Z wudaća: wutora, 23 awgusta 2016

Na pisanym měšćanskim swjedźenju we wendlandskim Lüchowje je so minjenu sobotu nimo dalšich ansamblow Ćišćanska rejwanska skupina předstajiła. Na jubilejnym programje składnostnje 40lětneho wobstaća ćělesa De Öwerpetters wobdźělištej so tež skupinje z Litawskeje a Nižozemskeje. Wjele ludźi sej jich přinoški wobhlada, wobdźiwujo pisanu narodnu drastu a krasne reje. Njedźelu wustupichu kulturne cyłki w muzeju-kulowcu Lübeln. Foto: Róža Domašcyna

Pólskaj staćanaj w starobje 24 a 29 lět mataj so tuchwilu w Budyskej wotnožce Zhorjelskeho krajneho sudnistwa ćežkeho rubježnistwa a strašneho zranjenja ćěła zamołwić. Wumjetuja jimaj, zo bě­štaj 20. nowembra 2015 Budyski wobchod za časniki a debjenki wurubiłoj a při tym wobsedźerja a jeho dźowku z trašenskim płunom zraniłoj.

Birgit K. so hižo přihotowaše, zo móhła wobchod začinić, jako wony pjatk krótko do 18 hodź. słyšeše, kak něchtó zastupi. Jako so wobroći, zo by pózdnich kupcow postrowiła, steještaj jej zakuklenaj mužej napřećo. „Wědźach hnydom, zo so nětko něšto stanje“, rozłoži wona jako swědka před wulkej chłostanskej komoru.­ A woprawdźe pryskaše jedyn z njeju – „wjetši“ – jej hnydom trašenski płun mjezwoči. Wótře wołaše wona samsny wokomik za swojim nanom, mějićelom wobchoda, kiž w pódlanskej rumnosći runje časnik porjedźeše. Wón přichwata na pomoc a dósta tohorunja bjez někajkeho warnowanja agresiwny płun mjezwoči pryskany, tónraz „wot mjeńšeho z woneju muži“. Wjetši steješe hižo při wustajenych časnikach, kotrež mějachu so z rubiznu stać.

Na wobydlerskej zhromadźiznje wo wiziji „Wojerecy 2025“ rěčeli

Wojerecy (AK/SN). Swoje wusměrjenje „Wojerecy 2025“ wo wuwiću měło město Wojerecy předźěłać a přikrótšić. Nimo toho trjeba ­zaměrny měšćanski marketing. To je ­wuslědk wčerawšeje wobydlerskeje zhromadźizny w nowej Wojerowskej radnicy. W třoch dźěłowych skupinach – bydlić a žiwy być, ­socialne a seniorojo kaž tež hospodarstwo a dźěło – diskutowaše tam wjace hač 50 wobydlerjow wo tym, kak sej swoje město přichodnje předstajeja.

Kulow (AN/SN). 680 eurow wunjesła je tombola Kulowskeje wyšeje šule „Korla Awgust Kocor“ na njedawnym Krabatowym swjedźenju w měsće. Z pjenjezami podpěruje staršiska přirada nošerja kubłanišća při wuhotowanju noweho kabineta za informatiku. Prěnje dny noweho šulskeho lěta běchu starši retomas mytow do šule přinjesli a za tombolu přewostajili. Nimale 40 šulerjow bě zwólniwych, na woběmaj dnjomaj Krabatoweho swjedźenja losy předawać. Hižo sobotu popołdnju běchu wšitke rozpředate. Na te wašnje je někotryžkuli wopytowar rjane myto dobył, šula pak je nastupajo kabinet mały krok dale.

Na seniorowu akademiju

Wojerecy. Kak móža starši ludźo swoje swójstwo přećiwo paducham a zadobywarjam najlěpje škitać, je tema akademije seniorow Křesćansko-socialneho kubłanskeho skutka štwórtk, 25. awgusta, w 10 hodź. na Wojerowskej dźěćacej a młodźinskej farmje. Kriminalny hłowny komisar Burkhard Röwer rozłoži temu na aktualnych přikładach.

Dźěći móža wikować

Rakecy (JK/SN). Rakečanska gmejnska rada je Kristin Lehmann a Hansa­ Joachima Gabora na swojim zašłym posedźenju z čestnym talerjom gmejny počesćiła. Wjesnjanosta Swen Nowotny (CDU) hódnoćeše jeju angažement na dobro gmejny. Kristin Lehmann je wjele lět gmejnsku knihownju nawjedowała a tam šulske projekty organizowała. Hans Joachim Gabor wěnowaše so stawiznam Rakec a je wosebje mězniki na teritoriju gmejny a jich stawizny přeslědźił.

