby

Jitk (JK/SN). Přijomne nalětnje wjedro je wčera z Helmec ratarskej swójbu w Jitku derje měniło. Na dworowy swjedźeń na swojim burskim statoku móžeštaj Kornelia a Sven Helm tójšto zajimcow witać. Hdźe tež hewak hač na tajkim statoku maja měšćenjo abo swójby z dźěćimi składnosć, cyle blisko dožiwić domjace zwěrjata tam, hdźež so derje čuja a su doma.­ A to pola Helmec na kóždy pad při­trjechi. W Jitku mějachu hosćo móžnosć, sej wobhladać chlěwy z wosebitymi družinami swini abo nuklow kaž tež wjetše stadło huškow.

Kulow (SN). Za lětuši Krabatowy swjedźeń pyta město Kulow rjemjeslnikow z kónčiny Leader hornjołužiskeje hole a hatow, kotřiž chcyli na tymle podawku swoje wudźěłki a posłužby předstajić. Swjedźeń budźe wot 12. do 14. awgusta kołowokoło Kulowskeho torhošća. Sobotu a njedźelu maja so tam regionalne rjemjeslniske wiki přewjesć. „Za to pytamy tradicionalne rjemjeslniske zawody, kotrež swoje wudźěłki pokazaja abo ludźom starodawne dźěła demonstruja“, praji Beate Hufnagel z organizaciskeho komiteja města.

Nimo rjemjeslniskich wikow planuja za ludowy swjedźeń dalše akcije. Tak ma so modowa přehladka runje tak wotměć kaž skótne a srjedźowěkowske wiki, kreatiwna mila a prezentacija knihow a filmow wo Krabaće. Přizjewjenja přijimuja w Kulowskim měšćanskim zarjadnistwje pod telefonowym čisłom 035725/ 755 20.