„Kołsy, kołsy konika“ – takle so je jedyn z dźěćacych spěwčkow započina. Dokelž stej jěchanje a konjacy sport wosebje mjez dźěćimi a młodostnymi tež w dźensnišim času přiběraceje digitalizacije jara woblubowanej, wěnujemy so w našej lětnjej seriji konjacym a jěchanskim dworam.

Daloko znaty a woblubowany je Kulowski Schlegelec jěchanski statok. Zamołwitosć za konje a něhdźe 200 hektarow polow a honow je wot swojeho nana Bena Schlegela 43lětny syn Stefan přewzał. Konjacy hospodar a jěchanski wučer stara so wo tójšto dźěći a młodostnych, kotřiž k njemu prawidłownje na jěchanski dwór přichadźeja, zo bychu tam jěchali. Požadane su tež jězby z kuču a kremserom, někotryžkuli pak chce radšo z konjom do přirody.