Z wudaća: pjatk, 23 junija 2017

Dźensa bě w Sakskej posledni šulski dźeń. To sydaja znamki, kotrež dóstachu tež dźěći 4. lětnika Slepjanskeje zakładneje šule. Wone tele kubłanišćo zdobom wopušća a podadźa so spočatk awgusta na dalewjeduce šule. Za rjadowniski wobraz k dopomnjeću tuž wšitcy hišće raz wjesele hladachu, štož wězo ćežko njebě. Wšako su prózdniny. Foto: Joachim Rjela

Před dwěmaj njedźelomaj běchu w Smolerjec kniharni tři talentowane młode serbske awtorki z hosćom. Wšitke tři dobychu lěta 2015 myto Literarneho wubědźowanja Ludoweho nakładnistwa Domowina a Załožby za serbski lud. Alena Belkotec, Annamaria Hadankec a Rejzka Delenkowa čitachu swoje mytowane twórby, kotrež su mjeztym w rjedźe Paternoster wozjewjene, a žnějachu připóznawacy přiklesk přitomnych. Zahorjeni běchu wot žortneho powědančka Rejzki Delenkoweje „Kermušny wobjed“, wosebje wušikneho zaplećenja ludoweje serbšćiny dla, kotrež wuwabi wutrobne smjeće.

Čitanje mytowanych wobdźělnicow minjeneho wubědźowanja bě zdobom za­zběh do noweho, lětsa wotměwaceho so wubědźowanja, kotrež stej zarjadowarjej tónle měsac zjawnje wupisałoj. Wupisanje namakaja zajimcy na webstronomaj nakładnistwa a załožby.

Pjatk  23. do 25.6.  XII. mjezynarodny folklorny festiwal „Łužica 2017“ w Hochozy a Chrósćicach

   Wjesny swjedźeń w Bórkhamorje

   25lět Wjesny rock w Němcach

  20:00 Wosebite dožiwjenske wodźenje po Kamjencu – zetkanje při Klóšterskich wrotach

  21:00 Openairkino na Koklic statoku w Chrósćicach

Sobotu 24. a 25.6.  Akcija wuměłstwowy bus w Budyskim wokrjesu, mjez druhim tež w klóštrje Marijineje hwězdy w Pančicach-Kukowje

   46. jěchanski a skakanski turněr w Kulowje

  9:00 Swjedźeń při starym młynje w Hornjej Hórce

  10:00 Lětni swjedźeń na Ćišćanskim statoku

  19:00 Dźiwadło z Běłowodźanskej kabaretnej skupinu „Die Lutken“ na Trjebinskim Šusterec statoku

  19:00 Lětnja nóc we Wochožanskim parku błudźenkow

  20:00 Kulturne lěćo w Małowjelkowskej sotrowni

  21:00 Janski woheń z čitanjom na Njeswačanskim rybarskim dworje

Njedźelu 25.6. 10:00 Dožiwjenje jantar – wodźenje po Hórnikečanskej energijowej fabrice

  13:00 Janske jěchanje w Kózłem

  14:00 Rejwanski čaj w Małowjelkowskej sotrowni

  15:00 Njedźelny koncert w Bartskim šulskim parku

  20:00 Kulturne lěćo w Małowjelkowskej sotrowni

Póndźelu 26.6. 10:00 Prózdninski program z Budyskim klankodźiwa­dłom w Slepjanskim SKC

njedźelu hornjoserbsce

11:00 Łužica tutón tydźeń, mjez druhim z powěsćemi tydźenja

11:20 Folklorny festiwal „Łužica 2017“ – live z Chrósćic

12:00 Nabožne wusyłanje

 (farar Gerat Wornar)

po tym zbožopřeća

delnjoserbsce

12:30 Aktualny magacin, mjez druhim wo folklornym festiwalu w Chrósćicach a komentar „Tak ja to widźu“

13:00 Serbske młodźinske wusyłanja w radiju

13:30 Nabožne wusyłanje

 (Katharina Köhlerowa)

po tym zbožopřeća 

Rukopis jenož hač do njedźele

Budyšin. Jenož hišće hač do njedźele, 25. junija, pokazuje Budyski Serbski muzej Mikławša Jakubicowy rukopisny přełožk Noweho testamenta we wosebitej wustajeńcy „Pjeć lětstotkow – Serbja a reformacija“. Přehladka k reformaciskemu jubilejej pak wostanje dale hač do njedźele, 27. awgusta, přistupna. Tón dźeń wotměje so tam swójbne popołdnjo z literarno-hudźbnymi chłóšćenkami.

Lětni koncert w cyrkwi

Lejno (Geierswalde). Spěwarjo wokalneho ansambla amici della musica přeprošeja lubowarjow chóroweho spěwanja jutře w 19.30 hodź. na koncert do Lejnjanskeje wjesneje cyrkwički. Wječor lubi­ mnohostronskosć cunich, temperamentnych a jazzowych zynkow.

Wuměłstwo w busu

Budyšin. W času wot 12 do 17 hodź. budźetej jutře a njedźelu wuměłstwowej busaj mjez Budyšinom a Połčnicu po puću. Sobujěducy, kotřiž su sej woseity lisćik kupili, móža w busu wšelakich wuměłcow dožiwić. Busaj dowjezetej zajimcow na šěsć wuměłstwowych městnow, mjez druhim do klóštra Marijineje hwězdy­ w Pančicach-Kukowje. Telefoniske naprašowanje­ su móžne pod čisłom 03592/51 92 892.

