Z wudaća: wutora, 23 meje 2017

Stara koparska garda Sokoła Ralbicy/Hórki je minjeny pjatk hru wo zaćah do finala wo wokrjesny pokal přećiwo Módro-běłym Kulow 0:1 přěhrała. Rozsudne wrota docpě Christian Noack w 70. min. Na wobrazu widźimy běhanski duel mjez Tobiasom Čórlichom (nalěwo, Ralbicy) a Marcelom Markom (čisło 17, Kulow). Foto: Werner Müller

wozjewjene w: Sport
wutora, 23 meje 2017 14:00

Pakoßnick wšitke wrota třělił

ST Marijina hwězda

– ST Drjewnica 3:0 (1:0)

Zestawa domjacych: O. Schmidt – Wróbl, Škoda, Łušćanski, Lipič, Peschmann, T. Jurš (88. Matik), Hawš, P. Schmidt, Pakoßnick (85. Hübner), D. Jurš

Dalšu hru přećiwo hrožacemu zestupej mějachu koparjo ST Marijineje hwězdy njedźelu doma přećiwo Drjewnicy. Zhromadny mustwowy wukon wjedźeše k zasłuženemu 3:0. Třělc wšitkich wrotow bě Jakob Pakoßnick. Wjacore šansy w prěnim połčasu na woběmaj stronomaj ničo njewunjesechu. Krótko do přestawki pak nastachu prěnje wrota. Na lěwym boku bě so Paul Schmidt pře­drěł a bul Pakoßnickej wotpołožił. Tón suny hrajny nastroj nisko k 1:0 (43.) do saka.

wozjewjene w: Sport
wutora, 23 meje 2017 14:00

Turněr wuspěšnje zakónčili

Sezonu 2016/2017 we wobwodnej lize je volleyballowe mustwo Viktorije Worklecy na druhim městnje zakónčiło a so minjeny kónc tydźenja na wyšoklasowy turněr do Zhorjelca podało. Zarjadowar a wuhotowar bě sportowe towarstwo VfB Zhorjelc.

Na třoch rozdźělnych turněrach (žony, dwójce mužojo) wojowachu sportowcy dwaj dnjej wo dypki a dobre zaměstnjenja. Pola muži su samo něhdyši volleyballisća z prěnjeje zwjazkoweje ligi sobu hrali. Tak běše nadawk za Worklečanow chětro naročny. Z pomocu zboža při loso­wanju mějachu woni wjacorych znatych w skupinje. Jako prěnjej w předkole poradźi so Viktoriji zaćah do finalneje skupiny (final five). To na tymle wurisanju hišće ženje docpěli njeběchu. Z rjanymi akcijemi a dobrej naladu samo w tutej sylnej skupinje wobstachu. Zo za nich na kóncu bronzowa medalja wuskoči, njebychu sej do turněra myslili. Tež přećiwo absolutnym faworitam móžachu jednu sadźbu dobyć a wubědźichu sej 3. městno.

wozjewjene w: Sport
wutora, 23 meje 2017 14:00

Doma njeporaženi wostali

SJ Chrósćicy

– SG Weixdorf 1:1 (1:1)

Zestawa domjacych: Králíček – Pöpel, Cyž, Sentivan, Šafář, M. Zahrodnik, Henčl (86. Kunze), Runt, F. Zahrodnik (72. Šmit), Žur (62. Młynk), Věchet

wozjewjene w: Sport
wutora, 23 meje 2017 14:00

Wuslědki (23.05.17)

Krajna koparska klasa

Chrósćicy– Weixdorf1:1 (1:1)

Biskopičanske KT II – Mužakow 0:4 (0:2)

1. Radebeulski BC 22 55  : 18 56

2. Čerwjeno-běli Mužakow 22 53  : 29 48

3. Laubegast 22 60  : 31 45

4. FC Neugersdorf II 21 54  : 27 37

5. FSV Nowosólc-Hródk 22 48  : 37 36

6. Nowe Město  22 43  : 43 31

7. SJ Chrósćicy 23 35  : 37 30

wozjewjene w: Wuslědki
wutora, 23 meje 2017 14:00

Stat njetrjeba miłosćiwy być

Lipsk (B/SN). Křesćan być a politisce jednać stej nahladaj, kotrejž so po słowach zwjazkoweho nutřkowneho ministra Thomasa de Maizièra (CDU) hdys a hdys spřećiwjatej. „Pokazuja so wěste konflikty“, rozłoži de Maizière nowinje Bild, „stat funguje po zakładnym principje sprawnosće, nic po principje miłosće. Wotsunjenja njejsu na přikład miłosćiwe, su pak sćěh prawostatneho jednanja.“ 63lětny politikar so tež w cyrkwi angažuje a je čłon prezidija Němskeho ewangelskeho cyrkwinskeho dnja.

Wjac nabožinskeje swobody

Washington (B/SN). Prezident USA Donald Trump je podpisał dekret wo spěchowanju swobody rěčenja a nabožinskeje swobody. To ma cyrkwjam „hłós wróćić“, wón rjekny. Dekret měri so přećiwo płaćiwemu zakonjej z lěta 1954, po kotrymž njesmědźachu cyrkwje, nabožinske zwjazki a wot dawkow wuswobodźene organizacije stronskopolitisce aktiwne być. Na 80 procentow ewangelskich wěriwych je Trumpa woliło.

