Budyšin (SN). Nowe pěstowarske lěto je so zahajiło. Za Serbski ludowy ansambl je to přiležnosć, zo by zhromadne dźěło z Budyskej dźěćacej dnjowej přebywarnju „Jan Radyserb-Wjela“ dale pohłubšił. Jednaćelka SLA Diana Wagerec je minjenu wutoru na staršiskej zhromadźiznje nawodnicy Grit Henčlowej symboliske wopismo přepodała.
Estetiske kubłanje we wobłuku pedagogiskeho dźěła zarjadnišća w nošerstwje Křesćansko-socialneho kubłanskeho skutka (CSB) ma z kmótřistwom wyšu kwalitu docpěć. Wupruwowane poskitki kaž kóždolětny hudźbny tydźeń tuž dale wjedu. Nimo toho zmóžnja podpěra SLA, w přichodźe hudźbu, spěwanje a reju sylnišo do skutkowanja za čas cyłeho pěstowarskeho lěta zapřijeć, kaž CSB zdźěla. Wjeršk budźe znowa ptačokwasny program dźěći Budyskeje serbskeje pěstowarnje na wulkej žurli SLA.
Pjatk 19.8. do 20.8. Towarstwowe třělenje Kulowskeho třělcowskeho zjednoćenstwa na tamnišim Třělnišću
19.8. do 21.8. Grafitijowa dźěłarnička „Krabat between us“ w Budyskim Kamjentnym domje
19.8. do 21.8. Wjesny swjedźeń w Čornym Chołmcu
19.8. do 25.8. Kamjenska Boršć
13:00 Wuradźowanje Rady za serbske naležnosće Sakskeje w Budyskim Serbskim domje
18:00 Přednošk „Kćenja k jědźi“ we Łazowskim Domje Zejlerja a Smolerja
20:00 Drježdźanski kabaretist Olaf Schubert předstaji swój program „Sexy Forever“ na Grodkowskim jewišću pod hołym njebjom
Sobotu 20.8. do 21.8. Serbski festiwal w Janšojcach
14:00 40. łapanje kokota w Hochozy
12:00 Wotewrjenje hóstneje wustajeńcy Choćebuskeho Serbskeho muzeja „Karl Vouk. Satkula abo (st)wor(jen)a krajina“ w Janšojskim Serbsko-Němskim domizniskim muzeju
13:00 Swójbne pućowanje a dworowy swjedźeń Serbskeho ewangelskeho towarstwa we Wuježku
15:00 Powerserb w Radworju
16:00 Přepodaće noweje gratownje Smječkečanskeje młodźinskeje wohnjoweje wobory
20:00 Jubilejny koncert k 10lětnemu wobstaću skupiny Přezpólni na Chróšćanskim Koklic statoku
Njedźelu, hornjoserbsce
11:00 Łužica tutón tydźeń, mjez druhim wo wubědźowanju Powerserb w Radworju
11:20 W awgusće rodźeni hudźbni akterojo
11:45 Dźesaćlětne wobstaće spěwneje skupiny Přezpólni
12:00 Nabožne wusyłanje
(Jan Malink)
po tym zbožopřeća
delnjoserbsce
12:30 Live z Janšojskeho Festiwala serbskeje kultury z nowosćemi, přinoškami a rozprawami
13:30 Nabožne wusyłanje
(Hans Christoph Schütt)
po tym zbožopřeća
Přezpólni proša na swjedźeń
Chrósćicy. Dźesaćlětne wobstaće swjeći muska spěwna skupina Přezpólni jutře, 20. awgusta, na Chróšćanskim Koklic statoku. Započatk je w 20 hodź. Po zhromadnym programje z cymbalowej skupinu Vojara z južneje Morawy a z rejwarjemi Wudworskeho folklorneho ansambla přizamknje so zabawa. Morawscy budu zhromadnje ze serbskimi ludowi hercami hač do nocy hudźić a spěwać.
Pućuja a swjeća
Wuježk. Serbske ewangelske towarstwo přeproša znowa wšitkich Serbow a dalšich zajimcow sobotu na mjeztym hižo dwanate lětnje pućowanje a serbski swjedźeń we Wuježku pod Čornobohom. Wobdźělnicy zetkaja so w 13 hodź. pola Krygarjec (Wuježk čo. 31A) abo w 13.15 hodź. na parkowanišću mjez Splóskom a Schönbergom. Wottam pućuja zhromadnje přez Hromadnik a Čertowe wokno na Čornobóh a dale do Wuježka. Po pućowanju a kofeju w 17 hodź. přizamknje so nutrnosć ze superintendentom Janom Malinkom na Pawlikec statoku. Wot 18 hodź. zawjeseli wopytowarjow Drježdźanska skupina Podka.
Zela w srjedźišću
Satkula-beachvolleyball
Póndźelu, 22. awgusta, je lětuše finale wo pokal Radija Satkula, a to w Miłočanskej Bobkec jěchanskej hali. Kaž hižo loni tež lětsa zaso Serbski Sokoł turněr zarjaduje. 16 mustwow je so přizjewiło. Wone maja so w 17.30 hodź. zapisać, dokelž so hry we 18 hodź. započnu. Radijo Satkula wot 20 do 22 hodź. live wusyła.
Na Powerserb
Radworska młodźina přewjedźe jutře, sobotu, wot 15 hodź. jako zakitowar pokala zhromadnje ze serbskim młodźinskim towarstwom Pawk lětuše sportowe wubědźowanje Powerserb. Jedne mustwo ma wobstać ze znajmjeńša pjeć ludźi, maksimalnje sydom (šesta a sedma wosoba ma holca być). Startowy pjenjez wučinja 10 eurow na mustwo. Po wubědźowanju přizamknje so spěwny wječor.
