Z wudaća: srjeda, 12 julija 2017

srjeda, 12 julija 2017 14:00

Wo boju přećiwo złóstnistwu

Berlin (dpa/K/SN). Dźesać lět po mordowacym zachadźenju mafije w Duisburgu zaběraja so dźens w stolicy politikarjo, žurnalisća, wědomostnicy a angažowani ludźo z bojom přećiwo złóstniskim cwólbam w Němskej. Přitomny je tohorunja italski nutřkowny minister Marco Minniti. Je to prěnja konferenca tohole razu, rjekny Sandro Mattioli ze zarjadowaceho towarstwa „Mafija? Ně, dźakuju so!“. Po Duisburgskim podawku, při kotrymž buchu­ před jednej z tamnišich picerijow zwady­ dla mjez dwěmaj swójbomaj šěsć ludźi zezatřělene, njenałožuja wulke organizacije kaž ’Ndrangheta hižo strate­giju krejpřeliwanja, zo njebychu w zjawnosći napadnyli. Mafiozne clany su pak w Němskej dale prezentne.

wozjewjene w: Kraj a swět
srjeda, 12 julija 2017 14:00

Italskej pomhać

Waršawa (dpa/SN). Zastupnicy čłonskich statow Europskeje unije schadźowachu so wčera na zarjadowanju agentury za škit mjezow Frontex we Waršawje. Tam su wuradźowali, hač njemóhli łódźe z wuchowanymi ćěkancami z Italskeje do druhich přistawow EU dale pósłać. Zeńdźenje wotmě so na žadanje knježerstwa w Romje. Wone sej žada, zo měła so wu­chowanska misija EU „Triton“, kotruž Frontex koordinuje, na druhe kraje rozšěrić. Dotal sćelu we wobłuku Triton wšitke łódźe z ćěkancami do italskich přistawow.

Kaž Frontex po wuradźowanju zdźěli, chcedźa dźěłowu skupinu załožić, kotraž trěbne změny pruwuje a nowy plan za wuchowansku misiju zdźěła. Přezjedni sej běchu, zo měli Italsku bóle podpěrać. Móžnym změnam dyrbjeli nimo Frontex a Italskeje wšitke potrjechene kraje přihłosować. Zwjazkowe knježerstwo žadanje­ Italskeje dotal skeptisce wob­hladuje, dokelž móhło to dalšich migrantow pohnuć so na strašnu jězbu po Srjedźnym morju nastajić.

wozjewjene w: Kraj a swět
srjeda, 12 julija 2017 14:00

Wotkrywaja talenty

Šesty króć wotměwa so w Njebjelčicach mjezynarodny tydźeń młodźinskich dźěłarničkow. Wulkotna wěc to, wšako zezna­jomjeja so hosćo ze Serbami, z jich rěču a kulturu. Zhromadne wječorki po­lěkuja zdobom nowym přećelstwam. W tym wšak su Njebjelčenjo ze swojim wjesnjanostu Tomašom Čornakom na čole tak a tak hižo profije. Tajka wuměna ma hišće dalše pozitiwne aspekty. Štóž z wotewrjenymaj wočomaj po wsach Njebjelčanskeje gmejny jězdźi, tež to a tamne widźi. Wjacore „blěde“ blečki su młodostni w dźěłarničkach na woprawdźite „parlički“ přeměnili, a gmejna njetrjebaše wulce pjenjezy za to wudawać. Młodostni – tež serbscy – maja dale składnosć, so raz w něčim nowym pospytać a snano někajki schowany talent wotkryć. Najwažniše pak je, zo nětčiši wobdźělnicy pozdźišo tajke wuměny tež dale organizuja a nowe styki nawjazaja. Janek Wowčer

wozjewjene w: Kultura
srjeda, 12 julija 2017 14:00

Konflikty na Balkanje přewinyć

Towaršnosć za wohrožene ludy prosy němsku kanclerku wo pomoc

Triest (dpa/SN/MkWj). Z wušim hospodarskim zhromadnym dźěłom chcedźa politisce zamołwići tradicionalne konflikty mjez šěsć krajemi zapadneho Balkana­ poněčim přewinyć. To je zaměr konferency wodźacych zastupnikow Serbiskeje,­ Albanskeje, Bosniskeje, Ma­kedonskeje, Montegra a Kosowa, kotruž su dźensa w sewjeroitalskim Triesće přewjedli. Wobdźěliła je so na njej tež zwjazkowa­ kanclerka Angela Merkel (CDU), kotraž­ bě tule kóždolětnu konferencu před třomi lětami do žiwjenja zwołała. Konkretnje dźe wo twar awtodróhow a płunowodow mjez krajemi kaž tež wo jednotne cłowne postajenja.

wozjewjene w: Kraj a swět
srjeda, 12 julija 2017 14:00

Wjace šulerjow

Berlin (dpa/SN). W Němskej póńdźe hač do lěta 2030 wjele wjace dźěći do šule, hač bě dotal myslene. To je wuslědk přepytowanja Bertelsmannoweje załožby, kotryž su dźensa w Berlinje předstajili. Po nim ličba šulerjow wot wosom milionow w lěće 2015 wo wosom procentow na nimale 8,6 milionow rozrosće. Dotal běchu z toho wuchadźeli, zo ličba šulerjow hač do lěta 2025 na 7,2 milionaj woteběra.­ Hłowna přičina rozrosta su na porody sylne lětniki kaž tež přichadźacy ćěkancy. Jeničce mjez nimi je 300 000 nowych šulerjow.

wozjewjene w: Kraj a swět
srjeda, 12 julija 2017 14:00

Transporty bóle kontrolować

Drježdźany (dpa/SN). Zeleni sej žadaja, transporty skotu w Sakskej časćišo kontrolować. Dotalne kontrole pokazuja, kak trěbne tajke naprawy su, rjekny frakciski šef Zelenych w krajnym semje Volkmar Zschocke nowinarjam. Přepruwowanja pak měli so personelnje lěpje zawěsćić a na wšu Saksku rozšěrić.

