Radźićeljo wuradźuja
Worklecy. Přichodne posedźenje Worklečanskeje gmejnskeje rady wotměje so jutře, štwórtk, we 18.30 hodź. we wyšej šuli. Mjez druhim zaběraja so radźićeljo z twarskim planom za Přemysłowy park při jězoru, kotryž ma so na Smječkečanske ležownosće rozšěrić. Nimo toho porěča wo koncepće kolesowanskich a pućowanskich šćežkow Hornjołužiskeje hole a hatow.
Njebjelčicy. Tohorunja jutře, ale w 19 hodź. zetka so Njebjelčanska gmejnska rada w sydarni w gmejnskim zarjadnistwje. Tež na jeje dnjowym porjedźe steji Přemysłowy park při jězoru. Tu pak jedna so wo Serbskopazličanske ležownosće.
Pančicy-Kukow. A skónčnje wuradźuje jutře tež gmejnska rada Pančic-Kukowa, a to w 19 hodź. w Lejnjanskim hosćencu. Mjez druhim póńdźe we wobłuku twarskich naležnosćow wo podlěšenje twarskeje dowolnosće za přetwar bywšeje starownje w Swinjarni na spěchowansku šulu klóštra Marijineje hwězdy. Dowolnosć pochadźa z nowembra 2020.
Wokrjesnu dróhu ponowja
Rozmołwa na hrodźe
Wojerecy. Analyza aktualneho połoženja demokratiji napřećiwnych prudow a jich wuskutkow na towaršnosć w Budyskim wokrjesu je wobsah rozmołwy jutře, srjedu, wot 18 do 20.15 hodź. w Krabatowej pincy na Wojerowskim hrodźe. Christian Schäfer ze syće tvBUNT pokaza wideja a rozłoži pokazki na tute zjawy. Akterojo starosća so wo rosćacy wliw prawicarsko-ekstremistiskich myslow a jednanjow w towaršnosći kaž tež wo stupacej ličbje demonstracijow neonacijow a namocy w regionje. Wobmjezowaneje ličby městnow dla měli so zajimcy pola Ludoweje uniwersity Wojerecy, kotraž rozmołwu zarjaduje, pod 03571 20937200 abo e-mejlnje pod přizjewić.
Nazwučuja słowjanske reje
Bukecy. Rejowanska dźěłarnička z choreografom Georgijom Marinovom wotměje so štwórtk, 18. apryla, we 18.30 hodź. na wosadnej žurli ewangelskeje wosady při cyrkwi w Bukecach. Tam nazwučuja a rejuja so słowjanske ludowe reje. Zastup je darmotny. Zajimcy su wutrobnje witani.
Přednošuje wo dalokim swěće
Pančicy-Kukow. Domowinska skupina Pančicy-Kukow přeprošuje swojich čłonow a wšitkich dalšich zajimcow na přichodne zarjadowanje srjedu, 17. aprila, w 19 hodź. do awle Šule Ćišinskeho. Tam přednošuje Sulšečanski krosnowar Achim Mič wo swojich dožiwjenjach w Indoneziskej. Wšitcy su wutrobnje witani.
Wotnožku banki přetwarja
Kulow. Wot 19. apryla budźe wotnožka Ludoweje banki w Kulowje twarnišćo. Hač do kónca meje chcedźa rumnosće tak přetwarić, zo móža w nich wobydlerjow lěpje poradźować. Z tutej inwesticiju chcedźa městnosć Ludoweje banki w Kulowje do přichoda zaručić. Tež samoposłužowanska technika so za čas twarskich dźěłow wužiwać móc njebudźe. Wobydlerjo móža so w mjenowanym času we wotnožce na Wojerowskej Friedrichowej čo. 2 poradźować dać a tam swoje pjenježne naležnosće wobstarać.
Porěča wo aktualnych temach
Njebjelčicy. Aktualne wuwića a wužadanja na komunalnej runinje steja w srjedźišću zjawneho diskusijneho wječora póndźelu, 15. apryla, w 19.30 hodź. w Njebjelčanskej „Bjesadźe“. Na njón přeprošujetaj kandidatka CDU za wólby Sakskeho krajneho sejma Elaine Jenčec a zapósłanc krajneho sejma Alojs Mikławšk (CDU). Z hosćom budźe generalny sekretar sakskeje CDU Alexander Dierks. Wšitcy třo kaž tež dalši mandatni nošerjo chcedźa so ze zajimowanymi wobydlerjemi wuměnjeć a ideje wuwiwać, kak hodźa so wuhibki za spušćomne a do přichoda sahace wuwiće Sakskeje a wjesnych kónčin stajeć.
Nalětni kolokwij
Stróža. Fachowe zarjadowanje wo kibuće (Kiebitz), ptačku lěta 2024, wotměje so jutře, sobotu, wot 9.30 hač do 16.30 hodź. w Stróžanskim Domje tysac hatow. Dokelž njeje hižo dosć wulkich njewobtwarjenych płoninow, je kibut w Sakskej wot wotemrěća wohroženy. Tohodla su intensiwne prócowanja trěbne dalšemu pohubjeńšenju połoženja zadźěwać. Zarjadowanje měri so na nazhonitych ornitologow runje tak kaž na lajkow a zajimowanu zjawnosć. Wobdźělenje je darmotne.
