Z wudaća: póndźela, 26 septembera 2016

póndźela, 26 septembera 2016 14:00

Wospjet dumperowy mišter

17. raz su Lejnjanscy dumperowcy sobotu swójski běh wuhotowali, a prěni raz móžachu so woni w mustwowym hódnoćenju nad titulom němskeho mištra wjeselić. Filip Kral z Róžanta, Markus Donat z Lejna, Křesćan Grutka z Chrósćic, Maik Rupprecht z Hodźija a Daniel Rupprecht z Časec wudobychu sej lětsa najwjace dypkow za serbskich motorsportowcow na třoch kolesach. Najwjetši podźěl na dumperowej domchowance měještaj Filip Kral (96 dypkow), kiž sta so w Baćonju třeći raz za sobu z němskim dumperowym mištrom, a Markus Donat (72 dypkow). Wón měješe na domjacej čarje hišće móžnosć Krala w kónčnym hódnoćenju přesćahnyć.

wozjewjene w: Sport
póndźela, 26 septembera 2016 14:00

Sokoljo doma jasny wuspěch žnjeli

Sokoł Ralbicy/Hórki

– Drohotka Ramnow 5:1 (2:0)

Zestawa domjacych: C. Gloxyn – Matka, Bjeńš, von Köding, Lulak (48. Bejma), Schultz, Šewc, S. Bjeńš (74. Kurjat), D. Gloxyn, Korjeńk, Domaška

Po poražce w Ćisku chcychu koparjo Sokoła Ralbicy/Hórki doma přećiwo Ramnowej na kóždy pad dobyć. Wot spočatka tłóčachu tuž na tempo a mějachu hru w prěnjej štwórć hodźinje połnje w rukomaj. Po tym zo bu Domaška před šěsnatku foulowany, hrabny sej Denny Gloxyn kulowatu kožu a prasny ju z 20 metrow k 1:0 njedźeržomnje do hornjeho kuta (7.). Poněčim sej tež hosćo dobre šansy nadźěłachu, wrotar Chrystof Gloxyn pak wšitke znješkódni. Po lapsusu w defensiwje, jako wuhra přećiwnik přelochko hnydom dweju Sokołow, wón na třećim wisajo wosta. Sudnikej njeby ničo druheho wyše, hač na jědnatku rozsudźić (30.). Z wulkotnej paradu pak ju Gloxyn wotwobara. Ramnowčenjo běchu w tej fazy na kóždy pad lěpši. Jako chcychu so wšitcy hižo ze snadnym předskokom do přestawki rozžohnować, docpě hišće raz krasna přihrawka ze srjedźneho pola Domašku, kiž zymnokrejnje na 2:0 (45.) zwyši.

wozjewjene w: Sport
póndźela, 26 septembera 2016 14:00

Widźał, słyšał, napisał (26.09.16)

Awtor dźensa

Jan Macka

Lubi sportowcy, je zaso čas domchowanki a kermušow. Rjane słónčne wjedro je nam hišće tu abo tamnu překwapjenku kónc tydźenja w kopańcy wobradźiło. Kaž w medijach čitamy, wjetše a mjeńše mustwa nětko hižo bilancuja, što su prawje abo wopak činili. Mnozy pak so prosće takle zwuraznjeja: „Pola nas lětsa wulkotnje běži.“ abo „To sy hižo po prěnjej hrě spóznał, zo so ćežko změja.“ abo „Pola nas zaso njedosaha.“

Moje postupne mustwa, kotrež sym minjene hrajne lěto na lisćinje měł, chcu skrótka wobswěćić, a to z optimizmom na hišće dołhu hrajnu dobu. Pola RB Lipska njewidźu stracha, zo do krizy padnje. Start bě za nowačka w 1. zwjazkowej lize optimalny. Wosebje dobyće přećiwo Dortmundej je jemu dalšich fanow wobradźiło a z 1:1 nětko pola 1. FC Köln je w načolnej skupinje zaměstnjeny. To same zdaše tež za Dynamo Drježdźany móžno być, tola přěhraty derby doma přećiwo Aue a poražka w Kaiserslauternje woznamjenja jenož srjedźne městno, štož nikoho z nas tak prawje njezwjesela. Tež wčerawše 2:2 přećiwo Würzburgej nic.

