Z wudaća: póndźela, 26 junija 2017

Kopar Jonas Krawčik, rodźeny Njebjelčan, přeńdźe wot ligoweho konkurenta FC Hornja Łužica Neugersdorf k Budissy Budyšin. Wosebje rady je Jonas na křidłomaj zasadźeny, wšako bě 20lětny na lońšej europeadźe w Južnym Tirolu wažny hrajer na wonkownymaj stronomaj. W sezonach wot lěta 2012 do 2015 je Krawčik pola Dynama Drježdźany w B- a po tym A-młodźinje w zwjazkowej lize za bulom honił. Tež za Sewjerowuchodnu koparsku ligu pola U 23 Dynama bě dwójce zasadźeny. Před lětomaj dźěše z Drježdźan do Neugersdorfa, hdźež je tři hrajne doby w regionalnej a wyšej lize za Hornjołužičanow a tam 26 partijow absolwował.

K změnje do Budyšina Krawčik měni: „Móžu tu w regionalnej lize hrać. Nimo toho je so Budissa wo to prócowała, zo móžu tu swoje wukubłanje zakónčić. Rjenje tež je, zo su Budyšenjo z Kevinom Bönischom sylneho nadběhowarja angažowali.“ Za trenarja Torstena Gütschowa je Jonas Krawčik dalša opcija na wonkownymaj stronomaj. Jurij Bjeńš

ST Radwor

– LSV Nowe Město II 3:0 (2:0)

Zestawa domjacych: Šěrak – Henka, Zähr, Omran, von Karwin, Zimmermann, Nuk, Winar, Bejmak, Schulze (85. Mark), Buša (47. Wjeńka)

Zo móža so sony zwoprawdźić, je wčera koparske mustwo ST Radwor dožiwiło. Z mnoho sebjewědomjom a wosebje z krutej moralku so jemu poradźi, štož mnozy za móžne njemějachu. Po tym zo bě jim sportowe sudnistwo Zapadołužiskeho koparskeho zwjazka spočatk lěta dźewjeć dypkow pobrachowacych sudnikow dla wotćahnyło, swjećachu Radworčenjo wčera tola hišće mišterstwo w stafli II wokrjesnych ligow.

Awtor dźensa

Tomaš Faska 

W medijach husto „cirkus formula 1“ mjenowany je kónc tydźenja w azerbajdźanskej stolicy Baku pozastał. Loni běchu při Kaspiskim morju prěni króć „grandprix“ za najspěšniše wubědźowace so awta přewjedli. „Kralowska klasa“ bě z hosćom na „Baku City Circuit“, kotryž bě tam minjene lěta nastał – dźak hoberskim dobytkam z wikowanja ze zemskim wolijom. To wosebite na wubědźowanjach tam mjez druhim je, zo ma jenož 28 000 přihladowarjow městno – mjenje hač na kóždym druhim kursu. Nimo­ toho tam wšitke připrawy specielnje za wony běh formule 1 natwarja a po wurisanju, hdyž je „cirkus“ nimo, zaso kompletnje wot­twarja. Potajkim buchty, medicinski centrum a wšo, štož je logistisce trěbne.

Kónc tydźenja 17./18. junija skónči so za koparjow Chróšćanskeje SJ prěnje hrajne lěto w krajnej klasy wuchod. Po lońšim mišterstwje běchu sej woni z wjednistwom přezjedni, zo zwaža so na kročel, klasu wyše hrać. Wot wšeho spočatka pak sej jasnje prajichu, zo dyrbja wjeselo, zhromadnosć a dobry mustwowy duch na prěnim městnje zhromadneho honjenja za bulom stać. Dyrbješe to prosće pospyt być. Po 24 hrajnych dnjach smě mustwo horde na sebje być, wšako je klasu dźeržało a w cyłku dobry wukon pokazało. Cyłkownje ma na konće 30 dypkow (8 dobyćow, 6 remisow a 10 poražkow), štož woznamjenja 8. městno w tabulce.

Po hnydomnym dowolu loni, prěnjej regeneraciji na kupje Hawaii, a po wě­stej krótšej přestawce na to hišće doma w Kölnje, je so za sportowe zjednoćenstwo Tri Cologne startowaca Beata Čórlichec­ rozsudźiła spytać so tež třeći króć a so hnydom za Ironman 2017 kwalifikować. Za sportowu redak­ciju Serbskich Nowin je so Jurij Nuk z rodźenej Němčanku rozmołwjał.

Spočatk nowembra 2016 sy zaso systematisce trenować započała, a to pod lěpšimi wuměnjenjemi. Što je so změniło?

B. Čórlichec: Namakach wěcywustojneho, znateho a připóznateho trenarja za triatlon, kiž mje profesionalnje poradźuje. Wosebje za kolesowanje a běhanje dóstawam kompletne plany wot njeho. Je to­ trenar Wolfram Bott z Freiburga w Čornym lěsu, pola kotrehož je tež Budyski wurjadny triatlet Maik Petzold wjacore lěta w swojim profijowym času trenował. W płuwanju poradźuje mje nazwučowar Erich Felsner ze sportoweho zjednoćenstwa, kotremuž přisłušam.

Što je hinak? Kak wuskutkuje so nowa, profesionalniša forma treninga?