Cyrkej posrědkuje přiměr

wozjewjene w: Cyrkej a swět
wutora, 23 meje 2017 14:00

Krótkopowěsće (23.05.17)

Kabinet so w Praze schadźował

Praha. Składnostnje pjećlětneho wobstaća swojeho kontaktneho běrowa w čěskej stolicy je so sakske krajne knježerstwo z ministerskim prezidentom Stanisławom Tilichom (CDU) dźensa w Praze schadźowało. Hósć posedźenja bě čěski hospodarski minister Pavel Bělobrádek. Kontaktny běrow je w twarjenju Serbskeho seminara zaměstnjeny.

Wabja za wopyt wustajeńcy

Drježdźany. Z informaciskim kašćikom wot dźensnišeho na Drježdźanskim lětanišću za to wabja, Žitawski pokład historiskich narownych taflow wopytać. Přehladka wo „cyle hinašej reformaciji w Hornjej Łužicy“ je hač do apryla 2018 přistupna. Wona wopřijima 80 ekspo­natow ze 16. a 17. lětstotka.

Projekt šulerjow nominowany

Wostrowc. Mjezynarodny zetkawanski centrum Marijiny doł we Wostrowcu je za lětuše myto UNESCO nominowany, kaž rěčnica Němskeje UNESCO-komisije zdźěla. Při tym dźe wo projekt, z kotrymž młodostni přeslědźa, što móhło so w jich wokolinje na dobro škita klimy a při lutowanju energije wšitko polěpšić. Na projekće wobdźěla so wjace hač sto šulerjow.

wozjewjene w: Krótkopowěsće
wutora, 23 meje 2017 14:00

Tilich: „Žohnowanje za region“

W Kamjencu zakładny kamjeń za dalšu twornju baterijow połožili

Kamjenc (SN/JaW). Daimler AG budźe wot klětušeho w nowym druhim Kamjenskim zawodźe dźowki Deutsche Accu­motive litiumo-ionowe baterije za awta twarić. K tomu su wčera w Lessin­gowym měsće zamołwići koncerna zhromadnje z kanclerku Angelu Merkel a sakskim ministerskim prezidentom Stanisławom Tilichom (wobaj CDU) symboliski zakładny kamjeń za nowu twornju połožili. Do kamjenja w formje awtobaterije, připrawjeneho na sakskim pěskowcu, połožichu mjez druhim Tilich, Merkel a šef Daimler AG Dieter Zetsche swoje narěče kaž tež aktualnu regionalnu nowinu dnja a rukajcy z napisom wobeju firmow jako znamjo za sobudźěłaćerjow.

wozjewjene w: Hospodarstwo
wutora, 23 meje 2017 14:00

Moderniši wobraz posrědkować

Spočatk lěta su Choćebuscy kulturnicy nowe towarstwo Studnja załožili. Cordula­ Ratajczakowa je so z městopředsydu towarstwa Michaelom Apelom rozmołwjała.

Čehodla sće nowe towarstwo załožili?

M. Apel: Myslimy sej, zo je trjeba serbskim towarstwam a kulturnikam z podpěru a dobrej radu poboku być. Chcemy jich podpěrać próstwy stajeć, projekty přewjedować a mjez sobu styki nawjazać. Naš poskitk wusměrja so na wšelakorych ludźi, na serbske towarstwa, šule a horty, na staršich, kotřiž chcedźa něšto na nohi stajić, na wuměłcow a kulturnikow. Smy tež wotewrjeni Němcam, kotřiž so za serbsku kulturu zajimuja. Chcemy so stać ze zjawnym partnerom wšěm Delnjołužičanam, kiž maja prašenja nastupajo serbskosć a sami dale njepřińdu. A snano tež sami projekty přewjedźemy.

Mjeztym dźělitaj sej předsyda Robert Engel a Frank Kosyk městno kulturneho managera. Wo čo staj so hižo starałoj?

wozjewjene w: Rozmołwa
wutora, 23 meje 2017 14:00

Personalna změna w FUEN

Cluj-Napoca/Flensburg (SN/BŠe). W sekreteriaće Federalistiskeje unije europskich narodnych mjeńšin (FUEN) je změna personala předwidźana. Generalna sekretarka Susann Šenkec poda so na hižo dlěje planowane sabatowe lěto. Jeje nadawki přewozmje nětko Éva Adél Pénzes, kotraž dźěła tuchwilu za FUEN w Berlinskim běrowje. Tole wozjewi prezident organizacije Loránt Vincze minjeny kónc tydźenja na kongresu w rumunskim Cluju-Napoce. Dale skedźbni wón na to, zo je dźěło prezidenta dale a wobšěrniše. Runje w zwisku z iniciatiwu Minority SafePack (MSPI) bě Vinzce loni wjele po puću. Tak měła organizacija wo tym rozmyslować, zastojnstwo hłownohamtsce wukonjeć dać. Tole měło so přepruwować. „Tu njeńdźe wo wosobu, ale wo přichod FUEN“, prezident podšmórny.

Tuchwilu ma sekreteriat FUEN tři stejnišća, a to w Flensburgu, Berlinje a Brüsselu z cyłkownje jědnaće sobudźěła­ćerjemi. Poslednje mjenowane stejnišćo chcedźa přichodnje dale wutwarić a tam dalše dźěłowe městno zarjadować.

wozjewjene w: Kraj a swět

Serbska debata

nowostki LND