Wobory so wubědźuja
28.08. 13:00 w Sulšecach pola Kulowa
16.09. 18:00 we Wotrowje
Poběhnu na Běłobóh
Njedźelu, 28. awgusta, přewjedu we Wopakej 37. běhi na horu Běłobóh. Budu to distancy wot 1,5 hač do 20 kilometrow. Startowy čas za wšitke běhi budźe w 10 hodź. Přidatne informacije a přizjewjenske modality pod www.baer-service.de
Kónctydźenska kopańca
pokalne hry
19.08. 18:30 Kamjenc – Niska
21.08. 14:00 Inter Lipsk – Budissa
Sedźimoj w kuchni Budyskeho bydlenja baletneje mišterki Serbskeho ludoweho ansambla. 43lětna rejwarka a choreografka Mia Facchinelli je sej po rozwodźe před třomi lětami rjane bydlenje na Tuchorskej namakała. „Mam za domom zahrodku, w kotrejž zeleninu plahuju, a zahrodu blisko Humboldtoweho haja“, powěda rodźena Italčanka. Sym překwapjeny, zo so wuměłča tež za zahrodniske dźěło zajimuje. „Sym doma na wsy pola města Trento bydliła. Móžu tež ze skotom wobchadźeć. To je za mnje wočerstwjenje.“ Sam wšak dožiwjam, kak luboznje wona ze swojim domjacym kocorom wobchadźa. Tón so jej při rozmołwje wokoło nohow šmóra, chce, zo jeho haca. A luboznje wobjimujo a z hubku wita rejwarka tež swoju dźewjećlětnu čornowłosatu dźowku Giadu Mariju. Holca bydli pola maćerje. 17lětny syn Gianluca Martin, gymnaziast, je měsačnje pola nana a pola maćerje. „My třo pojědźemy na kupu Gran Canaria na mjezynarodny rejwanski campus Europskeje unije. Sym wjesoła, zo směm dźěsći sobu wzać.“
Nowa knižka Měrki Mětoweje „Lizka wjaza kózlika“ wušła
Za prěnju čitansku starobu je wudało Ludowe nakładnistwo Domowina knihu tučasnje najproduktiwnišeje spisowaćelki dźěćaceje a młodźinskeje literatury Měrki Mětoweje. Wěnowaše-li so wona z předchadźacej knihu „Komplot na ptačim kwasu“ (2014) problemam puberterneje starobje, je nětko zaso młódši publikum na rjedźe.
„Lizka wjaza kózlika“ je literatura za zakładny schodźenk abo samo předšulsku starobu. Wobjednawa nic runjewon lochki wobswět małeje Lizki, kotraž je přiwšěm wjesoła a hibićiwa holčka, kaž sej to wot dźěsća přeješ. Nowostka wěnuje so temje, z kotrejž su tež najmjeńši dźeń a časćišo konfrontowani – „swoje zwučene městno w mjezyčłowjeskich poćahach spušćić a nowe namakać“, takle nakładnistwo wobsah 28stronskeje knihi w krutej wjazbje a z pisanymi ilustracijemi Cleo-Petry Kurze wopisuje.
Reinhard Roy, syn serbskeho komponista Hinca Roja z Klětnoho, je w Němskej a we wukraju znaty moler, grafikar a rězbar. Wón bydli blisko Frankfurta nad Mohanom. Srjedź apryla je rodźeny Klětnjan w Berlinje prapremjeru sinfonije „Stalingrad“ swojeho nana dožiwił. Alfons Wićaz je so ze znatym wuměłcom rozmołwjał.
Kak sće sinfoniju nana přijimał, je Was wona jako tworjaceho wuměłca jimała?
R. Roy: Za mnje hraje tworjace wuměłstwo wulku rólu, a wězo widźu je tež w zwisku k hudźbje. Tema, kotruž je sej mój nan wuzwolił, ma w tworjacym wuměłstwje najskerje poćah k realizmej. Ja wšak so w tymle wobłuku na cyle hinašich slědach pohibuju, tak zo směm rjec, zo njeje tule žanoho mjezsobneho wobwliwowanja. Prapremjera bě za mnje wjeršk nanoweho tworjenja. Před lětomaj běch na wopomnjenskej swjatočnosći we Wolgogradźe. Tam přepodach ruskemu komponistej a dirigentej Swjerowej partituru sinfonije „Stalingrad“.
Festiwal Nukstock zaso kiwa
Mjeztym 18. raz wuhotuje 28. a 29. awgusta Nukničanske towarstwo barakka lěta 1997 załoženy hudźbny festiwal pod hołym njebjom Nukstock. Na swjedźenišću při skale změja tuž tež lětsa přećeljo twjerdych, swojoraznych a njewšědnych zynkow móžnosć, w přijomnej, nimale swójbnej atmosferje a za fairny fenk dohromady dźewjeć skupin dožiwić. Hłowne kapały su Mörkhimmel, death’n’roll-band z Prahi, Trecker – wokomiknje hišće skerje tajny tip za lubowarjow tak mjenowaneho stoner-rocka z Nürnberga – a běłoruscy folk-punkerojo z mjenom Dzieciuki, kotřiž prěni raz na sławnym łužiskim jewišću zahraja. Region zastupuja alternatiwno-progresiwna rock pěstowaca skupina Leika z Budyšina a serbscy awantgardisća Cat’s eye nebula z Wotrowa. Program wudospołnjeja indie-rock-weteranojo Fuckwinter z Halle, psy- chedelikarjo The roaring 420‘s z Drježdźan a tohorunja ze sakskeje stolicy pochadźaca klasiska hardcore-band Huntsville stairsweepers. Chłóšćenka za fanow čorno-ćěmneho punkmetala budu hercy Lötfett, kotřiž festiwal pjatk wječor we wosmich zahaja.