Z wudaća: wutora, 20 junija 2017

W Holešowskej Dubrawce wubědźowachu so minjeny kónc tydźenja nimo jěcharkow a jěcharjow tež pohončojo ze swojimi konjacymi zapřahami. Na wobrazu widźimy sportowsku korejtu ze Smjerdźaceje, kotruž ćehnje Bulankec připušćak Wulkan. Pohonč je René Bulank, kopilot André Kühne. Smjerdźečanska trójka wobsadźi w Holešowskej Dubrawce druhe městno před Lucasom Wenderothom a Norbertom Kubašom, kotrajž běštaj z walachom Elbfürstom startowałoj. Dobył je wubědźowanje zapřahow Stefan Šołta z Njeswačidła. Foto: Jörg Stephan

Serbski dorostowy kopar Leon Šołta z delnich Sulšec budźe wot noweje sezony w dorosće Dynama Drježdźany za bulom honić, kaž sportowe towarstwo Budissa Budyšin zdźěla. Šuler Serbskeho gymnazija Budyšin póńdźe tuž na Drježdźanski sportowy gymnazij. Nadarjeny dwanaćelětny Sulšečan je pola Sokoła Ralbicy/Hórki z kopańcu započał a dźěše pozdźišo k Budissy. SN

Loni pobychu Worklečanscy wólnočasni koparjo prěni raz na tak mjenowanym „Běrnjacym koparskim turněrje“ w Kamjenicy a wobsadźichu tam hnydom druhe městno. Lětsa so woni tam znowa zapisachu. Zarjadowanje bě zaso wuběrnje organizowane. Hnydom w prěnjej hrě dnja nastupichu serbscy koparjo přećiwo cyłkej organizatora z mjenom „Team běrna“ a 3:0 suwerenje dobychu. Muž zazběhoweje partije běše nowopřichad Ronald Cyž. Wón docpě wšitke troje wrota. Tež přećiwo VfL Kamjenicy Cyž trjechi, Łužičenjo pak duel 1:2 přěhrachu. W dalšimaj partijomaj přećiwo Murmelclub Neukirchenej (2:0) a CFC-fanklubej Sachso (1:0) je Cyž po jednych wrotach třělił. 2:0 w předposlednjej skupinskej hrě poradźichu so Richardej Kmjećej. Tón bě so energisce do přećiwniskeje šěsnatki přesadźił a bul wobhladanjahódnje do syće zhłójčkował.

Šulerki-koparki 7. do 9. lětnika Serbskeho gymnazija Budyšin (SGB) postarachu so kónc meje w Freitalu wo sensaciju w sportowych stawiznach kubłanišća. Jako prěnje mustwo dobychu wone krajne finale a pojědu wot 17. do 21. septembra na zwjazkowe finale do Berlina, hdźež chcedźa z dalšimi 15 dobyćerjemi tamnych zwjazkowych krajow wo najlěpše zaměstnjenje wojować.

Jědnaty raz je so jedne holče koparske mustwo SGB za sakske krajne finale skwalifikowało. Slěborna medalja w lěće 2013 bě dotal najwjetši wuspěch na tutej runinje. Před štyrjomi lětami w Lipsku bě z kapitanku Leju Krječmarjec, wrotarku Nelu Pjetašec a hrajerkami Tadeju Šeferec, Helenu Hejduškec a Karolinu Šrajterec hižo pjeć serbskich holcow pódla, kotrež postarachu so lětsa w Freitalu ze Saru Łušćanskec, Milenu Kummerec a Laviniju Bührdel wo grandiozny rezultat. Wone dobychu wšitke partije najlěpšich pjeć mustwow Sakskeje. Dokelž knježachu temperatury wokoło 30 stopnjow, skrótšichu zamołwići hrajny čas na dwójce dźesać mjeńšin.

SGB – Weißeritzski gymnazij Freital 5:0

Berlin (B/SN). Zwjazkowa kanclerka Angela Merkel, dźowka ewangelskeho fararja, so w křesćanskej wěrje derje čuje. „Wona mi pokazuje: Dawa něšto nade mnu a we mni, štož da mje zrozumić, zo sym Bože stworjenje, z kmanosćemi, kotrež pak su tež wobmjezowane“, rjekny 62lětna w Berlinje. Tele dopóznaće wuči ju „wěstu ponižnosć“ a dowola jej, po zmylkach zaso doprědka hladać. Křesćanska wěra je zdobom poselstwo, zo njemóža zmylki čłowjeka zničić. Z wěry wona zdobom spóznawa, zo ma „so zasadźeć za dostojnosć čłowjeka“.

