Z wudaća: pjatk, 02 decembera 2016

„Što šubut wě?“ rěka dźěćacy musical, kotryž předstaji Serbski ludowy ansambl jako překwapjenku k swj. Mikławšej wutoru, 6. decembra, w 17 hodź. na žurli SLA. W hrě šubut druhim ptačkam pomha, w zymnym lěsu přežiwić. Foto: Matthias Hultsch

Pjatk 2.12. a 3.12.  Adwentne wiki w bróžni Pančičansko-Kukowskeho klóštra Marijineje hwězdy

Sobotu 3.12. 9:00 Adwentne wiki w Kulowje

  9:00 Wuradźowanje iniciatiwy Serbski sejm w Njebjelčicach

  14:00 Ćišćanske adwentne wiki

  14:00 Adwentne wiki w Rakecach

  16:00 Klankodźiwadłowe předstajenje NSLDź „Ferkel, hunčo a prosetko“ w Drježdźanskej Waldorfskej šuli

  16:00 Dohodowny koncert Serbskeje zakładneje šule Ralbicy w tamnišej sportowni

  19:30 Beneficny koncert muskeje spěwneje skupiny PoŠtyrjoch w Jasčanskej Rynčec bróžni

Njedźelu 4.12. 10:00 Poprjančkipječenje za dźěći w Rěčicach

  14:00 Adwentny hermank ze Slepjanskim serbskim dźěćetkom při cyrkwi w Slepom

  15:00 Swójbne popołdnjo wokoło fotografije pod hesłom „To smy my! Nowe foto za swójbny album“ w Budyskim Serbskim muzeju

  16:00 Adwentny nyšpor Radworskeje wotnožki Budyskeje hudźbneje šule w Minakałskej cyrkwi

  16:00 Adwentne wiki we Worklecach

Póndźelu 5.12. 18:00 Zarjadowanje na temu „Kak kriminelna je Sakska“ w Budyskej statnej studijnej akademiji

  19:00 Mikławšowy volleyballowy turněr w Chróšćanskej „Jednoće“

Njedźelu, hornjoserbsce

11:00 Łužica tutón tydźeń, mjez druhim wo hłownej zhromadźiznje Kulowskeho Bratrowstwa

11:20 300 lět Sorabija Lipsk

11:45 Adwentne woknješko

12:00 Nabožne wusyłanje

 (Beno Jakubaš)

  po tym zbožopřeća

delnjoserbsce

12:30 Aktualny magacin, mjez druhim wo adwentnej protyce

13:00 Serbski adwentny koncert RBB 2015 w Slepom

13:30 Nabožne wusyłanje

 (Hartmut Leipner) 

 po tym zbožopřeća

Dlěje hač 20 lět je Bjarnat Cyž mjeztym jednaćel Domowiny. Kónc lěta poda so Nowojasčan na wuměnk. W swojim přichodnym wusyłanju jutře, 3. decembra, w 11.30 hodź. na MDR zhladuje hornjoserbski telewizijny magacin Wuhladko na jeho wjelelětne skutkowanje a přewodźa Cyža na jednym z jeho poslednich terminow jako jednaćel Domowiny. Dale rozprawjeja we wusyłanju wo atomowych raketach za čas NDR w Tuchorskim lěsu, wo serbskich ratarjach a hodownych husycach a wo pisanym programje na schadźowance.

Na swójbne předstajenje

Drježdźany. Po mjeztym dobrej tradiciji poda so Němsko-Serbske ludowe dźiwadło do sakskeje krajneje stolicy, zo by tamnišim serbskim dźěćom a swójbam z inscenaciju rjane popołdnjo wobradźiło. Tak přeprosy lětsa zhromadnje z towarstwom Stup dale na trojorěčne klankodźiwadło „Ferkel, hunčo a prosetko“. Wone budźe jutře, 3. decembra, w 16 hodź. na žurli swobodneje Waldorfskeje šule na Jägerowej w Drježdźanskim nowym měsće. Po předstajenju přeproša Stup dale na adwentničku.

Wuhotuja beneficny koncert

Jaseńca. Skupina PoŠtyrjoch a Florian Rynč přeprošataj jutře na mjeztym hižo šesty beneficny koncert do Jaseńcy. Wot 19.30 hodź. dožiwja wopytowarjo we wutepjenej Rynčec bróžni skupiny PoŠtyrjoch, Přezpólni a PoŠtyrjoch&Fränz (=&friends). Po koncerće přizamknje so spěwny wječor. Wunošk wječora je lětsa za dźěło Towarstwa swjateje Filomeny. Organizatorojo nadźijeja so bohateho wopyta.

W muzeju fotografować

Šlagrowy koparski duel žonow

Žonjace mustwo krajneho koparskeho ligista, Biskopičanskeho KT, hraje njedźelu wot 14 hodź. doma na kumštnym trawniku přećiwo holcam RB Lipska. Druhi tabulki, pola kotrehož hraja tež někotre žony Serbskeje koparskeje wubranki, wočakuje prěnjeho. Wobaj cyłkaj stej hišće bjez poražki.

