Karin Bernd znowa wuzwolena
Wodowe Hendrichecy. Karin Bernd wostanje měšćanostka Wodowych Hendrichec. Při wčerawšich wólbach docpě kandidatka Njewotwisneje wobydlerskeje iniciatiwy hnydom w prěnim přeběhu 54 procentow hłosow. Žadyn z třoch tamnych kandidatow njedocpě wjace hač 20 procentow. K wólbam je 67 procentow wólbokmanych šło.
Tež twórby Nageloweje widźeć
Drježdźanach. Pod hesłom „Moderne časy“ wotewrěchu minjeny pjatk w Drježdźanskim „Wuměłstwowym rumje“ wustajeńcu, na kotrejž so tež Maja Nagelowa wobdźěla. Widźeć su mólby, rysowanki, grafiki, fotografije a plastiki 27 čłonow Noweho sakskeho wuměłstwoweho towarstwa. Hač do 15. oktobra je přehladka přistupna.
Dulig za spěšne rozrisanje
Drježdźany. Sakski hospodarski minister Martin Dulig (SPD) žada sej spěšne rozrisanje zwady mjez awtotwarcom VW a dodawanskimaj zawodomaj. W tym zwisku poskići wón dźensa swoju pomoc jako posrědkowar. Zwady dla su produkciju awtow w Zwickauwje hač do pjatka přetorhnyli. 6 000 sobudźěłaćerjow je potrjechenych. (Hlej tež 2. strona.)
Jednota koło dale
Janšojce (SN/mwe). W Janšojcach wotměchu sobotu a wčera Festiwal serbskeje kultury, kotryž bě něhdźe 8 000 hosći tež ze srjedźneje a Hornjeje Łužicy přiwabił. Tak dožiwi wčera dopołdnja wjele wopytowarjow přewšo pisany swjedźenski ćah z 48 wobrazami, kotrež pokazowachu wosebje pyšnu serbsku narodnu drastu wšelakich regionow Łužicy. Nad žiwjenskej radosću wjeselachu so tež čestni hosćo, kaž braniborski ministerski prezident Dietmar Woidke (SPD), krajny rada wokrjesa Sprjewja-Nysa Harald Altekrüger (CDU) a předsyda Domowiny Dawid Statnik. Nimo 70lětneho skutkowanja Domowiny w Delnjej Łužicy, 25. narodnin župy Delnja Łužica a 20. jubileja Janšojskeho Serbsko-Němskeho domizniskeho muzeja steješe swjatk w znamjenju toho, zo bu wjes před 670 lětami prěni króć pisomnje naspomnjena.
Na swoje dźesate narodniny běše skupina Přezpólni sobotu wječor na Koklic dwór w Chrósćicach přeprosyła. Připowědźili běchu młodźi mužojo wokoło Fabiana Kaulfürsta zhromadny program z folklornej skupinu Vojara z južneje Morawy a rejwarjemi Wudworskeho ansambla a po tym hudźbu, zhromadny spěw a reju hač do pózdnjeje nocy.
Budyšin (SN/MkWj). Rada za serbske naležnosće Sakskeje so minjeny pjatk w Budyšinje schadźowaše. Na prěnim dźěłowym posedźenju po parlamentariskej přestawce je z pjeć wosobow wobstejacy gremij pod nawodom zapósłanče CDU w zwjazkowym sejmje Marje Michałkowje wo móžnosćach sobudźěła w programje digitalizowanja sakskeho krajneho knježerstwa wuradźował. Kultusowe ministerstwo bě za to wosebity fachowy wuběrk wutworił. Tři lěta trajacy program knježerstwa wopřijima tež digitalizowanje serbskich wučbnych srědkow pod hesłom „Stup dale“, za čož su Serbam přidatne srědki přewostajili. Serbska rada je na swojim posedźenju čłonku rady, serbsku wučerku Leńku Thomasowu jako fachowču do tohole wuběrka delegowała, zdźěli Marja Michałkowa našemu wječornikej.
Istanbul (dpa/K/SN). Žałostny njeskutk sobotu na kurdisku kwasnu hosćinu je sej 51 smjertnych woporow a wjele dźesatkow zranjenych žadał. Najwjetši dźěl z nich su młodostni do 18 lět. Turkowski prezident Recep Tayyip Erdoğan winuje teroristisku milicu Islamski stat, zo je dźěćo za sebjemordarski atentat znjewužiwało. Mjezynarodna zjawnosć złóstnistwo raznje zasudźa. Generalny sekretar UNO Ban Ki-moon wupraja swójbam woporow swoju sobuželnosć.
Pytaja za skućićelom
Odense (dpa/SN). Po namócnej smjerći němskeje maćerje přez betonowy kamjeń na danskej awtodróze policija dale za skućićelemi pyta. Njeznaći běchu wčera rano hoberske kamjenje z mosta na kupje Fünen na dróhu mjetali. Jedne kamjenisko trjechi awto swójby ze Sewjerynsko-Westfalskeje, kotrež bě po puću do Němskeje. Žona, kotraž sedźeše za šoferom, bě nablaku mortwa. 36lětny nan so ćežko zrani. Pjećlětny syn na zadnjej ławce bu snadnje zranjeny.
Animaterej wucho wotkusnył je muž na campingownišću w italskim dowolnišću Riccione nad Adriju. Do toho běštaj so mužej zwadźiłoj, dokelž bě sobudźěłaćer syna muža do swojich žortow zapřijał. Na to nan animatera kusny. 46lětny z Piemontskeje kónčiny bu zranjenja ćěła dla zajaty. Lěkarjo su w chorowni spytali wucho animatera zaso přišić.
Dosć drohu jězbu z čołmikom je sej zalubowany sobotu wječor pola Saarbrückena popřał. Wjesłujo ze swojej přećelku na jězoru zhubi wón klučik požčeneho awta. Tón bě so jemu ze zaka sunył a so we hłubinje jězora zhubił. Muž dyrbješe na to awto wotwlec dać a tež kóšty za nowy klučik přewzać. Romantiska nalada bě wězo njejapcy přetorhnjena. Młody porik bě w Homburgu na kwas prošeny, hdźež mějachu hosćo składnosć, sej z čołmikom wulećeć.
Budyšin (SN/CoR). Budyscy zastupjerjo towaršnostneho žiwjenja su dźensa dopołdnja tam a takle za 1. Budyske tydźenje demokratije wabili, hdźe a kak maja wone 3. oktobra zakónčić: ze zjawnym zhromadnym přikuskom-piknikom za wulkej taflu na hłownym torhošću.