Wužiwaja pjenjezy za brónje

Lipsk (B/SN). Předsyda rady Ewangelskeje cyrkwje w Němskej Heinrich Bedford-Strohm deal z brónjemi mjez USA a Sawdi-Arabskej wótrje kritizuje. Hdyž jenički bombowc 1,2 miliardźe dolarow płaći a „swětowe zhromadźenstwo runočasnje ani 4,4 miliardy dolarow nima, zo by katastrofalny hłód we wuchodnej Africe wotwobarało, je to skandal“, rjekny ewangelski krajny biskop na cyrkwinskim dnju w Lipsku. USA běchu kónc meje ze Sawdi-Arabskej brónjenske zrěčenje w rozměrje 100 miliardow eurow wotzamknyli.

Strategiska sćerpliwosć trěbna

9. lětnik Worklečanskeje wyšeje šule je so wčera na 48hodźinskej akciji Budyskeho wokrjesa wobdźělił. Młodostni su ławki na šulskim­ dworje kaž tež gratownju šulskeje zahrody wobarbili, njerodź plěli a w pincy šule rumnosće wurumowali. A dokelž bě hišće tójšto dźěła, so dźensa hišće raz gratu přimachu. Foto: Feliks Haza

Kaž w dowolowym času z wašnjom, chcemy tež lětsa na tymle městnje stajnje­ wutoru a štwórtk wosebitu seriju­ wozjewjeć. W njej předstajamy wosobiny, kotrež na někajkežkuli wašnje­ stawizny zachowuja, zo staro­žitnosće zběraja­ a je zdźěla zjawnosći spřistupnjeja.­ Dźensa seriju zahajamy.

W Sernjanach je sej 54lětny Stefan Herman w tykowanym domčku na swojej ležownosći­ zarjadował móhłrjec mały muzej z jónkrótnymi sakralnymi hód­notami.

Stefan Herman narodźi so we Wotrowje. Wot časa dźěćatstwa zajimowaše so za starožitnosće. Hačrunjež njeměješe mać zrozumjenje „za tón stary čapor“, je sej wón hižo w tym času znosył wjele zajimawych­ a hódnych eksponatow. Tomu wosta tež jako wučomnik w Budyskej wagonowni swěrny runje tak kaž pozdźišo, jako dźěłaše hač do přewróta na kuble klóštra Marijineje hwězdy.­

Na Budyskich Žitnych wikach móžeš samo šach hrać

Budyšin (SN). Na Žitnych wikach w Budyšinje njenańdźeš jenož wěžu, ale po najnowšim tež skakarja, krala, burika a dalše figury. Minjeny pjatk su tam wuslědki nowowuhotowanja a twarskich změnow předstajili.

Hromadźe z iniciatiwu Angažowane město a z hosćencarjom bageterije bě sej měšćanske zarjadnistwo zaměr stajiło, přebywansku kwalitu na Žitnych wikach polěpšić. Za to je wobdźělenska a wob­hospodarjenska towaršnosć (BBB) meble k posydnjenju ponowić dała, tak zo je dosć móžnosćow wotpočnyć. Přichodne tydźenje maja tež zaso stólcy na naměsće stać. Dokelž je tuchwilu tohorunja ponowjeja, su tam jako narunanje dwě ławce stajili. Dalše móžnosće k posydnjenju maja pod lipami nastać.

Z kolesom do nakładneho awta

Mučow. Njekedźbliwosće dla je so zawčerawšim popołdnju młoda holca w Mu­čowje zraniła. 16lětna bě we wsy z kolesom po puću, jako wona parkowace nakładne awto přewidźa. Kolesowarka zajědźe do zadnjeho dźěla jězdźidła a padny. Při tym zrazy z hłowu wo nakładowansku pło­ninu. Zranjenu młodostnu dowjezechu z chorobnym awtom do kli­niki. Wěcna škoda při njezbožu žana nastała­ njeje.

Njeswačidło (LR/SN) Tež třinata šlagrowa nóc minjenu sobotu w Njeswačanskim parku bě zaso połny wuspěch. Něhdźe 2 000 hosći wopyta woblubowane zarjadowanje, kotrež bě znowa Njeswačanske sportowe towarstwo Módro-běli wuhotowało. W předprogramje předstaji so druhi raz hudźbna band Rakečanskeje Pawołskeje šule, kotraž žněješe wulki aplaws. Znata šwicarska moderatorka a spěwarka Linda Fäh zanjese swoje hity jako prěnja na jewišću. Hižo tu bě publikum zahorjeny. Mjeztym zo wona fanam awtogramy dawaše, zaspěwa Frank Schöbel swój prěni šlager. Nalada wopytowarjow so při jeho znatych hitach dale a bóle stopnjowaše. Rodźeny Lipšćan spěwa hižo dlěje hač pjeć lětdźesatkow. Jeho muzikaliskosć, mnohotnosć a přirodne wašnje publikum přeswědčichu. Donětka je wón wjace hač 350 spěwow skomponował.