Z wudaća: štwórtk, 19 januara 2017

Hajnik rewěra Kuty (Hermannsdorf) pola Běłeje Wody Hubertus Scammel ma tež w zymje ruce połnej dźěła. W prěnim kwartalu 2017 chcedźa strukturu lěsow wokoło Běłeje Wody změnić a w chójninach mjez druhim duby sadźeć. Za druhi kwartal přihotuje rewěrowy hajnik 42 hektarow lěsa, hdźež chcedźa štomy pušćeć. Te Hubertus­ Scammel tele dny woznamjenja. Nimo toho ma při tym wjace městna za lěsnisku­ techniku nastać. Foto: Joachim Rjela

Za lětuše inwesticije trjeba Rakečanska gmejna sčasom schwaleny hospodarski plan. Zo wo tym hižo na januarskim posedźenju rěča, je za hornjołužiske komuny skerje njezwučene.

Rakecy (JK/SN). Njemało so Rakečanscy gmejnscy radźićeljo dźiwachu, zo steješe na dnjowym porjedźe jich wčerawšeho prěnjeho wuradźowanja w nowym lěće diskusija wo lětušim hospodarskim planje. Wjesnjanosta Sven Nowotny (CDU) wopodstatni zažny termin z wobšěrnymi lětušimi inwesticijemi, za kotrež je trěbny schwaleny hospodarski plan.

Tak maja lětsa planowane, ponowić sanitarne připrawy zakładneje šule, cyrkwinske naměsto kaž tež wobnowić a rozšěrić wobswětlenje na přemysłowej přestrjeni při Jitkowskim puću a ponowić Žorawjowy puć w Psowjach.

Wojerowske zastaranske zawody planuja lětsa wobšěrne inwesticije

Wojerecy (AK/SN). Wojerowske zastaranske zawody (VBH) planuja lětsa z cyłkownym budgetom 5,5 milionow eurow. „Z toho je 3,6 milionow eurow za inwesticije a 1,9 milionow eurow za wudźeržowanje“, rozłožuje jednaćel VBH Steffen Grigas. „Na tymle niwowje planujemy tohorunja­ za přichodne lěta.“

Dohromady 4,2 milionaj eurow stej předwidźanej za ponowjenje najwšelakorišich milinowodow, wodowodow a wopłóčkowych kanalow. Wažne ćežišćo při tym je wotrězk mjez Grodkowskim a Budyskim mostom nad Čornym Halštrowom. „Krajne zarjadnistwo rěčnych zawěrow (LTV) přeměstni tam nasyp. Za to dyrbimy něhdźe 350 metrow wodowoda přepołožić. Nalěto maja so dźěła zahajić, za kotrež planujemy 430 000 eurow“, wuswětla­ wotrjadnik VBH Bernd Holst. Za čas twarskich dźěłow połoža tam ­narunanski wodowód. Wotrězk mjez mostomaj mjenuje Bernd Holst „wažnu žiłku“ w syći VBH, wšako wjedźe wona dale do Kulowa a Skaskowa. Ponowić chcedźa Wojerowske zastaranske zawody tež 250 metrow wodowoda w Ćisku.

Smochćicy (SN). Mjeztym 14. raz wotměje so wot 8. do 12. februara w Smochćicach zymska akademija, kotruž katolska akademija Drježdźansko-Mišnjanskeho biskopstwa a Dom biskopa Bena zhromadnje zarjadujetej. Rozpad statow kaž Iraka a Syriskeje a z tym zwisowace ­wojerske konflikty wjedu k prašenju, ­kotru rólu njeislamske mjeńšiny přichodnje změja a hač scyła přežiwja. Póńdźe předewšěm wo křesćanow, kotřiž su po muslimach z wotstawkom najwjetša ­nabožinska skupina a su sylnje přesćěhani.

Cyrkwje orienta, wosebje te, kotrež njesłušeja ke grjeksko-ortodoksnym, su pola nas lědma znate. Jich stawiznam, přitomnosći a nabožnemu žiwjenju so zymska akademija lětsa wěnuje. Za nju su wěcywustojnych referentow zdobyli. Tak předstaji dr. Gisa Bauer cyrkwje a konfesije křesćanstwa po wšěm swěće; dr. Dirk Ansorge rozłoži nastaće, stawizny a teologiju cyrkwjow orienta; wo aktualnej situaciji křesćanow w orienće rozprawja dr. Matthias Vogt.

Pod alkoholom do sněha

Załom. Kontroli policije wuwinyć spytał je so w nocy na srjedu wodźer transportera. Zastojnicy chcychu muža blisko Załomja­ zadźeržeć, tón pak stupi na płun a najprjedy po hłownej dróze, pozdźišo po zasněženym pólnym pućiku ćěkaše. Tam pak w sněze tčacy wosta. Policistam so spěšnje wujasni, čehodla bě 36lětny ćeknył. Pola njeho naměrichu 1,92 promilow alkohola w kreji.

Z nožom hrozył

Jenkecy. Staršej 34lětneho muža woła­štaj wutoru wječor policiju a wucho­wansku słužbu k sebi domoj do Jenkec w Kubšiskej gmejnje. Kaž zdźělištaj, bě jeju syn dospołnje wopity w domje randalěrował a jimaj z nožom hrozył. Policisća renitentneho muža změrowachu a zwěsćichu pola njeho 1,8 promilow alkohola w kreji. Na přikaz krajnoradneho zarjada zapokazachu 34lětneho do fachoweje chorownje.

