Z wudaća: štwórtk, 01 decembera 2016

Po lońšej premjerje wotměja so jutře a sobotu druhi raz adwentne wiki w Pančičansko-Kukowskej klóšterskej bróžni. Stajnje wot 9 do 18 hodź. čakaja na wopytowarjow kreatiwne poskitki, pječwo z klóšterskeje pjekarnje, ryba z klóšterskich hatow a dźiwina z klóšterskeho lěsa. Poskićeć chcedźa tohorunja darjene hrajki, kotrež Thomas Karbe tule sortěruje. Foto: SN/Maćij Bulank

Zo by so gmejnske dźěło w gmejnje Ralbicy-Róžant najebać schorjenje wjesnjanosty a jeho naměstnika skutkownje dale wjedło, bě trjeba dalšeho a tak 2. naměstnika wjesnjanosty wuzwolić. Na minjenym posedźenju gmejnskeje rady dósta Róžeńčan Michał Šołta dowěru radźićelow a skutkuje přechodnje jako prěni muž gmejny. Nadawkow ma wokomiknje wjac hač dosć na blidźe. Najwažniši drje je tón, zaručić, zo budźe w Ralbičanskej šulskej kuchni wot 2. januara dale čerstwy wobjed warjeny a zo budu tež dotalni woteběrarjo dale zastarani. Wčera, srjedu, su nětko rozsudźili, zo rodźeny Peručan Alarcon Cardenas-Hančik, kiž je ze Serbowku w Boranecach woženjeny, kuchnju dale powjedźe. Dalši wažny nadawk Michała Šołty budźe rozsudźić, kak rjedźenje šule wot přichodneho lěta zaruča. Runje tak čakaja naležnosće nastupajo nowu pěstowarnju w Ralbicach, kormjernju swini blisko wsy a twarske ležownosće w Sernjanach na dalši postup.

Do jelenja zrazyła

Brězowka. 29lětna wodźerka VWja bě zawčerawšim na dróze z Brězowki do Běłeje Wody po puću, jako krótko do 18 hodź. jeleń na puć stupi. Młoda žona njemóžeše hižo zaborzdźić a zrazy do wulkeho skoćeća. Na awće nasta nahladna škoda 3 000 eurow. Jeleń zražku z wosobowym awtom njepřežiwi, šoferka so na zbožo njezrani.

1.12.–7.12.2016 Budyski filmowy palast: Underworld: Blood Wars w 3 D: wšědnje 19:30 | pj a so 22:15 Tini: Violettas Zukunft: wšědnje 14:45 (nimo nj) | nj 10:30 Arrival: wšědnje 19:45 (nimo pó a srj) | pj a so 22:15 Robbi, Tobbi und das Fliewatüüt: wšědnje 15:00 a 17:15 | nj 10:30 a 12:45 Pettersson und Findus: štw, pj, so a srj 15:15 | nj 10:30 a 13:00 Office­ Christmas Party: srj 19:45 Augsburger Puppenkiste: Die Weihnachtsgeschichte: wu 15:00 Phantastische Tierwesen: wšědnje 14:00 (nimo nj a wu) | wu 14:30 | srj 19:45 Willkommen bei den Hartmanns: wšědnje 17:15 (nimo pó) a 19:30 Sing w 3 D: nj 15:00 Die Vampirschwestern 3: nj 15:00 Phantastische Tierwesen w 3 D: wšědnje 16:45 a 19:30 (nimo srj) | pj a so 21:45 Trolls: wšědnje 17:15 Trolls w 3 D: nj 10:30 a 12:45 Jack Reacher: pj a so 22:00 Findet Dorie: nj 12:45

Kino-ekstra: El Olivo – der Olivenbaum:­ pó 14:30, 17:15 a 20:15

Lětsa skónči so hermank hižo šěsć dnjow do hód – to ma so změnić

Budyšin (CK/SN). 18. decembra so lětuše Budyske dohodowne wiki definitiwnje skónča. Za podlěšenje hač do 23. decembra njemóžachu dosć wikowarjow přeswědčić. Wo tym je wyši měšćanosta Alexander­ Ahrens (njestronjan) wčera čłonow měšćanskeje rady informował. „Někotři wikowarjo změja hinaše terminy, druzy dowol“, wón rjekny.

Wjacławske wiki skónča so tradicionelnje njedźelu do hód. Hakle šěsć dnjow pozdźišo je lětsa patoržica. Někotři radźićeljo sej hižo před tydźenjemi žadachu, wiki podlěšić. Město jako zarjadowar pak tak spěšnje zaskočić njemóže. Pod priwatnymi wuměnjenjemi by to jednorišo było. Tohodla město priwatnemu organizatorej žane kamjenje do puća kładło njeby. Samo wuwzaćne dowolnosće bychu móžne byli. Hakle wčera pak je Budyski hosćencar Manfred Lüdtke, kiž ma na adwentnych wikach hižo wjele lět předawanišćo a kiž chcyše podlěšenje organizować, wotprajił. Někotrym wikowarjam bě po wšěm zdaću přewobćežne, někotrych dnjow dla ze swojim předawanišćom přećahnyć.

