Policija (17.05.23)

srjeda, 17. meje 2023 spisane wot:

Koleso bě kaž bumerang

Nowe Město. Wosobowe awto typa Opel je wčera w Nowym Měsće nad Sprjewju prědnje lěwe koleso zhubiło. 60lětna wodźerka bě na Wjesnej dróze po puću, jako so w prawej křiwicy nadobo koleso pušći a so na napřećiwnu jězdnju kuleše. Tam prasny koleso do Audija. Kaž bumerang wone na to na dróze tam a sem skakaše a do dalšeho Audija kaž tež do VWja prasny. Skónčnje wosta koleso 50 metrow pódla jězdnje ležo. Zranił so na zbožo nichtó njeje, wobdźělene awta pak njemóžachu hižo dale jěć. Dohromady nasta nimale 30 000 eurow škody.

Policija (16.05.23)

wutora, 16. meje 2023 spisane wot:

Pod wliwom drogow jěł

Haj. Je lědma dnja, zo policajscy zastoj­nicy někoho njelepja, kiž pod wliwom drogow z awtom jědźe. Tajki pad sta so předwčerawšim w Haju w Radworskej gmejnje. Tam zadźeržachu pólskeho šofera a zwěsćichu, zo bě wón konop brał. Z tym bě jeho jězba skónčena a 23lětny dyrbješe krej wotedać. Nimo toho za­hajichu přećiwo njemu wotpowědne ­jednanje.

Policija (15.05.23)

póndźela, 15. meje 2023 spisane wot:

Motorski znjezbožił

Delnja Hórka. Ćežke wobchadne njezbožo je so sobotu po připołdnju na zwjazkowej dróze B 156 stało. 68lětny wodźer motorskeho typa Harley Davidson jědźeše do směra na Budyšin, jako w prawej křiwicy na lěwy bok jězdnje zajědźe a do napřećo jěduceho wosoboweho awta 63lětneho muža zrazy. Bikera dyrbjachu z ćežkimi zranjenjemi do chorownje dowjezć. Nastatu wěčnu škodu trochuja na něhdźe 16 000 eurow. Wosobowe awto typa Škoda kaž tež motorske dyrbjachu wotwlec.

Policija (12.05.23)

pjatk, 12. meje 2023 spisane wot:

Wjele pjenjez zhubiła

Łužnica. Zaso raz fungował je tak mjenowany šokowy telefonat, při kotrymž su skućićeljo woporej wjele pjenjez wulišćili. 77lětna žona we Łužnicy je minjenu wutoru 24 000 eurow zhubiła. Njeznaći wudawachu so jako policisća a žonje napowědachu, zo bě jeje dźowka wobchadne njezbožo ze smjertnym woporom zawiniła. Zo njetrjebała do jastwa, je kawcija trěbna. Škodowana přepoda pjenjezy njeznatemu blisko swojeho bydlenja.

Policija (11.05.23)

štwórtk, 11. meje 2023 spisane wot:

Do dźěłaćerja zajěł a ćeknył

Kamjenej. Wobchadne njezbožo z twarskim dźěłaćerjom je so předwčerawšim pola Kamjenej blisko Radworja stało. Muž a jeho kolegojo zarjadowachu tam nadróžne twarnišćo. Byrnjež woni napadnu oranžojtu dźěłansku drastu woblečeni byli, njeznate ćmowe wosobowe awto wotboka do jednoho dźěłaćerja zajědźe. Na zbožo so muž při tym njezrani. Njeznaty šofer bjez zastaća dale jědźeše, hačrunjež potrjecheny dźěłaćer hišće prawe durje awta wočinił. Za ćeknjenym policija nětko slědźi.

Policija (10.05.23)

srjeda, 10. meje 2023 spisane wot:

Wjele pjenjez pokradnyli

Kamjenc. Njeznatej wosobje stej předwčerawšim w Kamjencu 82lětnej žonje wulku škodu načinili. Jej chcyštaj pječa drohotne knihi pokazać a zaplećeštaj ju do rozmołwy. W tym času jedyn ze sku­ćićelow w tamnej rumnosći kamory přepyta. Z nich pokradny wón 30 000 eurow pjenjez a debjenki w hódnoće 20 000 ­eurow. Na to so paduchaj spěšnje zminyštaj. Pozdźišo staruška padustwo pytny a informowaše policiju.

Policija (09.05.23)

wutora, 09. meje 2023 spisane wot:

Podhladnych za hranicu lepili

Krušwica. Do metal předźěłaceje firmy chcychu so njeznaći předwčerawšim w Krušwicy zadobyć. Při tym jich sobudźěłaćer myleše a policiju zazwoni. Podhladni z awtom do Pólskeje ćěkachu. Na tamnym boku hranicy so němskim zastojnikam poradźi, skućićelow dosahnyć. Jednaše so wo muži w starobje 26 a 47 lět kaž tež wo 36lětnu žonu. Wšitcy třo běchu pólscy staćenjo. Kaž pólscy policisća při dalšim přepytowanju zwěsćichu, předležeše přećiwo 26lětnemu skućićelej přikaz zajeća. Jeho dowjezechu do jastwa. W Němskej změja so lepjeni pospytneho zadobywanja dla zamołwić.

Policija (08.05.23)

póndźela, 08. meje 2023 spisane wot:

Drohi e-bike pokradnyli

Wojerecy. Zo je stajnje lěpje, koleso k štomej, wobchadnemu znamjenju, płotej abo podobnje přizamknyć, wě nětko wobsedźer e-bikea we Wojerecach. Wón bě 2 100 eurow drohe elektrokoleso před kupnicu ze zamkom zamknył. Jako pak so z wobchoda wróći, dyrbješe zwěsćić, zo běchu njeznaći koleso scomt zamkom sobu wzali.

Policija (05.05.23)

pjatk, 05. meje 2023 spisane wot:

Jako bratr so wudawał

Budyšin. Wodźerja Jeepa bjez jězbneje dowolnosće je policija předwčerawšim na Budyskej Róžowej lepiła. Dokelž běchu wuprajenja 38lětneho dwělomne, sej policisća pad bliže wobhladachu. Kaž so wukopa, bě muž při kontrolach w zašłosći wjacore razy personalije swojeho bratra podał. Tónraz móžeše jeho jedyn ze zastojnikow dokładnje identifikować.

Policija (04.05.23)

štwórtk, 04. meje 2023 spisane wot:

Drogi a zabijak namakali

Budyšin. Zastojnicy Budyskeho jastwa su zawčerawšim pola wopytowarki drogi namakali. Na to informowachu policiju. 35lětna žona měješe 0,5 gramow konopa a jednu tabletu ecstasy při sebi. Pola jeje 20lětneho přewodźerja namakachu zabijak. Na to přepytachu zastojnicy tež zhromadne bydlenju wobeju podhladneju. Hač su tam něšto namakali, znate njeje.

Serbska debata

nowostki LND