Wokrjesna koparska liga, stafla II

Ralbicy/Hórki II – Na. Hrabowka 1:0 (1:0)

Wulke Ždźary – Ćisk II 2:2 (2:0)

Łuty – Łaz/Běły Chołmc 1:1 (1:0)

Lubuš – Hory II2:2 (0:1)

Radwor – Nowe Město II 3:0 (2:0)

Rakecy II – Bluń5:4 (3:2)

Njeswačidło – Wojerecy II 2:6 (0:4)

1. ST Radwor 26 81  : 29 54

2. HZ Łaz/Běły Chołmc 26 62  : 32 54

3. HZ Wulke Ždźary 26 57  : 33 48

4. ST Ćisk II 26 43  : 44 43

5. ST Lubuš 26 52  : 37 42

6. Nowe Město II 26 43  : 42 40

7. FSV Łuty 26 51  : 34 38

8. ST Nadróz. Hrabowka 26 57  : 57 33

9. Rakečanske ST II 26 42  : 54 32

10. Wojerowski FC II 26 51  : 67 32

11. LSV Hory II 26 41  : 50 30

12. Mó.-běli Njeswačidło 26 46  : 76 21

13. LSV Bluń 26 39  : 72 20

14. Sokoł Ralbicy/Hórki II 26 28  : 66 13

Folklora a kulinariske speciality su sobotu wječor zaso ty­sacy ludźi na sydom Chróšćanskich statokow wabili. Zdźěla běchu dwory tak „zatykane“, zo sy so lědma hibać móhł. Jako so­ folklorne programy nachilachu, dožiwichu swěrni wopytowarjo festiwala na třoch statokach specialny program ze wšelakimi premjerami a nowosćemi.

Mjeztym je tomu dwaceći lět, zo su skupiny na folklornym festiwalu posledni króć tež na Kralec statoku­ byli. Pytnyć pak tole njebě: Sćelak MDR z moderatorku Dianu Fryčec-Grimmigowej bě tam swoje wulke jewišćo natwarił. Te wšak wulke wukrajne folklorne skupiny tež trjebachu, zo bychu swój program we wšej pyše předstajić móhli. Wosebje zaćišćowpołnje činjachu to čłonojo kolumbiskeje skupiny Grupo Folklórico a grjekskeje Naoussa Paros. Schować njetrjebachu so tež hudźbnicy norwegskeho Myllargutens Gammaldansorkestra. Byrnjež w jich programje nichtó njerejwał, bě tola widźomne, z kajkim wjeselom hercy hudźa. Wotpowědnje derje pjelnjeny Kralec dwór stajnje zaso bě, wšako so wopytowarjo cyle zaměrnje na njón měrjachu, zo bychu wusahowace wjerški lětušeho festiwala dožiwić móhli.

Wo ćělne derjeměće so zamołwići derje postarachu. Rulady z běrnami a čerwjenym kałom běchu runje tak prašane kaž polećo abo burger. Z wothłosom ludźi běchu spokojom, kaž sobuorganizator Daniel Herman SN potwjerdźi.

Marko Wjeńka

Na drje najmjeńšim z festiwalnych dworow, pola Kolic, dožiwichu hosćo a přihladowarjo mjezynarodny program, kotryž wuhotowachu skupiny, pochadźace přewažnje z Němskeje. Program zahajiła a jón w nocy tež zakónčiła je cymbalowa hudźba Dušana Kotlára z čěskeho Li­bereca. Drježdźanska skupina Dance Anatolia­ předstaji turkowske reje, kotrež tam wosebje składnostnje wulkich swjedźenjow pěstuja. Zhromadnje spěwać a rejwać pozbudźištej cyłk Shuriaki z tradicionalnymi spěwami wuchodneje Europy a delnjołužiske ćěleso Pój rejwać, kotrež přeco zaso přihladowarjow zapřijimaše a poskići přidatnje zjawny kurs serbskich rejow. W lóštnej moderaciji je Patricia Kralec jednotliwe pisane dźěle programa zwjazała. Ćělne zastaranje bě jara wšelakore, mjez druhim z originalnymi durinskimi praženymi kołbaskami. Jan Kral

Chróšćanscy muzikanća zahajichu sobotny festiwalny wječor po koncerće skupiny JANKAHANKA na Krawčikec statoku. Kaž zamołwići zdźělichu, je wšitko derje běžało, byrnjež časowje trochu w zastatku byli. Na a při jewišću měješe moderator Tadej Špitank nitki w horšći. Wón bě moderaciju krótkodobnje z Gloriju Žurec změnił. Suwerenje wjedźeše wón po programje, byrnjež „tu a tam připowědźe přiměrić dyrbjał“. Nimo Rejwanskeho ansambla z Rudolstadta a pólskeho cyłka Zornica žněješe pokazka Egyptowčanow wulke připóznaće. 71lětny hudźbnik na instrumenće mozmar, žortowacy kamel a wjerćacy so derwiš su mnohim takrjec „hłowu zawjerćeli“. Wulkotna bě gesta, jako je derwiš při swojej reji serbsku chorhoj ze suknje wućahnył. Připóznaće žnějachu tež egyptowske rejwarki, kotrež su dźěći spontanje do rejki prosyli. Janek Wowčer