Z wudaća: pjatk, 20 januara 2017

Štóž chce sej něšto w Budyskej Serbskej kulturnej informaciji wobstarać, ma tele dny špatne wuhlady. Kaž zdźěli za SKI zamołwita sobudźěłaćerka Załožby za serbski lud Michaela Mošowa na naprašowanje SN, wostanje SKI hač do 29. januara zawrjena. Přičina je nimo inwentury, kaž z informacije při durjach wuchadźa (hlej foto), choroba sobudźěłaćerjow. Tuchwilu ma jenička při­stajena inwenturu zmištrować, štož swój čas traje. 30. januara pak SKI w přizemju Budyskeho Serbskeho domu zaso wote­wru, rěka ze zarjada załožby. Foto: SN/Maćij Bulank

Pjatk 20.1. 19:00 Premjera ptačokwasneho programa SLA w Choćebuskim Delnjoserbskim gymnaziju

  19:45 Čitanski wječork z Lipšćanskej awtorku Aniku Mehner w Chróšćanskej putniskej hospodźe

Sobotu 21. a 22. 1.  Regionalne mišterstwa w nordiskim a alpinskim sněhakowanju kaž tež w biatlonje w Załomju

  10:00 Dźeń wotewrjenych duri na wyšej šuli Kulow

  18:30 Ptači kwas SLA w Hochozy

  19:30 Wosebity koncert k nowemu lětu w Budyskim Serbskim muzeju

  20:00 Započatk programa na jolka-swjedźenju w Nuknicy

Njedźelu 22.1. 10:00 Politiske rańše piwko na temu „Móc nowych medijow“ w Kamjenskim měšćanskim dźiwadle

  11:00 Narodninski swjedźeń za Lessinga w Kamjenskim měšćanskim dźiwadle

  16:00 Předstajenje „Jědźk a lěnjoch“ lajskeje dźiwadłoweje skupiny Kulowskeho Bratrowstwa pola Dinarjec­ w Nowoslicach (wot 15 hodź. kofej)

  16:00 Wosebity koncert k nowemu lětu na Wojerowskim hrodźe

  16:00 Ptači kwas SLA w Nowej Niwje

  18:00 Dźakny koncert zwjazkarstwa Budyšin wostanje pisany ze skupinu Strom & Wasser w Budyskim zetkanišću TiK

  19:00 Nóc musicalow we Wojerowskej Łužiskej hali

Póndźelu 23.1. 10:00 Wodźenje po Budyskej měšćanskej bibliotece

njedźelu, hornjoserbsce

11:00 Łužica tutón tydźeń, mjez druhim z powěsćemi tydźenja

11:20 Filmowc Toni Bruk

11:45 Hudźba k njedźeli

12:00 Nabožne wusyłanje

 (farar Tomaš Dawidowski)

po tym zbožopřeća

delnjoserbsce

12:30 Aktualny magacin z powěsćemi a wo ptačokwasnym programje SLA „Dejmantne a druhe ptaški“

13:00 Tematiske wusyłanje: Do Pratyje 2017 hladane

13:30 Nabožne wusyłanje

 (Bernd Pittkunings)

po tym gratulacije

Choćebuz (SN). Ćežišćo januarskeho delnjoserbskeho magacina Łužyca jutře w 13.30 hodź. w RBB budźe dźeń wote­wrjenych duri na Delnjoserbskim gymnaziju w Choćebuzu. Jedne z prašenjow je: „Kelko serbskeho šula znjese?“ W satiriskim přinošku domownika Šybalika póńdźe wo potajne kontakty do USA.

Na jolka-swjedźeń

Nuknica. „Egyptowska – Kleopatra a horcy pěsk“ rěka hesło lětušeho jolka-swjedźenja, na kotryž NuPraKo a wjesny klub Nuknica hosći do wsy přeprošatej. Swjedźeń wotměje so jutře, 21. januara, w Brězanec bróžni. Zastup budźe wot 18 hodź., program započnje so w 20 hodź. Po zwučenym wašnju přizamknje so wohnjostroj. K rejam piska skupina SerBeat. Wo napoje a dobroty ze swinjorězanja staraja so tohorunja hosći­ćeljo.

Dźeń wotewrjenych duri

Kulow. Jutře, 21. januara, wita Kulowska wyša šula „Korla Awgust Kocor“ šulerjow přichodneho 5. lětnika a jich staršich w času wot 10 do 13 hodź. na dźeń wotewrjenych duri. W 10 hodź. je witanje we wulkej hali, a to z mnohimi poskitkami šulerjow: wólnočasne zaběry, sport, hudźba a dohlad do wšelakich předmjetow. Po tym móža so starši ze swojimi dźěćimi po fachowych kabinetach šule rozhladować. Rady witaja w kubłanišću tež šulerjow, kotřiž chcedźa so na serbskej wučbje wobdźělić.