Z toboły so handy zhubił

Njeswačidło (SN). Štóž njeje dotal přewšo zajimawu přehladku metalowych hrajkow a parnicow w Njeswačanskim domizniskim muzeju widźał, změje přichodnu njedźelu, 22. januara, poslednju składnosć, tole nachwatać. Na to skedźbnja tamniše towarstwo Přećeljo domizny a kultury. Wot 13 hodź. steja wustajene parnicy tón dźeń pod paru. Wone ćěrja frezawy, piły a druhe mašiny. Wosebita atrakcija je hoberske koło. Tež wone budźe so njedźelu wjerćeć.

Wustajer Matthias Stein z Budyšina swoje eksponaty njedźelu tež rady rozkładźe a na prašenja wotmołwi. Team muzejownikow wjeseli so na prawje wjele wopytowarjow. Wot póndźele změje muzej potom zymsku přestawku.

19.1.2017–25.1.2017 Budyski filmowy palast: xXx – Die Rückkehr des Xander Cage w 3 D: wšědnje 17:00 a 19:30 (nimo so a srj) | so a srj 20:00 | pj 22:00 | so 22:30 Kundschafter des Friedens: so 18:00 Ritter Rost 2: wšědnje 16:00 | pj, so, nj a wu 14:00 | nj 12:15 Feuerwehrmann Sam: nj 12:45 Wendy: nj 15:00 Mein Blind Date mit dem Leben: srj 19:45 The Great Wall w 3 D: wšědnje 19:45 (nimo srj) | pj a so 22:15 Passengers: wšědnje 17:00 (nimo pó) a 19:30 (nimo pó) Vier gegen die Bank: wšědnje 20:30 | pj a so 22:30 Assassin’s Creed w 3 D­:­­ pj a so 22:00 Rogue One: A Star Wars Story w 3 D: wšědnje 17:00 (nimo so) Vaiana: pj, so, nj a wu 14:30 | nj 12:15 Phantastische Tierwesen: pj, so, nj a wu 14:15 Willkommen bei den Hartmanns: wšědnje 18:00 Sing: pj, so a wu 14:30 | nj 12:30

Kino-ekstra: Swiss Army Man:­ pó 17:15 a 20:15

W Sakskej wjace insolwencow

Drježdźany. W Sakskej je loni ličba plajtow předewzaćow přiběrała, hinak hač po wšej Němskej. Kaž hospodarska naprašowarnja Bürgel zdźěla, je 1 099 firmow insolwencu přizjewiło, to je 6,7 procentow wjace hač lěto do toho. Z 73 plajtami na 1 000 předewzaćow leži Sakska snadnje nad cyłoněmskim přerězkom. Po wšej Němskej je ličba plajtow wo 6,2 procentaj woteběrała.

Nóc chětro zymna była

Lipsk. Minjena nóc bě w Sakskej, Saksko-Anhaltskej a Durinskej chětro zymna. Najsylniši zmjerzk w Sakskej naměrichu z minus 19,2 stopnjomaj w Deutsch­neudorfje, informuje Němska wjedrarnja w Lipsku. W Bad Elsteru bě minus 18,6 a w durinskim Veilsdorfje minus 16,8 stopnjow zyma. Tež přichodne dny nas zmjerzki dale přewodźeja.

Wódne ptaki ličili

Praha. Kaž stajnje druhi kónc tydźenja w januaru je tež lětsa wjace hač 400 profesionalnych a amaterskich ornitologow wódne ptaki w Čěskej ličiło. Na tradicionalnej akciji wobdźělichu so tež škitarjo přirody a skawća. Za ličenje ptačiny w Europje je runje januarski čas idealny, dokelž so ptaki we wulkich mnóstwach hromadźa.

Budyšin (SN/BŠe). Předsyda Němskeho zwjazka dźěłarnistwow (DGB) Reiner Hoffmann je so dźensa w Budyskim zawodźe koncerna Bombardier ze zawodnej radu a nawodnistwom stejnišća zetkał. „W Budyšinje dźěłaja wysoko kwalifikowani a motiwowani fachowcy“, wón podšmórny. Skedźbni pak tež na tuchwilny njeměr přistajenych hrožaceho wottwara dźěłowych městnow dla. Šansa za zawod je, do přichoda inwestować, wšako skića nowe formy mobility perspektiwu. Tole njeměł management koncerna Bombardiera zapasć. Za wažne Hoffmann runje tak ma, zo měła na přikład Němska železnica němskim stejnišćam Bombardiera nadawki dawać a je nastupajo nowe koncepty mobility zapřijeć.

Najebać tuchwilnu ćežku situaciju móže sej zawodna rada Budyskeho stejnišća přichod předstajić. „Politikarjo z přizwolenjom spěchowanja kaž tež nawodnistwo koncerna Bombardier měli ideje zastupjerjow přistajenych podpěrać“, Reiner Hoffmann potwjerdźi.

Kwalifikacija je a wostanje wažna

Budyšin (SN/MiR). Bjez wotzamknjeneho studija wučerstwa njeje zajimcam móžno na jednej sakskej šuli wuwučować. Tele postajenje hižo njepłaći. Ně­hdźe 1 300 wučerjow wšitkich šulskich družin budźe přichodnje kóžde lěto po cyłej Sakskej pobrachować. Tohodla při­stajeja tule mjeztym wulku ličbu přidružnikow. Wjetšina z nich njeje hišće jako wučer skutkowała, ma pak wysokošulske wotzamknjenje jednoho abo samo dweju studijnych směrow.