Klětno (UM/SN). Delnjošlesku magistralu – hłowny železniski zwisk 35 kilo­metrow dołheho wotrězka mjez Łazom a Niskej – dale wutwarjeja. Wot měrca su na połojcy čary stare kolije demontowali a něhdźe 110 000 tonow šotera do Nišćanskeje připrawy za znowawužiwanje dowjezli. A to sta so jenož po kolijach, na čož je Němska železnica wosebje horda. „Jedyn ćah zamóže něhdźe 1 000 tonow šotera transportować, štož wučinja 65 jězbow z nakładnym awtom. Tak móžachmy 8 000 jězbow zalutować“, wuswětla projektny nawoda Ulrich Mölke. Mašina, kotraž šoter z łožišća rumuje, pohibuje so tuchwilu wot Łaza do směra na Nisku. Po wotstronjenju šotera kolije hnydom demontuja. Hač do junija chcedźa z tym hotowi być. Tež tři mosty we Łazu,­ Delnim Wujězdźe a Mikowje (Mücka) budu wotstronjene. Bjezpo­srědnje po tym chce Němska železnica zhromadnje z Budyskim předewzaćom Hentschke­ projekt dale zwoprawdźeć a nowy móst twarić. Předwidźane je, zo započnu klětu nowe kolije kłasć. „Najpozdźišo w lěće 2018 chcemy čaru elektrifikować“, Ulrich Mölke praji.