póndźela, 26 septembera 2016 14:00

Dwójce jako prěni nawjedowali

SC Großröhrsdorf II

– SJ Njebjelčicy 2:2 (1:1)

Zestawa hosći: Hahn – Pawlik, Ričel, Haška, Hoelzel, Hanuza, Cyž, Šołta (75. Kral), Lejnart, Korjeńk (70. Čornak), Janca (87. Šram)

Wulku nuzu měještaj trenarjej Detlef Panic a Handrij Krawčik ze zestawu swojeho koparskeho mustwa w partiji pola rezerwy SC Großröhrsdorfa. Cyła kopica aktiwnych njebě zranjenja a druhich přičin dla k dispoziciji. W prěnjej połojcy bě hra wurunana, z někotrymi lěpšimi šansami za Njebjelčanow. Tak doběža sej Lejnart w 7. min. přihrawku na lěwej stronje, přesadźi so wušiknje, ale zaby bul na wrota třělić. W 23. min. přesadźi so Hoelzel hač do přećiwniskeje šěsnatki, hdźež bu foulowany. Postajenu jědnatku přetwori Hanuza k 0:1. Wurunanje poradźi so domjacym z wysokej třělwu z něhdźe 20 metrow pod łatu w 37. min.

wozjewjene w: Sport
póndźela, 26 septembera 2016 14:00

Wuslědki (26.09.16)

Wokrjesna wyša koparska liga

Motor Kumwałd – Wojerowski FC 2:1 (2:0)

Póst Budyšin – Módro-běli Kulow 0:2 (0:1)

Połčnica – Rakečanske ST 2:2 (0:2)

Hnašecy-Dobruša – Ćisk  2:0 (1:0)

Hory – Zeleno-běli Bukecy 6:0 (3:0)

Ralbicy/Hórki – Droh. Ramnow 5:1 (2:0)

Wjelećin – Großröhrsdorf 2:2 (0:0)

Kinsp./Łužnica – Otten.-Okrilla 6:1 (2:0)

1. ST Ćisk  6 17  :  2 15

2. ST Kinspork/Łužnica 6 16  :  7 12

3. Rakečanske ST 6 12  :  9 11

4. Sokoł Ralbicy/Hórki 6 16  :  9 10

5. Wojerowski FC 6 13  :  8 10

6. Motor Kumwałd 6 13  :  11 10

7. ST Hnašecy-Dobruša 6 10  :  11 10

8. Módro-běli Kulow 6 15  :  10 9

9. SC Großröhrsdorf 6 6  :  5 9

10. Póst Germania Budyšin 6 7  :  13 7

11. TSV Połčnica  6 9  :  14 6

12. FV Ottendorf-Okrilla V 6 9  :  16 6

13. LSV Hory  6 17  :  15 5

14. Drohotka Ramnow 6 11  :  12 5

15. Zeleno-běli Bukecy 6 13  :  24 5

16. ST Wjelećin 6 9  :  27 2

wozjewjene w: Wuslědki
póndźela, 26 septembera 2016 14:00

Najebać dobru moralku přěhrali

Budissa Budyšin

– Hertha BSC II 2:3 (0:3)

Zestawa domjacych: Große – Kolan, Klippel, Patka, Heppner, Hoßmang, Pfanne (80. Baudis), Milde, Müller, Hänsch (76. Barnickel), Hermann (76. Barth)

Do Budyšina bě młode mustwo přijěło, kotrež steji na druhim městnje tabulki a ma w swojich rjadach chětro sylnych koparjow. Trenar Budissy Linkert dyrbješe mustwo trochu přestajić, dokelž wrotar Wohlfeld a Šisler pobrachowaštaj zranjenja dla, Salewski bě chory. Domjacy chcychu najebać njelěpšiny dypkować a mějachu tež hnydom prěnju šansu. Nadběhowar Hermann pak třěli snadnje nimo wrotow (4.). Berlinjan Pelivan sčini to mjeńšinje po tym lěpje. Třělwa ze zdalenosće 22 metrow přizemi we wrotach Budissy. 350 přihladowarjow widźeše nětko mustwo, kotrež so wo spěšne wurunanje prócowaše. Bohužel trjechi Pfanne z hłójčkowanym bulom jenož łatu (23.). Mjeńšinu po tym wupomha sej samsny hrajer na tamnym boku z foulom w šěsnatce a sudnik pokaza na dypk­. Mlynikowski jědnatku wěsće přetwori. Krótko do přestawki poradźichu so hosćom samo hišće třeće wrota (43.). Eisele­ bě je po róžku z hłójčku docpěł.