Sportowy dom sej wobhladać
Rozsudźa wo namjetach
Pančicy-Kukow. W sydarni zarjadniskeho zwjazka Při Klóšterskej wodźe wotměje so jutře, štwórtk, w 17 hodź. zjawne posedźenje gmejnskeho wólbneho wuběrka. Wón rozsudźi wo přizwolenju wólbnych namjetow za komunalne wólby 9. junija. Zajimcy su wutrobnje witani.
Bal narodneje drasty
Ćisk. Serbska rejwanska skupina Ćisk přeprošuje na 9. bal narodneje drasty sobotu, 13. apryla, w 19 hodź. na žurlu Ćišćanskeho hosćenca „Zeleny wěnc“. Witani su wšitcy, kiž maja wjeselo a radosć při rejwanju a dujerskej hudźbje – hač w narodnej drasće abo nic. Wo dobru naladu a hudźbu stara so dujerska kapała z Wjelceja. Zastup płaći 7,50 eurow. Zajimcy njech přizjewja so pod telefonowym čisłom 0172 2017468.
W lěsu so informować
Awtorka čita z knihi
Budyšin. Kniha Sabiny Bauer-Helpert „Johann Zautes Lebensfahrt“ steji w srjedźišću přichodneho zarjadowanja w Budyskej Smolerjec kniharni štwórtk, 11. apryla, w 19 hodź. Kniha je biografiski roman wo wosudźe hornjołužiskeho ewangelskeho Serba w 19. lětstotku. Z dokładnej rešeršu wo wšědnym dnju, kulturje a stawiznach rysuja so tež lokalne a regionalne podawki z časa sakskeho kralestwa.
Předstaja projekt při skale
Njebjelčicy. Přichodne posedźenje Njebjelčanskeje gmejnskeje rady wotměje so štwórtk, 11. apryla, w 19 hodź. w sydarni gmejny. Na dnjowym porjedźe steji mjez druhim nowotwar towarstwoweho domu při Miłočanskej skale. Towarstwo Kamjenjak projekt předstaji. Dale chcedźa komunalne wobswětlenske připrawy do rukow SachsenEnergie přepodać.
Poradźuje darmotnje
Budyšin. Prawiznik a wokrjesny radźićel Lěwicy Hajko Kozel poskići srjedu, 10. apryla, wot 15 do 17 hodź. dalši raz darmotne socialne poradźowanje. Wone hodźi so tohorunja w serbskej, ruskej a ukrainskej rěči přewjesć a wotměje so we wobydlerskim běrowje Lěwicy na Šulerskej w Budyšinje. Zajimcy njech přizjewja so pod telefonowym čisłom 035932 363727.
„Jězba z wobrazami“
Kamjenc. Muzej zapadneje Łuzicy w Kamjencu přeproša wutoru, 9. apryla, na přednošk „Greifvögel Deutschlands – Eine Reise in Bildern“. Přirodoškitar a fotograf Torsten Pröhl chce zajimcam „swět pazorakow z fascinowacymi wobrazami“ zbližić. Połdrahodźinske zarjadowanje wotměje so we wobłuku aktualneje wosebiteje wustajeńcy „Deutschlands wilde Greife“ a započnje so w 19 hodź., zastup płaći 3,50 eurow resp. potuńšeny 2 euraj.
Předstaji wuznamne wosobiny
Budyšin. Wuznamne wosobiny města Budyšina, po kotrychž su w sprjewinym měsće hasy pomjenowane, steja w srjedźišću wosebiteho wodźenja po Muzeju Budyšin njedźelu, 7. apryla, w 15 hodź. Muzeologa Hagen Schulz předstaji tele wosobiny, kotrež su na politiskim, towaršnostnym a kulturnym polu w zjawnosći skutkowali. Wodźenje poda tohorunja dohlad do padow, w kotrychž su hasy města přemjenowali.
Awtorka čita z knihi
Budyšin. Kniha Sabiny Bauer-Helpert „Johann Zautes Lebensfahrt“ steji w srjedźišću přichodneho zarjadowanja w Budyskej Smolerjec kniharni štwórtk, 11. apryla, w 19 hodź. Kniha je biografiski roman wo wosudźe hornjołužiskeho ewangelskeho Serba w 19. lětstotku. Z dokładnej rešeršu wo wšědnym dnju, kulturje a stawiznach rysuja so tež lokalne a regionalne podawki z časa sakskeho kralestwa.
Sportowy dom sej wobhladać
Starožitnosće znowa wotkryć
Budyšin. Twjerde a papjerjane pjenjezy, medalje, wuznamjenjenja, pohladnicy, literatura, listowe znamki a wšo móžne dalše, štož ludźo zběraja, steja w srjedźišću jutrowneje bursy zběrarjow w Budyšinje. Wona wotměje so sobotu, 30. měrca, wot 9 do 14 hodź. w Serbskim domje. Tam móža so zajimcy poradźować dać a smědźa parkowanišćo na dworje Serbskeho domu darmotnje wužiwać.
Józef Brězan najlěpje hrał
Radwor. Škotowarka a 27 škotowarjow je so wutoru na škotowym turněrje serbskich seniorow w Radworskim hosćencu „Meja“ wobdźěliło. Najlěpje hrał je Józef Brězan, kiž doby z 2 658 dypkami před Eberhardom Kroschkom (2 459) a Manfredom Höraufom (2 313). Wšitcy třo steja tohorunja na čole cyłkowneho hódnoćenja, kotrež nawjeduje E. Kroschk před J. Brězanom a M. Höraufom.
Stawizniska přehladka
