Pančicy-Kukow (SN/MWj). Přirodowa a wučbna zahroda klóštra Marijineje hwězdy w Pančicach-Kukowje, kotrejež nošer je Miłočanski Křesćansko-socialny kubłanski skutk (CSB), wobsteji lětsa 30 lět. Jubilejnu sezonu zahaja přichodnu njedźelu, 28. apryla, w 14 hodź. Wot lěta 1994 je wjace hač 750 000 ludźi zahrodu wopytało a něhdźe 85 000 šulerjow je ­so na projektnej wučbje wobdźěliło, kaž CSB zdźěli.

Zahajenje sezony wobrubi kulturny program na přirodnym jewišću z kapału „Kummel Brass“ z Wojerec a serbskim wokalnym ansamblom Wólbernosće. Na nalětnich wikach namakaja hobbyjowi zahrodkarjo wšitko trěbne za swójsku zahrodu. Tradicionelnje k zahajenju sezony tež zaso štom lěta w susodnym Lipju ­sadźa. Lětsa je to mučnica (Echte Mehlbeere). Nimo abatisy Gabriele Hesse sadźi ju bywši statny sekretar Hermann Kroll-Schlüter. Před 23 lětami su wje­rjebinu (Eberesche) jako prěni štom lěta sadźili. Mjeztym móžeš w Lipju aleju ­štomow lěta wobdźiwać.

Jedyn z wjerškow lětušeje 30. sezony je wustajeńca wo nastaću a wuwiću zahrody. Wopytowarjo na nazorne wašnje zhonja, što je so w zašłych 30 lětach w zahrodźe stało.

Ćěkanje pomhało njeje

Njedźichow. Po wšěm zdaću čuwy zhubił je we wčerawšich rańšich hodźinach wodźer Audija A 6 Avant, jako w Njedźichowje policajske awto za sobu wuhlada. Muž stupi na płun a smaleše zdźěla hač do 160 km/h spěšnje po statnymaj dróhomaj S 94 a S 92 kaž tež přez Lěsku (Lieske) a Debricy (Döbra) do směra na Kamjenc. Policisća jědźechu za nim, zhubichu pak Audi z wočow. Dokelž běchu zastojnicy čisło awta spóznali, wopytachu woni 27lětneho doma. Při tym so wukopa, zo měješe młody muž 0,4 promilow alkohola w kreji. Najskerje bě to přičina nócneho ćěkanja. Wón změje so nětko podhlada zakazaneho awtoweho wubědźowanja dla zamołwić.

Slepo (CK/SN). Na terenje noweho Slepjanskeho zwjazowanišća zjawneho bliskowobchada, kaž wone oficialnje rěka, tuchwilu asfaltuja. Po zymje su na ležownosći při Nowoměšćanskej dróze blisko dwórnišća spěšnje dale dźěłali. Jězdnje su mjeztym zapołožene, při busowych nastupnišćach su kromy składźene, a tež fundamenty za nowe busowe čakarnje su hotowe. Čakarnje same bórze natwarja. Dale su wjacore štomy a někotre kerki sadźili a tež wjacore ławki su hižo nastajene. Po asfaltowanju su hišće zbywace plestrowanske dźěła na rjedźe a na­dróžne wobswětlenje ma so instalować.

Łužiska hala we Wojerecach swjeći kulojte narodniny

Wojerecy (SiR/SN). Hdyž je twarjenje 40 lět stare, móžeš wo nim mnohe stawiznički powědać. Tak bě to tež tele dny při zetkanju z někotrymi sobudźěłaćerjemi Wojerowskeje Łužiskeje hale, jako so dopomnjenki na zašłe časy jenož tak wužórlichu. Dirk Rolka někotružkuli anekdotu ze zašłych časow znaje. Dźensniši jednaćel Łužiskeje hale bě so něhdy jako młodostny na rěčenskim kursu wob­dźělił. Dorostowi moderatorojo dóstachu dohlad do wšelakich wobłukow domu a smědźachu w kabaretnych předstajenjach sobu skutkować. Tehdy bě we Łužiskej hali hišće młodźinski klub zaměstnjeny. Na diskotekach smědźeše so jenož 40 procentow zapadneje hudźby hrać, zbytk měješe z wuchoda być.