Delnjoserbske rěčne kursy maja 65lětny jubilej

srjeda, 24. awgusta 2016
artikl hódnoćić
(0 )

Choćebuz (HA/SN). Šula za delnjoserbsku rěč a kulturu w Choćebuzu zhladuje lětsa na wosebity jubilej. Před 65 lětami běchu so tam kursy delnjoserbšćiny za dorosćenych oficialnje zahajili. Za Hornju Łužicu běchu lěta 1949 Serbsku lu­dowu uniwersitu (SLU) z kubłarnjomaj w Chrósće a Radworju załožili, 1951 slědowaše wotnožka SLU w Delnjej Łužicy. Wona bě w bywšim Bórkowskim hosćencu zaměstnjena. Tak zwoprawdźachu dale zaměr Domowiny, w serbskej ludnosći přewjesć wobšěrnje organizowane serbskorěčne dalekubłanje.

Tři lěta pozdźišo, 1954, załožichu Centralnu serbsku rěčnu šulu. Ta bě prěnje měsacy w Běłej Gorje (Byhleguhre) a hač do lěta 1990 w Dešanku pola Choćebuza. Po tym wobsteješe wulki strach, zo so wažne kubłanišćo zhubi. Tohodla bu 1992 Šula za delnjoserbsku rěč a kulturu jako dźěl Choćebuskeje ludoweje uniwersity nowozałožena. Na jubilej 1951–2016 chce šula na wosebitym zarjadowanju 26. septembra w měšćanskim domje spominać.

wozjewjene w: Kubłanje
Prošu přizjewće so, chceće-li komentar podać

Serbska debata

nowostki LND