Delanscy Sokoljo witaja hosći

Dźensa, pjatk, nastupja stari knježa Sokoła Ralbicy/Hórki přećiwo koparjam hrajnehzo zjednoćenstwa Wojerowskeho FC a Jednoty Wojerecy. Zakop w Ralbičanskim Stadionje přećelstwa je we 18.30 hodź. Po tym witaja delanscy Sokoljo swojich hosći ze Spáleneho Poříčí na kónctydźensku sportowu wuměnu.

Dorost za bulom honi

Sobotu, 24. junija, wubědźuja so dorostowe koparske mustwa z teritorija energijoweho zastaraćela Čorny Halštrow (EVSE) pjaty raz, a to w Kulowje. Cyłki młodźinow D a F wojuja tam wo pokale, medalje a atraktiwne myta. EVSE, twarske wiki Globus Wojerecy, Zhromadna płunowa syć AG a Nebasto GmbH je sponseruja. Prěnje hry započnu so w 10 hodź. na sportnišću Módro-běłych Kulow. Wokoło 15 hodź. budu dobyćerjow mytować.

Jěchanski a skakanski turněr

Jěchanske towarstwo Kulow přewjedźe jutře a njedźelu dalši jěchanski a skakanski turněr na swojim jěchanišću. Hižo jutře započnu so wubědźowanja.

Wobornicy so wubědźuja

7.7.  19:00  w Róžeńće

30.7.  14:00  w Smjerdźacej

25.8.  18:30  we Wotrowje

Kónctydźenska kopańca

24.6. 13:00 ST Radwor II – ST Bart

24.6. 15:00 ST Hnašecy-Dobruša

Wjelelětnu nawodnicu Radworskeje zakładneje šule Brigitu Grundmannowu (wobraz nalěwo) su po 25lětnym skutkowanju w tymle zastojn­stwje dźensa na zasłuženy wuměnk rozžohnowali. Tež nawodnica Worklečanskeje zakładneje šule Lucija Kuškec (naprawo) je so z dźensnišim poslednim šulskim dnjom do renty podała. Foto: Bianka Šeferowa/Feliks Haza

Starši w Budyšinje změja wot lěta 2018 wjace swobody so rozsudźić. Woni smědźa potom swoje dźěćo tež do Hodźijskeje zakładneje šule pósłać, kaž su měšćanscy radźićeljo nětko rozsudźili.

Budyšin (CK/SN). Wot šulskeho lěta 2018/2019 móža sej starši w Budyšinje wuzwolić, na kotrej zakładnej šuli maja jich dźěći wuknyć. Z jednym napřećiwnym hłosom su měšćanscy radźićeljo zawčerawšim rozsudźili, za wšitke štyri zakładne šule w nošerstwje města zhromadny šulski wobwod wutworić. Dale chcedźa lěta 2013 z Hodźijskej gmejnu dojednane zrěčenje dale wjesć. Na jeho zakładźe móža hižo wot šulskeho lěta 2015/2016 dźěći ze zapadnych mě­šćanskich dźělow mjez Błohašecami a Smochćicami­ do Hodźijskeje zakładneje šule chodźić.

Nowa Wjeska hotuje so na wulki jubilej, štož je wjele dźěła

Nowa Wjeska (JK/SN). Wobydlerjo Noweje Wjeski su znaći za to, zo zamóža wurjadne swjedźenje wuhotować. Za tydźeń, 1. a 2. pražnika, woswjeća woni zhromadnje wulki jubilej 400. róčnicy prěnjeho naspomnjenja wsy. Jako zakład jubileja złožuja so na podaća Alfonsa Frencla w jeho knize „Podłu Klóšterskeje wody“. Hižo wot lońšeho wo tym rozmysluja, kak móhli tónle žadny podawk hódnje woswjećić.

Do přihotow zapřijeći su wobydlerjo a wjesne towarstwa, kotrež maja hižo tójšto nazhonjenjow, wjetše swjedźenje přewjesć. Za lětuši su sej trochu wjace předewzali. Jako wjeršk planuja, předstajić stawizny a wuwiće Noweje Wjeski w swjedźenskim ćahu. Kaž čłon přihotowanskeho wuběrka a aktiwny organi­zator wjesnych swjedźenjow Křesćan Korjeńk­ rozłožuje, předstaja wjesnjenjo a pomocnicy z dalšich wsow w něhdźe 25 wobrazach bohate stawizny Noweje Wjeski kaž tež za nju typiske podawizny abo wosobiny. Za to su najwšelakoriše nastroje, drastu a mašiny z historiskim pozadkom pilnje zezběrali.

Tež dźěći Kulowskeje Krabatoweje zakładneje šule so na prózdniny wjesela. Mjeztym zo so w kubłanišću hižo pilnje twari, tak zo móža potom přichodne šulske lěto z nowej třěchu a nowym tepjenjom zahajić, mějachu holcy a hólcy srjedź tydźenja pućowanski dźeń. Jich puć wjedźeše do Wochožanskeho parka błudźenkow. Při krasnym­ lětnim­ wjedrje móžachu sej jednotliwe rjadownje park wobhladać. Tež šulerjo 1. lětnika (na wobrazu) rostliny a kamjenje wobdźiwachu, tak zo bě to za wšitkich­ rjany a wočerstwjacy dźeń. Foto: Lubina Dučmanowa