Basnika Jurja Chěžku hódnje wopominali

póndźela, 24. julija 2017
artikl hódnoćić
(0 )
Zastupjerjo Domowiny, dalšich serbskich towarstwow a gmejny Chrósćicy, mjez nimi županka Zala Cyžowa a Marko Kliman, połožichu při wopomjatnej tafli kwětki za Jurja Chěžku.  Foto: SN/Maćij Bulank Zastupjerjo Domowiny, dalšich serbskich towarstwow a gmejny Chrósćicy, mjez nimi županka Zala Cyžowa a Marko Kliman, połožichu při wopomjatnej tafli kwětki za Jurja Chěžku. Foto: SN/Maćij Bulank

Hórki (SN/JaW). Z krótkej, ale přiwšěm dostojnej swjatočnosću je cyłkownje 30 Serbow sobotu serbskeho basnika Jurja Chěžku składnostnje jeho stotych narodnin při ródnym domje w Hórkach wopominało. Nimo wjacorych sobudźěłaćerjow redakcije Serbskich Nowin – wona dźě bě hišće pjatk na počesćenje prosyła – běchu tež přiwuzni Jurja Chěžki, zastupnicy­ Domowiny, Chróšćanskeje gmejny, Kamjenskeje župy „Michał Hórnik“, Hórčanskeho wjesneho towarstwa Při skale, Zwjazka serbskich wuměłcow a Maćicy Serbskeje přitomni.

Byrnjež so chětro dešćowało, zjima šef­redaktor SN Janek Wowčer hišće raz, čehodla bě so horstka Serbow zešła, a předčita přinošk Manfreda Laduša wo žiwjenju a skutkowanju basnika Chěžki, kotryž běchu SN pjatk wozjewili. Róža Domašcyna čitaše wjacore basnje Chěžki, k zakónčenju njesmědźeše jeho „Zelene zet“ pobrachować. „Je to moja najlubša baseń Chěžki. Wšako zwuraznja wona rjanosć a pisanosć přirody kaž tež nadźiju“, Budyska basnica přeradźi.

wozjewjene w: Kultura
Prošu přizjewće so, chceće-li komentar podać

Serbska debata

nowostki LND