23 družin chlěba a jědnaće družin całtow je Michael Isensee (nalěwo) minjeny pjatk w Budyšinje pruwował. Zapodało bě je jědnaće pjekarnjow, mjez druhim z Rakec, ­Ralbic a Pančic-Kukowa. Pjekar Marcus Thonig bě pruwowarjej k pomocy. Při tym ­njeńdźeše jenož wo to, kak chlěb a całty słodźa, ale tež, kak wone wupadaja. Kaž wyši mišter zjednoćenstwa pjekarjow Lutz Neumann zwěsći, je mnohotnosć k pruwowanju zapodatych chlěbow a całtow dźeń a wjetša. Chlěby maja wot předchadźaceho dnja być, całty maja samsny dźeń pječene być. Přewjedli su pruwowanje w powo­łanskej akademiji, publikum njesmědźeše bohužel pódla być. Pruwowane pječwa ­dóstachu na to wšelake towarstwa, mjez druhim Mostowe. Foto: Carmen Schumann

Rań (AK/SN). Pućowarjo móža nětko koło­wokoło Rańskeho jězora pućować. Tež kolesowarjo njetrjebaja hižo ze šćežki wotbočić. Wo to starał je so zaměrowy zwjazk Łužiska jězorina Braniborska. Ko­le­sowarska šćežka wokoło jězora je nětko tež we wobłuku Rěpišćoweje (Reppister) wyšiny kompletna. Asfaltowana šćežka je 2,8 kilo­metrow dołha a tři metry šě­roka. „W dobrym stawje su elementy při wuhladnišću. Wudospołnili su je ze zwobraznjenjom płonin wotbagrowanych wsow. Tute elementy słuža dopomnjeću na hórnistwo w regionje“, informuje sobudźěłaćerka zwjazka Julia Kussatz. Wot měrca do junija 2021 běše zaměrowy zwjazk naprawu zwoprawdźił. Twarske kóšty za projekt wučinja 550 000 eurow brutto. Zapłaćił je jězorinowy zwjazk naprawu ze swójskich a ze srědkow po paragrafje 4 zarjadniskeho dorěčenja wo saněro­wanju hórnistwa mjez Zwjazkom a kra­jemi. To su srědki k zwyšenju standarda w regionje, hdźež maja ze sćěhami hórnistwa wobchadźeć.

„Zwjazowanski projekt“ z tamnymi partnerami móhł na wsy lotowa přijimarnja přichoda w Sakskej być. Wo tym znajmjeńša w předewzaću Sachsenlotto rozmysluja. Štóž prawidłownje swoje tipy po zwučenym wašnju wotedawa, tak a tak hižo do žanoho ryzy lotoweho wobchoda njechodźi. Dohromady 17 partnerstwow z najwšelakorišimi přemysłami tuchwilu w Budyskim wokrjesu je, wot pjekarja, kwětkarnje, drogerije abo tankownje a wozydłoweho serwisa hač k wobchodam wšědneje potrjeby, Edeka a Aldi. Šě- rokosć palety zwisuje tež z tym, zo wjazanje mocow přetraće małeho wobchoda na wsy lěpje zmóžnja. K tajkim symbiozam so krajna lotowa towaršnosć wuznawa, zo njeby tipowarjow dla předołheho puća do přichodneje přijimarnje zhubiła. Kak pak bychu partnerojo reagowali, by-li jim Sachsenlotto w serbskim sydlenskim rumje zhromadne dwurěčne popisanje wobchoda namjetowało a sej tak tež raz do serbskeje symbiozy zwažiło? Axel Arlt

Zakonsce wobkrućeny kónc wudobywanja brunicy hač do lěta 2038 wuskutkuje so tež na dojednanje wo dočasnej starosći za brunicowej jamje Wochozy a Rychwałd, kotryž stej Sakski wyši hórniski zarjad Freiberg a předewzaće Łužiska energija a milinarnje (LEAG) w lěće 2018 wotzamknyłoj.

Freiberg/Choćebuz (SN/at). „Z nětčišimi změnami zrěčenja zaručamy znowawužiwanje w sakskimaj jamomaj LEAG“, podšmórnje wyši hórniski stotnik prof. dr. Bernhard Cramer. „Zažniši kónc brunicoweho hórnistwa we Łužicy hodźi so tak bjez přidatnych rizikow za porjadne nastajenje a financowanje dołhodobnje zawěsćić“, prof. Cramer wuswětla. Wo minjenu srjedu wobzamknjenym přiměrjenju dokumenta na rjadowanja zwjazkoweho prawa stej wobě informowałoj.