Z wudaća: štwórtk, 13 julija 2017

Sćazanja akreditowanja žurnalistow w Hamburgu wostanje wažna tema

Berlin (dpa/SN). Justicny minister Heiko Maas (SPD) dale na tym wobstawa, zo so afera wo sćazanju hižo přizwolenych akreditowanjow za žurnalistow na wjeršku G 20 w Hamburgu wobšěrnje wuswětli. „Swoboda nowinarstwa je wulki pokład. Tohodla dyrbjeli wumjetowanja dokładnje wujasnić.“

Cyłkownje 32 žurnalistam, kotřiž běchu za rozprawnistwo w Hamburgu přizjewjeni a akreditowani, běchu dźěłowu dowolnosć zaso sćazali. Dokelž mějachu někotři z nich do toho swojeho rozprawnistwa dla wušparanja z turkowskim knježerstwom, medije a opozicija spekulowachu, zo móhli turkowske zajimy za tym­ tčeć. Rěčnik zwjazkoweje kanc­lerki Angele Merkel (CDU) Steffen Seibert je to wotpokazał.

Domowina w Delnjej Łužicy čuje so posylnjena. Wona ma zaso zastupjerja ze swojich rjadow we wjednistwje třěšneho zwjazka. To pak njeje wšitko. Za městopředsydu wuzwoleny Wylem Janhoefer, kiž je zdobom župan župy Delnja Łužica, je ze swojimi 25 lětami hišće dosć młody. Runje tole Delnich Serbow tak euforizuje, kaž sym to wčera za Serbskim blidom w Choćebuzu sam pytnył. Młodostni so za skutkowanje w Domowinje zajimuja a so gratu přimaja, swoje mysle a namjety přinošuja a wo nich diskutuja. To je čerstwy wětřik, na kotryž su mnozy čakali. Tón wšak njewuchadźa jeno z Wylema Janhoefera. Tež dalši młodźi ludźo so tam sylnje­ angažuja, kaž na přikład zastupowacy jednaćel Domowiny Marcus Kóńcaŕ abo čłonka zwjazkoweho předsydstwa Jenifer­ Dünnbierowa. Dobry zakład to do přichoda­ a tež generaciskeje změny. Wužiwajmy­ šansu! Janek Wowčer

Praha (ČŽ/K/SN). Stajnje bu to twjerdźene, nětko je wědomostnje dopokazane – jenaka wonkownosć, njejenaka zestawa komponentow. Ratarske ministerstwo Čěskeje bě sej w kupnicach w kraju, Słowakskej, Madźarskej, Němskej a Awstriskej 21 wudźěłkow samsneje marki ze samsneje twornje wobstarało ze zaměrom, dać je w laborje přepytować. Nadawk za poł miliona krónow přewza Praska­ Chemisko-techniska wysoka šula. Wuslědki je minister za ratarstwo Marian Jurečka nětkole zjawnosći předstajił. Z přepytowanych 21 produktow su jeno tři nastupajo wobsah a wahu byli identiske, 15 rozdźělneje kwantity přidawkow a zdźěla tež wahi, a tři snadnje rozdźělne. Na přikład ma płokanski srědk persil w Čěskej, Słowakskej a Madźarskej 9,5 gramow aktiwneje maćizny, w Němskej a Awstriskej pak 11,3 gramy. W tyzce rybjacych štabikow firmy Iglo je na zapadźe 63,8 procentow mjasa, w Čěskej jenož 50,2 procentaj. Minister Jurečka ma tajku praksu za diskriminowacu. Naležnosć chce na europskej runinje přednjesć.

Benedikt Dyrlich z Budyšina poprawja rozprawu „Pytaja hižo nowe formy“, wozjewjenu 10. julija w SN:

Serbske Nowiny pisachu, zo sym z Mětom Benadu „na januarskej hłownej zhromadźiznje“ nadawk přewzał, swjedźeń poezije přihotować. To njetrjechi, mandat za nadawk mam wot „hłowneje“ ZSW z nowembra 2016. Z nim bě kaž w zašłosći zwjazane, wutworić přihotowanski wuběrk. Tón je wot januara do junija z partnerami a załožbu wothłosowany koncept zdźěłał, čestnohamtsce.