wozjewjene w: Sport
póndźela, 26 septembera 2016 14:00

Stara garda worjołow dobyła

Koparjo mustwa starych knjezow Módro-běłych Kulow su lětuše mišterstwa Zapadołužiskeho koparskeho zwjazka dobyli. W poslednjej hrě sezony 2016 přesadźichu so worjoły doma přećiwo Natwarej Wojerecy z 3:0. Po tym přepoda jim staflowy nawoda Siegmund Heidrich (nalěwo) dobyćerski pokal. Foto: Werner Müller

wozjewjene w: Sport
póndźela, 26 septembera 2016 14:00

Lěhwo ćěkancow zawru

Calais (dpa/SN). Francoski prezident François Hollande je na swojim wopyće w přistawnym měsće Calais připowědźił, zo tamniše lěhwo ćěkancow doskónčnje zawru. Knježerstwo chcyło „tónle puć hač do kónca hić“, Hollande dźensa rjekny. W lěhwje njedaloko přistawa, kotrež mjenuja „Calaiski dźungl“, žiwori něhdźe 7 000 ćěkancow w hětach a stanach. Stajnje zaso někotři z nich spytaja, na nakładne awta do směra na Wulku Britanisku zalězć. Hižo spočatk měsaca běchu připowědźili, zo lěhwo rumuja.

Gerber: Brunica dale trěbna

Podstupim (dpa/SN). Braniborski hospodarski minister Albrecht Gerber (SPD) wočakuja po nastupje čěskeho inwestora EPH dołhodobnu perspektiwu za łužiske brunicowe jamy. „Češa su přeswědčeni, zo energijowa změna w Němskej wjele dlěje traje, hač sej to mnozy mysla. Tak wostanje brunica dale wubědźowanja- kmana“, praji Gerber dźensa w Berliner Zeitung. Nimo toho je brunica jako spušćomne a zapłaćomne energijowe žórło po lěće 2022 trěbna, hdyž poslednje jadrowe milinarnje w Němskej zawru.

Najwjetše wužadanje

wozjewjene w: Kraj a swět
Wulki nawal knježeše sobotu w Budyskej tworni wagonotwarca Bombardier. Na wšě 6 000 ludźi je sej na dnju wotewrjenych duri składnostnje 170. róčnicy wobstaća zawoda moderne produkciske připrawy wobhladało. Na testowej čarje móžachu wopytowarjo z nowej tramwajku sobu jěć. Mjez zajimcami bě tójšto něhdyšich sobudźěłaćerjow zawoda. Foto: Carmen Schumann

wozjewjene w: Łužica
póndźela, 26 septembera 2016 14:00

Mjezsobne wumjetowanja

New York (dpa/SN). Hladajo na dotal najćeše bombardowanje syriskeho města Aleppo dawaja sej Ruska a zapadne staty mjezsobnu winu na nowej eskalaciji wójny w Syriskej. Na wurjadnym posedźenju Bjezstrašnostneje rady UNO je francoski wulkopósłanc François Delattre knježerstwu w Moskwje wumjetował, zo ze swojej podpěru syriskemu mócnarjej Basharej al-Assadej wšitke prócowanja wo nowy přiměr w Syriskej blokuje. Ruski kolega Delattrea Witalij Čurkin wumjetowa- nja wotpokaza a so zakitowaše. Wón winowaše Washington, zo zběžkarjow w Syriskej dale podpěruje a tak swoje přilubjenja njespjelnja. „Syriskej měr přinjesć je mjeztym nimale njemóžno.“

wozjewjene w: Kraj a swět

Serbska debata

nowostki LND