Po informacijach ministerstwa za škit přetrjebarjow běchu wot julija 2016 do meje 2017 cyłkownje­ 16 wotpowědnych kontrolow w nadróžnym wobchadźe přewjedli. Při tym zwěsćichu wjacore ranjenja weterinarnych předpisow. Zschocke w tym zwisku­ kritizuje, zo so wot ministerki Barbary Klepsch (CDU) loni při­powědźene zesylnjene kontrole nimale jenož na awtodróhu A 4 we wobłuku Kamjeničanskeje­ policajskeje direkcije wobmjezuja. „Wot systematiskich kontrolow po wšej Sakskej je tale praksa hišće chětro zdalena. Trjebamy nuznje personalne zesylnjenje hamtskich weterinarow a wobchadneje policije“, Zschocke rozłoži. Kontrolerojo pak njetrjebachu žane transporty přetorhnyć.

wozjewjene w: Kraj a swět
Mjeztym hižo wosmy raz su abiturienća Drježdźanskeho křižneho chóra wčera w Minakałskej cyrkwi koncert wuhotowali. Woni­ přednjesechu nabožne a swětne twórby runje tak kaž ludowe spěwy a popowe title. Kóžde lěto přeproša maturantow chóra­ farar Steffen Hirsch, kiž bě z nimi hižo za čas swojeho skutkowanja w Großschweidnitzu styki nawjazał. Foto: Feliks Haza

wozjewjene w: Kultura
srjeda, 12 julija 2017 14:00

Chcedźa tež starych motiwować

Starši ludźo we Wojerecach měli so bóle na wšědnym žiwjenju wobdźělić a njepřebywać jenož w swojim bydlenju. Tomule­ zaměrej ma słužić wosebity dźeń srjedź septembra.

Wojerecy (AK/SN). Po lěće 2013 přeproša město Wojerecy znowa na dźeń seniorow, kotryž je zwjazany z wosebitymi seniorskimi wikami. Termin 13. septembra organizuje syć towarstwow a zwjazkow zhromadnje z přiradomaj za seniorow a za zbrašenych na žurli Wojerowskeje lutowarnje. „Chcemy k wuměnje nazhonjenjow a k mjezsobnemu zeznaću po­zbudźeć“, podšmórny předsydka přirady seniorow Gabriele Mark wčera na nowinarskej rozmołwje.

wozjewjene w: Łužica
srjeda, 12 julija 2017 14:00

Policija (12.07.17)

Trik tola njefungował

Kamjenc. Na prěni pohlad wušikny trik bě sej zawčerawšim paduch w Kamjencu wumyslił. We wulkej kupnicy na přemysłowej přestrjeni Při wětrniku měrješe so 31lětny zhromadnje ze swojim synom na polcy z narunankami za kolesa a tykny sej wobswětlenski set do nachribjetnika. Zo njebychu jeho při kasy lepili, přepoda wón nachribjetnik z rubiznu přistajenej při informaciskim stejnišću blisko zachoda kupnicy. Na swojim dalšim puću ke kasy wza sej muž jenož hišće­ blešu wody, kotruž tež zapłaći. Po tym­ zo běštaj wobaj kasu wopušćiłoj, pósła nan swojeho syna k informaciji, zo by tam nachribjetnik wotewzał. Kedź­bliwy swědk pak bě wšitko wobkedźbował a přistajenu kupnicy na padustwo skedźbnił. Na to zawołachu policiju, kotraž sej personalije muža zapisa a njeskutk přizjewi.

wozjewjene w: Policija
srjeda, 12 julija 2017 14:00

Zawru tunl

Budyšin. Tunl Budyskeje zapadneje tangenty budźe wot pjatka, 14. julija, wot 18 hodź. hač do póndźele, 17. julija, rano w pjećich dospołnje zawrjeny. W tym času tam jězdnju ponowja. Wokołopuć budźe wupisany.

Radźićeljo so zetkaja

Róžant. Twarske nadawki za energetiske saněrowanje Róžeńčanskeho gmejnskeho domu budu jedna tema přichodneho posedźenja gmejnskeje rady Ralbicy-Róžant, kotrež wotměje so jutře, štwórtk, we 18.30 hodź. w Róžeńće. Dale přepo­dadźa nadawk za wutwar třećeho a štwórteho twarskeho wotrězka Łazkowskeje dróhi Při Klóšterskej wodźe. Nimo­ toho wobzamknu płaćiznu, za kotruž chce gmejna nowe twarske ležownosće w Sernjanach předać.

Hat chcedźa porjeńšić

Kulow. Zo by Kulowski měšćanski hat dale atraktiwny był, chce měšćanske zarjadnistwo teren wokoło njeho porjeńšić. Tak chcedźa pućiki wokoło hata ponowić, nowe móžnosće k posydnjenju nastajić a plateau saněrować. Přichodnu zymu chcedźa wodu wotpušćić, zo móhli brjóh hata skrućić. W běhu lěta wotměwaja so wokoło hata wjacore młodźinske a dalše zarjadowanja.

wozjewjene w: Z městow a wsow

Serbska debata

nowostki LND