Spale (HH/SN). Z mjeztym 2. Spalowskim dworowym adwentom su minjenu njedźelu na Prokschec ležownosći wjele dobrych idejow tamnišeho domizniskeho towarstwa zwoprawdźili. Při něhdźe tysac swěčkach a elektriskich swěcach kaž tež wjacorych mjeńšich lěhwowych wohenjach knježeše tam wulkotna atmosfera.

Na rozprawu wo dźěławosći ZSW zhladowane

Předsydstwo Zwjazka serbskich wuměłcow pokaza w swojej rozprawje na hłownej wólbnej zhromadźiznje 18. nowembra w Haslowje na dwulětne dźěło. Wobćežne bě, zo dyrbješe ZSW kóždolětnje wotnowa městno koordinatorki zaručić. Załožba za serbski lud je za to 60 procentow kóštow kryła. Tamne 40 procentow dyrbješe předsydstwo ZSW zarunać.

Tójšto projektow přewjedli

Při wšěm pytanju za sponsorami – ZSW je w zašłymaj lětomaj 47 043,08 eurow nazběrał – móžachu 40 wjetšich a mjeńšich projektow přewjesć. Wusahowacej běštej loni a lětsa 37. a 38. mjezynarodny swjedźeń poezije. Z nimaj bě so poradźiło, dóstać přistup do Drježdźanskeju literarneho domu wile Augustin a gymnazija swjateho Bena. Tam basnicy lětsa znowa wustupichu, prezentujo serbsku kulturu a literaturu.

Z diskusije na hłownej a wólbnej zhromadźiznje Zwjazka serbskich wuměłcow 18. nowembra w Haslowje:

Po rozprawje předsydstwa a rozprawach předsydow kołow spisowaćelow, two­rjacych wuměłcow a hudźbnikow wuwi so na hłownej wólbnej zhromadźiznje Zwjazka serbskich wuměłcow diskusija. Jako prěni bě so Jan Bělk, kiž chcyše za noweho předsydu ZSW kandidować, słowa jimał. Wón mjez druhim namjetowaše, zo měł so ZSW dale womłodźić, zo njebychu „za 15 lět zhromadźiznu zwjazka w Chróšćanskej starowni“ wotměć trjebali. Zdobom so hudźbnik a zastupjer ZSW w Zwjazkowym předsydstwje Domowiny prašeše, hač je ZSW scyła hišće trěbny? Jeho měnjenje k tomu rěkaše, zo je zwjazk předewšěm trěbny za komunikaciju mjez wuměłcami a za mjezsobnu zamołwitu dowěru. Trěbne su dale młódša generacija a ideja zhromadnosće kaž tež diskusija wo tym, za čo zhromadnosć trjebamy.

Wokrjesna wyša koparska liga

1. ST Ćisk  12 45  :  6 36

2. Rakečanske ST 13 35  :  21 25

3. Sokoł Ralbicy/Hórki 13 34  :  17 23

4. SC Großröhrsdorf 13 17  :  9 23

5. Póst Germ. Budyšin 13 24  :  24 21

6. ST Kinspork/Łužnica 13 28  :  21 20

7. Módro-běli Kulow 13 26  :  21 19

8. Motor Kumwałd 13 23  :  27 19

9. ST Hnašecy-Dobruša 12 24  :  25 18

10. Wojerowski FC 13 24  :  27 16

11. LSV Hory  13 33  :  25 15

12. Drohotka Ramnow 13 20  : 26 13

13. FV Ottendorf-Okrilla  13 17  :  34 12

14. TSV Połčnica  13 19  :  31 11

15. Zeleno-běli Bukecy 13 21  :  45 10

16. ST Wjelećin 13 20  :  51 5

Tydźenja podachu so volleybalisća ST Marijineje hwězdy do Chróstawy. Tam čakaše nowačk wokrjesneje klasy na nich a na Budyskich Sokołow. To bě potajkim prěnje zetkanje z ST Chróstawu, ale zdobom tež serbski derby mjez Pančičanami a Sokołami.

ST Chróstawa – Sokoł Budyšin 2:1 (25:21, 23:25, 15:6)

Nowačk wokrjesneje klasy bě jara motiwowany, jako započa z prěnjej hru dnja. Sokoljo pak nochcychu so podać a móžachu po zastatku 4:11 hišće na 13:14 skrótšić. Wothladajo wot toho pak mějachu problemy při nadběhu a nadaćach, tak zo hosćićel prěnju sadźbu doby. W druhej so Budyšanscy hrajerjo hišće bóle napinachu, móžachu z młodym mustwom sobudźeržeć a na kóncu dźakowano někotrym zmylkam hosćićela sadźbu samo dobychu. W tiebreaku pak njedachu so Chróstawčenjo zamylić. Sylne nadběhi a nadaća njemóžachu Sokoljo wotwobarać a podležachu 6:15.

Sokoł Budyšin – ST Marijina hwězda 0:2 (16:25, 18:25)