W Róžeńčanskej putniskej cyrkwi a na łuce za njej knježeštej wot pjatka hač do wčerawšeho wječora hołk a tołk. Towarstwo­ Ostwind 3 000 ze Struppena pola Pirny bě, kaž hižo loni, předewšěm młodostnych na tak mjenowany Gig-festiwal prosyło.

Róžant (jb/SN). Kaž skrótšenka Gig (God is good) hižo přeradźa, ma festiwal předewšěm nabožny raz a bě cyły čas pokazka na to, zo njeje katolska cyrkej jeno starodawna a konserwatiwna.

Pjatk wječor zahaji so festiwal z Božej mšu. Přizamkny so film wo franciskanskich mnichach, kotřiž běchu tónle festiwal na nohi stajili. Woni běchu cyły kónc tydźenja lochce spóznajomni – swojeho šěreho woblečenja, dołheje brody a stajnje wulkotneje nalady dla. Sobotu poskićachu najwšelakoriše dźěłarnički. Nimo přednoškow mjez druhim wo młodźinskim dźěle w USA, Alojsu Andrickim abo hižo mjenowanych „šěrych“ mnichach so hosćo tež sami pospytachu. Hrajachu dźiwadło, spěwachu gospele a zhotowjachu sej róžowc. Wosebje dźěći natykachu sej najpisańše parličkowe rjećazki.