Prěni Borboriny swjedźeń z nowym mějićelom wotměli
Choćebuz (SN/BŠe). „Energijowa změna njerěka změna miliny.“ Tole podšmórny nawoda předsydstwa firmy Łužiske hórnistwo a łužiske milinarnje AG (LEAG) dr. Helmar Rendez na wčerawšim Borborinym swjedźenju w Choćebuskej měšćanskej hali. Kónclětne zarjadowanje zmóžni bilancu. Rendez skedźbni na njewobličomnu energijowu politiku zwjazkoweho knježerstwa, kotraž brunicowy rewěr njesměrnje poćežuje. Dale hódnoćeše wón změnu mějićela, wot šwedskeho koncerna Vattenfall na čěske předewzaće EPH, kotraž je so najebać špatne wobłukowe wuměnjenja poradźiła. „Čuju wolóženje a rozmach.“ Něhdźe 1300 přitomnym rozłoži Rendez ličby minjeneho wobchodneho lěta, w kotrymž běchu 62 milionow tonow brunicy wudobywali a milinarnje 55 terawattowych hodźin miliny naprodukowali. „Kóžda dźesata kilowattowa hodźina miliny w cyłej Němskej pochadźa z Łužicy.“