Volleyballowy turněr

Póndźelu, 5. decembra, wuhotuje wólnočasny volleyballowy cyłk SJ Chrósćicy Mikławšowy volleyballowy turněr za mustwa, kotrež hraja na ludosportowym niwowje. Přeprosył je sej pjeć cyłkow z Budyšina, Kulowa, Radworja, Worklec a měšany cyłk abiturneho lětnika 1996. Prěnja hra započnje so w 19.15 hodź.

Dalekubłanje sudnikow

Zapadołužiski koparski zwjazk poskići wukubłanym koparskim sudnikam dźensa wot 19 hodź. w Frankenthalu dalše, mjeztym třeće zarjadowanje, kotrež sudnicy za spjelnjenje respektiwnje po­dlěšenje licency trjebaja.

Showprogram ćěłozwučowarkow

Njedźelu, 4. decembra, pokazaja ćěło­zwučowarki Jednoty Kamjenc w sportowej hali při lětanišću hodowny showprogram, kotryž započnje so w 15 hodź. a ma něhdźe dwě hodźinje trać.

Adwentnička bě zawčerawšim lětuše poslednje zarjadowanje Domowinskeje skupiny Pančicy-Kukow. W „Starej hospodźe“ do­žiwi něhdźe 50 skupinarjow program dźěći a młodostnych Šołćic a Krawcec swójby z adwentnymi a hodownymi pěsnjemi kaž tež z instrumentalnymi štučkami. Smolerjec kniharnja je wuběr serbskich knihow poskićiła. Po zhromadnej wječeri knježeše čiła­ serbska bjesada, při kotrejž zrodźichu tež někotre ideje za přichodne skupinske dźěło. Foto: Marian Wjeńka

Z prašenjom wotwodźowanja wopłóčkow so w Njebjelčanskej gmejnje po wšěm zdaću hižo zaběrać trjebać njebudu. W Njebjelčicach su nětko poslednje domjacnosće centralnej wopłóčkowej syći přizamknjene.

Njebjelčicy (HS/SN). Jako posledni puć Njebjelčic je Lipowa wot srjedy oficialnje wodočisćerni w Němskich Pazlicach přizamknjena. Dźewjeć ležownosćow přewostaja swoje wopłóčki nětko zaměrowemu zwjazkej Horni Čorny Halštrow (AZV OSE). 12. septembra bě Wósporska hłubokotwarska firma dźěłać započała a je jenož tydźeń pozdźišo hač planowane wšitko dočiniła. Za naležnosće wobydlerjow Lipoweje mějachu twarscy dźěłaćerjo wjele zrozumjenja a pomhachu jim tež z fachowej radu, wšako dyrbjachu swoje domy w swójskej režiji domjacemu šachtej přizamknyć.

Na Lipowej su dohromady 190 metrow rołow z přeměrom 20 centimetrow składli a dalše 65 metrow domy přizamkowacych rołow. Zaměrowy zwjazk za wopłóčki je něhdźe 116 000 eurow inwestował. Tež Zwjazk a Swobodny stat Sakska so na financowanju wobdźělištej.

Wobydlerjo a gmejna maja wobmyslenja nastupajo rozšěrjenje kormjernje

Ralbicy (SN/MWj). Z wulkimi wočakowanjemi, ale tež z měšanymi začućemi zhladuja Ralbičenjo na 12. december. Tón dźeń budu wot 13 hodź. w Kamjenskej wotnožce krajnoradneho zarjada (stwa 240) zjawnje wotwažować zapodaća nastupajo rozšěrjenje Ralbičanskeje kormjernje swini. Při tym steji jednanje po zakonju wo škiće imisijow w srjedźišću – potajkim smjerd, hara, wobswětoškit atd.

Ratarske předewzaće z Zschäschütza (město Döbeln) jako mějićel chce kapacitu kormjernje wot nimale 7 000 na wjace hač 11 000 swini rozšěrić. Z tym zwja­zane su wobšěrne twarske změny. Tak chcedźa tři stare chlěwy, překładowansku rampu a dalše připrawy wottorhać. Nowe nastanu dwaj, stajnje z dweju dźělow­ wobstejacej chlěwaj, zběrnikaj za hnójnicu a dwaj sili za picu. Institut z Frankenberga je w swojim posudku zwěsćił, zo z předewzaća žane bytostne poćežowanja wočakować njejsu.

Jěžikej žiwjenje wuchowała

Budyšin. Nic jenož jako přećel a pomocnik ludźi we wšitkich žiwjenskich połoženjach, ale tež zwěrjatow je so policija tele dny w Budyšinje wopokazała. Zbožo w njezbožu měješe tule zawčerawšim popołdnju­ jěžik. Po tym zo bě wón po wšěm zdaću swoju mać zhubił, namaka jeho wječor policistka Budyskeho policajskeho rewěra na Seminarskej, jako bě runje po swjatoku na dompuću. Zastojnica­ jěžikej žiwjenje před sněhom a zymu wuchowa. Po jednej nocy w ćopłym, zastaraneho ze synom a picu za kóčki, dowjezechu kałačikateho štyrinohača do zwěrjatku wotpowědneho domicila w Biskopicach, hdźež móže nětko bjez stracha přezymować.