Dubrjenk (HH/SN). Pjaty dworowy swjedźeń hosćenca „Dubrjenske bahno“ njedźelu, 28. awgusta, změje w swojim programje­ nowosć. Hosćencar Michał Krječmar dźě je za to znaty, zo do dworowych swjedźenjow stajnje serbske tradicije sobu zatwarja. A tak je ze swojim bratrom­ Handrijom nimo kałanja wěnca w 14 hodź. tež hišće wubědźowanje kučow w 16 hodź. nastorčił. Wězo so tež Handrij Krječmar ze swojimaj konjomaj a z kuču na tym wobdźěli. Něhdźe 15 wobsedźerjow korejtow je so mjeztym přizjewiło, zo bychu w Dubrjenku rady startowali. Něhdźe runje telko jěcharjow wočakuja při kałanju wěnca.

Wohnjowych wobornikow, wuchowanskich sanitetarjow a policistow su wčera po připołdnju­ na Budysku Becherowu wołali, dokelž so tam z bydlenja kur waleše. Na městnje pak so spěšnje wukopa, zo je wšitko poł tak zlě. 96lětna wobydlerka bě mjenujcy­ swój wobjed přismudźić dała. Stało drje so jej ničo njeje, přiwšěm dowjezechu­ ju na přepytowanje do chorownje. Wobornicy bydlenje přewětrichu, tak zo tež žana wěcna škoda njenasta. Foto: Christian Essler

Jutrownu swěčku pokradnyć chcył

Ralbicy. Kedźbliwi wobydlerjo su zawčerawšim tomu zadźěwali, zo so z Ralbičanskeje wosadneje cyrkwje jutrowna swěčka zhubi. Krótko do 17 hodź. bě tam 39lětny muž něhdźe 1,20 metrow wulku swěčku z wołtarja wzał a so z njej wotsalił. To pak swědk wobkedźbowaše a hromadźe z dalšimi wjesnjanami za mužom spěchaše. Jako jemu swěčku zaso wote­wzachu, so wona bohužel skóncowa. Ryzy materielnu škodu powobličeja na ně­hdźe 50 eurow. Wo padustwje informowachu na to policiju.

Z mjasom so zastarał

Biskopicy. Najskerje wopak zrozumił je njeznaty muž w Biskopicach namołwu, sej skład žiwidłow na wjacore dny wu­tworić. Wón bě so w nocy na njedźelu do wjaceswójbneho domu na Belmsdorfskej zadobył. Tam spakosći ze zamróžaka dwaj kilogramaj howjazeje pječenje, tři kilogramy mjasa wot swinjaceje šije a dalše tři kilogramy kaslera w cyłkownej hódnoće 180 eurow. Wobydlerjo słyšachu­ něhdźe w 4 hodź. něšto pod­hladneho z pincy a widźachu, kak muž z nachribjetnikom ćeknje.

Cyłkownje 16 mustwow bě na wčerawši beachvolleyballowy turněr Radija Satkula přichwatało. Zarjadowar wubědźowanja bě znowa Serbski Sokoł. Do turněra wopominachu sportowče a sportowcy njedawno zemrěteho prezidenta a hrajerja ST Marijineje hwězdy Pětra Barta.

Dypkownje w šesćich dźěše prěnje na­daće přez sak. Po modusu štyrjoch staf­low wojowachu volleyballisća najprjedy wo zaćah do štwórćfinala. Stafle běchu hižo na předposlednjej staciji beachtury w Róžeńće wulosowali. Nowačk turněra, Sorabija Lipsk, bě so w předkole a štwórćfinalu přesadźił a wojowaše w połfinalu přećiwo rutinjejam Marijineje hwězdy, kotřiž běchu na kóncu sylniši a dobychu. Za druhu połfinalnu hru běštej so Bratrowstwo Róžant­ a Škit Budyšin kwali­fikowałoj. Po tym­ zo běchu Róžeńčenjo w prěnim połčasu hišće nawjedowali, so Budyšenjo snadnje, ale zasłužbnje z 28:26 přesadźichu.

SV Hainsberg – SJ Chrósćicy  5:2 (0:1) po podlěšenju

Zestawa hosći: Králíček – Schulze, Cyž, Šafář, Grieß, Žur, Runt, Sentivan, Špitank (75. Młynk), Henčl (84. Kunze), Věchet (67. Šmit)

Po tym zo běchu Chróšćanscy koparjo prěnje koło sakskeho pokala hišće wusadźić směli, dyrbjachu njedźelu w druhim kole pola mustwa SV Hainsberg nastupić. Tele towarstwo je runja Chróšćanskej SJ před měsacami do krajneje klasy postupiło. Wot wšeho spočatka su domjacy pokazali, komu hrajnišćo słuša. Hakle poněčim hrajerjo wokoło kapitana Cyža přećiwnikej paroli skićachu. Slědowaše njepřestajna wotměna nadběhow z wě­stej lěpšinu za Chróšćanow. W 34. min. bu Žur do šěsnatki pósłany a wotpołoži prěki před wrota. Věchet bě kročel spěšniši hač škitar a suny kulowatu kožu k nawjedowanju do wrotow. Wobě mu­stwje sej dale wjele njedarištej, měrjo so zas a zaso do ofensiwy. A hosćićel so ćim bóle prócowaše wurunać. Wjacore razy móžachu so Chróšćenjo wrotarjej Králíčekej za dobre parady a refleksy dźakować.