Z wudaća: pjatk, 22 julija 2016

Łužisku stwórbu za přichod zachować

Hara, proch a pobrachowaca dnowna woda su wuskutki Malińskeje (Greifenhain) brunicoweje jamy. „Cyły čas smy so z wobćeženjemi bědźili“, dopomina so Jörg Nevoigt z ewangelskeje wosady Stareje Darbnje (Altdöbern) sewjernje Złeho Komorowa na 80te lěta. „Wosebje wobćežne bě nalěćo. W měrcu bě často jara sucho. Při sylnym wětřiku z wuchoda dochadźeše k pěskowym wichoram. Cyłe zahrody běchu z prochom pokryte.“ 59lětny je ranger přirodneje straže w Delnjołužiskim přirodnym parku. Do toho bě 30 metrow hłuboke studnje za wotwodźowanje wody na kromje Stareje Darbnje twarił.

Pisajo wobchowuje sej awtorka poćah k serbskej Łužicy

Tež, hdyž w Lipsku bydli, ju poprawom po wšej Łužicy nachadźeš. Lubina Hajduk-Veljkovićowa je spisowaćelka a tak ze swojimi twórbami w domiznje prezentna. A tež, hdyž snano runjewon k lubowarjam literatury njesłušeš, sy spěw „Črjopki“ – přednjeseny wot Weroniki Rachelic – abo tež „Kwasny dźeń“ – interpretowany wot Michała Cyža – zawěsće hižo w Serbskim rozhłosu słyšał, zo bych jenož dwaj aktualnej mjenowała. Dohromady 180 spěwnych tekstow spisała je rodźena Budyšanka, kotraž budźe w oktobrje štyrceći lět. Tule w Ludowym nakładnistwje Domowina přihotuja runje druhi krimi za dorosćenych wot njeje, a w Němsko-Serbskim ludowym dźiwa­dle bě wona w runje minjenej hrajnej dobje­ z přełožkom elewoweho krucha „Makojčka“­ zastupjena. Loni su tam składnostnje połstalětneho wobstaća Serbskeho dźěćaceho dźiwadła jeje kruch „W putach Čorneho pana“ předstajili. Prěni fantasy-roman w serbskej rěči to. Tež prěnja konjaca kniha za holcy „Za wšě pady přećelki“ pochadźa z jeje pjera.

Na wopyće pola Serbskich bjesadow – 2. dźěl Rakečanska

Sym połny wočakowanjow, jako podam so na zetkanje Rakečanskeje Serbskeje bjesady. Dokelž so tam hišće tak prawje njewuznawam, sym sčasom na městnje a prašam so w zahrodce dźěłaceho fararja Andreasa Kecke za městnosću, hdźež so Bjesada schadźuje. Skrótka přemyslujo so wón dopomina a praji; „Ach, dźensa je tola srjeda, haj to so Bjesada zetka, w farskej bróžni.“ Dźakuju so a du. Sym prěni na městnje. Bórze přińdźe prěni čłon Bjesady z wulkimaj tobołomaj, w kotrymajž ma beamer a laptop. Sym wćipny, što drje to budźe. Na to přidruži so předsyda Bjesady Günter Holder z wulkej wobrazowej sćěnu. Sym dale a napjećiši. Pomału dochadźeja dalši čłonojo, na kóncu su woni šesćo.

Dipl.-med. Ulrike Tischer: Mjez Serbami so jara derje čuju

Medicinske zastaranje w zarjadniskim zwjazku Při Klóšterskej wodźe, kotremuž pjeć serbskich gmejnow přisłuša, je porno druhim regionam w Sakskej a Braniborskej tuchwilu nadměru dobre. K tomu přinošuja powšitkowni abo lěpje prajene domjacy lěkarjo ze swojimi praksami na wsach. Tak tež dipl.-med. Ulrike Tischer, kotraž ma hižo 25 lět swoju praksu w Jaworje. Mjez jeje pacientami bě wot wšeho spočatka wjele Serbow a tak tež dźensa hišće. Sympatiska domjaca lěkarka pak hotuje so pomału na wuměnk. Kamjenčanka, kotraž bě w Berlinje medicinu studowała, je spočatnje, před 30 lětami, w Pančičanskej poliklinice skutkowała. Młoda lěkarka zastarowaše mjez druhim medicinski centrum w něhdyšej Hlinowskej šamotowni a nimo Pančičanow tež pacientow ze Žuric, Jaseńcy, Njeradec, Noweho Dwora, Nowoslic a dalšich wsow. Přeco je Ulrike Tischer runja swojim kolegam wosebje staršich ludźi prawidłownje doma wopytowała a zastarowała. Ale tež w hladarnjach, kaž w Chrósćicach abo w Halštrowje so wobydlerjo na nju wje­sela.

Rentnar a što potom? – wuměnkarsku swobodu wužiwać abo wužadanja přiwzać (1)

Někotři njemóža so tohole časa dočakać, tamni zaso nochcedźa scyła na njón myslić – na zastup do renty. Žadosćiwje wočakowana swoboda je za mnohich wuměnkarjow najprjedy raz rjana. Chwile měć za to, za čož hewak chwile njebě. Mnozy rentnarjo pak začuwaja wuměnk jako wužadanje. Kajke maja woni žiwjenje abo starosće, chcemy ze seriju pod hesłom „rentnar a što potom?“ bliže wobswětlić.

