Dobre 4. městno sej wuwojowali

póndźela, 20. februara 2017
artikl hódnoćić
(0 )

Z kadrom dźesać muži bě so druhe koparske mustwo ST Marijineje hwězdy na halowy turněr Wojerowskeho FC podało. W hrajnym modusu kóždy přećiwo kóždemu nastupichu Pančičenjo jako jeničcy z wokrjesneje klasy přećiwo šěsć cyłkam z wokrjesneje ligi.

Prěnja hra přećiwo ST Lubušej skónči so z bjezwrotowym remisom. Tři dalše dypki k prěnjemu ličakej přidružichu so po 2:0 dobyću přećiwo Hrajnemu zjednoćenstwu Hórnikečanski jězor. Wrota třělištaj Christoph Cyž a Jakob Pakoßnick. Třeće zetkanje dnja přećiwo zarjadowarjej klóšterscy koparjo 1:2 přěhrachu. Jeničke wrota w napjatej partiji třěli Cyž. Dawid Šołta rozsudźi štwórtu hru z jeničkimi wrotami za Pančičanow, jako přewinychu Wocl Rěčicy 1:0. Tež duel přećiwo LSV Horam ll dobychu 1:0. Třělc wrotow bě Šćěpan Hübner. W poslednjej partiji wječora dźělachu sej koparjo ST Marijineje hwězdy dypkaj po wobhladanjahódnej hrě z ST Ćiskom II. Při 2:2 trjechištaj Dawid Šołta a Jakub Zelnak. Tak wuwojowachu sej z wosom dypkami a 6:5 wrotami komfortabelne 4. městno.

wozjewjene w: Sport
Prošu přizjewće so, chceće-li komentar podać

Serbska debata

nowostki LND