Strategiski plan za dalše wuwiće jězoriny wobjednawali
Zaměrowemu zwjazkej Łužiska jězorina Sakska nětko strategiski koncept předleži. Wčera su zastupjerjo zwjazka jón na konferency we Wojerecach hišće raz wobjednawali.
Wojerecy (AK/SN). Ze strategiskim regionalnym wuwićowym konceptom zaměrowemu zwjazkej Łužiska jězorina Sakska nětko jasne zaměry hač do lěta 2033 předleža. Tole krajny rada Budyskeho wokrjesa a předsyda zwjazka Udo Wićaz (CDU) wčera we Wojerecach wuzběhny. Tam wotměwaše zwjazk zakónčacu konferencu k regionalnemu wuwiću Łužiskeje jězoriny, hdźež zastupjerjo kraje přesahowacu strategiju wobjednawachu.
24 000 rostlinow minikórkow a 6 000 rostlinow zelenych kórkow su w ...
Za sezonu dwě nowej čarje přihotowali
Zły Komorow (AK/SN). Z nowymaj kolesowarskimaj čaromaj startuje dowolowy region Łužiska jězorina do lětušeje sezony kolesowanja. Tole zdźěla sobudźěłaćerka za zjawnostne dźěło a marketing w turistiskim zwjazku Łužiska jězorina Celine Klose. „W aprylu su dźěłaćerjo tafle za 43 kilometrow kaž tež 81 kilometrow dołhu čaru připrawili“, wona wuswětli. Na nowymaj čaromaj předstaja akterojo předewšěm regionalne wudźěłki a architektoniske zajimawostki časowych dobow. Wobě čarje hižo etablěrowanu 190 kilometrowsku čaru podłu jězoriny wudospołnjatej.
Kupc je w Lubijskej manufakturje kral
W tworni zhotowjeja hižo 165 lět klawěry, kotrež do cyłeho swěta dodawaja
Před předewzaćom August-Förster-Pianoforte zawodom w Lubiju čakachu před nimale tydźenjomaj rynki ludźi. Firma zarjadowaše tam dźeń wotewrjenych duri, dokelž zhladuje na 165. jubilej swojeho załoženja. Runje za čas planowaneho zarjadowanja wotmě so we wjele krajach po cyłej Europje dźeń wuměłskeho rjemjesła. Přičina to, raz za kulisami wuspěšneje fabriki zhladować. Štóž chcyše so na wodźenju po zawodźe wobdźělić, dyrbješe dosć wutrajnosće měć a trochu wočaknyć. Čakanje so wudani a tak zajimcy zajimawy dohlad na cyłkowny produkciski proces manufaktury dóstachu. Tak wobkedźbowachu, kak přistajeni dokładnje w ručnym dźěle klawěry zhotowjeja. Wob lěto twarja w zawodźe 100 do 120 klawěrow a 40 do 50 křidłow. Hudźbne nastroje do cyłeho swěta dodawaja. „Pola nas je kupc kral“, zwurazni šef marketinga Gabriel Wandt. To woznamjenja, zo wosebite přeća, kaž na přikład barbu abo družinu drjewa po předstawje kupcow spjelnjeja.
W haće bjez rybarskeho wupokaza wudźić
Wudźerjo z wokoliny, cyłeje Sakskeje a Braniborskeje wjesela so nad nowym poskitkom hatoweho předewzaća Kittner. Zawod je najwjetši hat za wudźenje cyłeho swobodneho stata wotewrěł.
Hóznica (jrl/SN). W hatowym předewzaću Kittner maja wudźerjo nětko składnosć sej swoje ryby sami popadnyć. Před někotrymi dnjemi su tam nowy hat za wudźenje wotewrěli. A tón je najwjetši hat za wudźenje cyłeje Sakskeje. W 37 hektarach wopřijacej wodźiznje plahuje Armin Kittner najwšelakoriše družiny rybow. Nimo karpow su to liny, pstruhi, šćuki, sandaki abo wuhorje. Karl-Heinz-Kalich z Budyšina je jedyn z entuziastow, kiž měješe tele dny zbožo při wudźenju. Hnydom dwaj jasotraj (Stör) je z wody wućahnył. To wězo druhich wudźerjow zmuži swoju wudu w haće wuspytać. Kóždy z nich wužiwa hinašu techniku a ma to za swoje potajnstwo.
Jónkrótny campus nastawa
Srědki za dobrowólne projekty
Drježdźany (SN). Z nimale 26 milionami eurow podpěruje Sakska dobrowólne předewzaća za škit družin, biotopow a klimy na ratarskich přestrjenjach. Kaž statne ministerstwo za energiju, škit klimy, wobswět a ratarstwo wčera zdźěli, su wupłaćenja za 2 393 stajerjow wotpowědneje próstwy přizwolili. To su předewšěm ratarske zawody, ale tež zwjazki, kotrež wobswět a krajinu hladaja, a jednotliwcy. Pjenjezy chcedźa w běhu tydźenja přepokazać. Zakład je spěchowanska směrnica lěta 2023 nastupajo ratarsko-wobswětowe a klimowe naprawy. Tak spěchuja předewzaća na wjace hač 36 000 hektarach role z 10,6 milionami eurow kaž tež na 34 000 hektarach trawnišćow z 15,6 milionami eurow.
Přijimarjo agrarnowobswětoweje premije chcedźa na přikład z někotrymi naprawami za rolu eroziji pódy a tajkej wody dla zadźěwać a wobhospodarjenje pódy polěpšować. Předewzaća na trawnišćach měrja so na přesahowacy cil škita družin a biotopow. Biotopy zaměrnje hladać abo howjada a konje přirodoškitej wotpowědowace pasć stej z wida ministerstwa přikładaj tajkich předewzaćow.
Rekord přenocowanjow w jězorinje
Turistiski zwjazk Łužiska jězorina je za loni wusahowacu ličbu přenocowanjow zwěsćił a tak niwow do korony jasnje přetrjechił. Na zakładźe podaćow statistiskeju krajneju zarjadow Braniborskeje a Sakskeje je wuslědk tak dobry kaž ženje do toho.
Zły Komorow (SN/at). Z 874 117 přenocowanjemi bě młoda dowolowa kónčina loni tak powabna kaž hišće ženje w swojich stawiznach. Ličba zwuraznja wužiwanje přemysłowych hospodow a je wo tři procenty wyša hač w dotal najwuspěšnišim lěće 2022. 4,7 procentow wučinja rozrost porno lětu 2019 do pandemije.
Blokaj Janšojskeje milinarnje na přeco wotpinjenej
Janšojce (SN/at). Energijowe předewzaće LEAG je blokaj E a F Janšojskeje milinarnje předwčerawšim, 31. měrca, doskónčnje ze zastaranskeje syće wotpinyło. Z tym slěduja žadanje zakonjedawarja, kaž LEAG w nowinskej zdźělence piše. Nimo łužiskeju blokow je runje tak pjeć blokow předewzaća RWE w porynskim rewěrje milinu produkować přestało.
Napjate połoženje na energijowych wikach běše w oktobrje 2020 tomu polěkowało, zo buštej blokaj z tak mjenowaneje wěstotneje rezerwy nachwilnje hač do lětušeho 31. měrca znowa syći připinjenej. Za to bě wobšěrne wuporjedźenje wobeju blokow trěbne, sobudźěłaćerki a sobudźěłaćerjo so na swoje bywše dźěłowe městno wróćichu.