Wjele ludźi wočerstwja so při ćopłym a słónčnym wjedrje tež při Budyskim spjatym jězoru. Mnozy wužiwaja přiležnosć, čołmikować abo wupožčeja sej při beachbarje wotstajene nastroje za teptanja. Druzy maja swoje wjeselo při hraću minigolfa. Tójšto swójbow pak dźe po kupanju z dźěćimi na bliske hrajkanišćo, hdźež njetrjebaš ničo płaćić. Foto: SN/Maćij Bulank

Dalše pokiwy na našej internetnej stronje www.serbske-nowiny.de

Pjatk 22. – 24.7.  Wjesny swjedźeń w delnich Sulšecach

  19:30 Koncert z Regensburgskimi soło­bikami w Zhorjelskej cyrkwi Pětra a Pawoła

  20:00 Koncert z Rolandom Kaiserom na jewišću pod hołym njebjom w Grodku

Sobotu 23. – 24.7.  Neptunowy swjedźeń w Nižej Wsy

   Dworowy swjedźeń Hollandec hornčerstwa w Halštrowje

   Wulki twjerdźiznowy spektakl na Złokomorowskim hrodźe

   Dyrdomdeje w Małowjelkowskim prazwěrjencu

   Wiki oldtimerowych dźělow w Grodku

  14:00 Lětni karnewal z Neptunowym swjedźenjom w Čornopumpskej kupjeli

  17:15 Pišćelowy koncert z Johannesom Trümplerom w Budyskej tachantskej cyrkwi

  18:30 „Štyri hłosy tak jasne“ – koncert na Njeswačanskim hrodźe

  19:00 Zahrodowa nóc „W swětle 1 000 swěčkow“ w Pančicach-Kukowje

  19:00 Koncert z hudźbnym duwom Presto z Lipska w klóšterskej cyrkwi na Oybinje

  20:00 Koncert z Matthiasom Reimom na Kamjenskej Pastwinej horje

  20:00 Koncert z Hartmutom Dorschnerom a Günterom Sommerom w Małowjelkowskej sotrowni

Njedźelu 24.7. 10:00 Lětni a dźěćacy swjedźeń na Jakubecec twjerdźi­znje w Mortkowje

njedźelu hornjoserbsce

11:00 Łužica tutón tydźeń, mjez druhim wo „nocy 1 000 swěčkow“ w Pančicach-Kukowje 

11:20 Zjimanje přinoškow „Z kolesom na dźěło“

12:00 Nabožne wusyłanje

 (farar Clemens Hrjehor)

po tym zbožopřeća

delnjoserbsce

12:30 Aktualny magacin – wo serbskej rěči w swójbach a wo dwurěčnosći na Delnjoserbskim gymnaziju

13:00 Portret: Matthias Kießling

13:30  Nabožne wusyłanje

 (Helmut Hupac)

po tym gratulacije

Jazzoweho stara dožiwić

Mały Wjelkow. Jutře, 23. julija, móža zajimcy jednoho z najwuznamnišich jazzowych hudźbnikow Europy w Małym Wjelkowje dožiwić. Wot 20 hodź. hraje bubnar Günter „Baby“ Sommer ze saksofonistom Hartmutom Dorschnerom jako Duo Infernale w Małowjelkowskej sotrowni­. To je koncert, tworjacy móst mjez dźensnišimi a přichodnymi hudźbnymi wurazowymi formami jazza. Zastup je darmotny.

Sulšečenjo swjeća

Sulšecy. Kónc tydźenja wotměje so w delnich Sulšecach wjesny swjedźeń. Jedyn­ z prěnich wjerškow je dźensniši „Čornohalštrowski special“, kotryž so w 21 hodź. započnje. Wot 22 hodź. su reje za młodych a staršich z DJom Dave. Jutře wječor je spektakl WiesenBeats. Njedźelu wot 11 hodź. su wšelake zaběry za dźěći, w 14.30 hodź. su wšitcy na kofejowu taflu z dujerskej hudźbu přeprošeni. W 16 hodź. započnje so wulki swjedźenski program „Bur na žeńtwje“, aranžowany wot Sulšečanskich žonow. Wězo budźe tež znaty entertainer Heiko Harig zaso pó­dla. Wot 19 hodź. swjedźeń z diskoteku wuklinči.

Wulki spektakl na hrodźe

Wjesny swjedźeń a sport

Na wjesnym swjedźenju w delnich Sulšecach pola Kulowa tež sportuja. Dźensa wubědźuja so tam wot 17.30 hodź. wohnjowi wobornicy, starši hač 40 lět w hašenju. Jutře chcedźa wot 14 do 16 hodź. jědnatki třěleć. Za to je so 25 cyłkow přizjewiło.

Maja hišće swobodne městna

Sakski volleyballowy zwjazk poskića za wukubłanje sudnikow hišće swobodne městna. Kurs za volleyballowych sudnikow kategorije D započnje so 29. julija w Freibergu. Přizjewjenja su móžne pod www.ssvb.org sudnicy – zarjadowanja – wukubłanje.

Koparske testowe hry

22.07. 18:00 Kamjenc – Wismut Gera

23.07. 14:00 Budissa – Rudolstadt

23.07. 14:00 Chrósćicy – Ćisk

23.07. 15:00 Běła Woda – Kulow

24.07. 10:30 Njebjelčicy – Ćisk II

27.07. 18:30 Kamjenc – Biskopicy

Beachtura Satkule

Dalši beachvolleyballowy turněr młodeje žołmy Radija Satkula je přichodnu póndźelu w Pančicach-Kukowje. Hrać chcedźa tam wot 19 hodź. Za wulki turněr 22. awgusta w Miłoćicach hižo žane přizjewjenja móžne njejsu.

Płuwanski seminar