Wosebity koncert

Turněr při wysokim saku

Kulowscy wólnočasni volleyballisća TSV Žołto-módrych Kulow zarjaduja póndźelu, 30. januara, w sportowej hali turněr ze šěsć prošenymi cyłkami. Přihladowarjo pak su lubje witani. Hry započnu so w 19.15 hodź.

Pawk přeproša na kopańcu

Serbske młodźinske towarstwo Pawk přeproša zajimowane mustwa na halowy koparski turněr, kotryž budźe sobotu, 4. februara, w Radworskej sportowej hali. Startowy pjenjez na mustwo wučinja 15 eurow, maksimalnje dźesać cyłkow smě so wobdźělić, dwě městnje hišće stej. Hrate budźe z jednym wrotarjom a štyrjomi pólnymi koparjemi. Hry nawjedować budu Lea Krječmarjec, Anna Richterec a Lukaš Kolca. Zakop budźe w 17 hodź.

W hali za bulom honić

Biskopičanske koparske towarstwo přewjedźe w zymskej přestawce wjacore halowe koparske turněry. Wone budu wot 17. do 19. februara a wot 24. do 26. februara w Biskopičanskej sportowej hali Wesenitz. Mustwa smědźa so hišće přizjewić, startowy pjenjez wučinja 30 eurow. Naprašowanja prošu Tinej Gottlöberei pod: abo pod tel. čo. 0152/27939516.

17.02. 18:00 młodźina A

18.02. 9:00 młodźina C

18.02. 15:00 młodźina B

19.02. 14:30 žónske cyłki

Zdźěrjan Tobias Rucha Stara so za jewišćom wo prawy programowy wotběh

Zetkam jeho na žurli Serbskeho ludoweho ansambla w Budyšinje. Hromadźe z koleginu Kristinu Neradowej sćěhuje 51lětny Tobias Rucha probu za dohodowny program „Patoržica so bliži“. Chór SLA zwučuje runje z komornym orchestrom pod nawodom Dietera Kempy spěw „Přadła je Marja“. Na generalce dźiwa dirigent hišće raz na wšě móžne maličkosće, zo bychu chórisća a hudźbnicy pěseń wuměłsce korektnje přednjesli. Inspicient a čłon KBB – wuměłstwoweho zawodneho běrowa SLA – wobkedźbuje programowy wotběh a pisa sej wšelake noticy, na čož ma pozdźišo za jewišćom dźiwać a kedźbować.

Wjerch Herrmann Pückler-Mužakowski (1785–1871) słuša do najwuznamnišich wosobinow Łužicy, wšako bě wón sławny twórc parkow, rady čitany­ pućowanski spisowaćel a swětodundak. Rěkachu jemu tež „zeleny wjerch“, a wo nim bu tójšto knihow napisanych. Pückler bydleše w Mužakowje a pozdźišo w Rogeńcu pola Choćebuza wosrjedź serbskeho ludu, na čož pak awtorojo­ spisow wo nim njedźiwaja. Tohodla je z wulkej zasłužbu Choćebuskeho muzejownika Wernera Měškanka, zo je jara dokładnje a wobšěrnje wo poćahach wjercha a jeho prjedownikow k Serbam slědźił a wo tym tule předstajenu jara­ zajimawu knihu w delnjoserbšćinje spisał. Šula za delnjoserbsku rěč a kulturu Choćebuz wuda loni 114 stron wopřijacy wysokoformatny spis.

Paternoster 7 w Ludowym nakładnistwje Domowina wušoł

Mjeztym hižo sedma zběrka tekstow młodych awtorow Paternoster, kotraž je spočatk decembra w Ludowym nakładnistwje Domowina wušła, skići wospjet zajimawy kaž tež wjele lubjacy zarys tworjenja serbskeho pisaceho dorosta. W sydom tematisce, to pak njedogmatisce, potajkim skerje njekruće rjadowanych wotrězkach namaka so někotražkuli wuměłska chłóšćenka načasneje lyriki a krótkoprozy.

Pjeć lět w Syriskej mjeztym surowa wójna howri. Nimo hoberskeje ličby čłowjeskich woporow niča tam tež lěttysacy stare kulturne herbstwo. Kajke kulturne pokłady to su a čehodla to nas tak­ hnuje, wo tym je so młoda Chróšćanka Marija Suchec rozmołwjała z něhdyšim direktorom Muzeja za islamske wuměłstwo w Berlinskim Pergamon­owym muzeju prof. dr. Clausom-Peterom Haasu, kiž je 15 lět archeolo­giske wurywanja w Syriskej nawjedował.

Čehodla je politiska situacija w Syriskej tak eskalěrowała?

Prof. Haase: W kraju přez lětdźesatki diktatura knježi, a jenož jednotliwcy z toho­ profituja. Z wulkim přirostom ludnosće wuwi so socialna a hospodarska njerunosć. Nětko so tež ekstremistiske skupiny nutř měšeja.

W medijach słyšimy, zo niča tam kulturne pomniki a rubja muzealne objekty?