Budyšin (SN/MG). Wot 1. měrca ma Budyski wokrjes wosebity Instagram-kanal za čestnohamtske dźěło. Na tutym wozjewja krajnoradny zarjad wotnětka přinoški wo čestnohamtskich we wokrjesu, spěchowanskich móžnosćach a projektach.
„Sym jara dźakowna a zbožowna, zo mamy w našim wokrjesu telko angažowanych ludźi a zo móžemy z tutym kanalom nětko pisanosć našeho čestnohamtskeho dźěła wotbłyšćować“, praji zamołwita za čestnohamtske dźěło we wokrjesu Dunja Reichelt. Wobsahi na kanalu pak nimaja jenož z krajnoradneho zarjada přińć: „Namołwjamy wšitke towarstwa, iniciatiwy a čestnohamtsce skutkowacych ludźi, na našim kanalu syće tworić a swójske dźěło přez přinoški zjawne činić“, Reichelt rozkładuje.
We wobłuku februarskeho posedźenja Choćebuskeje zhromadźizny měšćanskich zapósłancow je społnomócnjena za serbske naležnosće města, Anna Kosacojc-Kozelowa, wo swojim skutkowanju w dobje wot nowembra 2022 hač do lětušeho spočatka januara rozprawjała.
Choćebuz (SN/at). Centralny dypk rozprawy běchu znowa serbske kubłanske naležnosće. Anna Kosacojc-Kozelowa informowaše wo nadźěłanym koncepće, z kotrymž chcedźa w měsće Choćebuzu „za zachowanje serbskeje rěče zaměrnišo hač dotal potenciale wotkrywać“. Pruwowanski nadawk su měšćanscy zapósłancy spočatk lońšeho lěta wuprajili, zdźěli społnomócnjena na naprašowanje. Wuslědk měł „hromadźe ze zastupnistwami serbskeho ludu“ nastać, tam rěkaše.
Wubědźowanje serbskeje rěče
Wodowe Hendrichecy. Nimale 80 wuknjacych ze serbskich wyšich šulow a Serbskeho gymnazija w Budyšinje wobdźěli so na 56. centralnej olympiadźe serbskeje rěče srjedź apryla we Wodowych Hendrichecach. Mjez wobdźělnikami je 69 dźěći z Hornjeje a dźesać z Delnjeje Łužicy. Zaměr olympiady je spěchować hornjo- a delnjoserbsku rěč a jej z pozitiwnymi dožiwjenjemi krućić.
Zasudźeny rewiziju zapodał
Budyšin. Wohenja cyrkwje we Wulkich Rjedorjecach dla minjeny tydźeń zasudźeny wobwinjeny je rewiziju zapodał. Tuta je w postajenym času dóšła, kaž rěčnik Budyskich wonkownych komorow Zhorjelskeho krajneho sudnistwa dźensa zdźěli. Hač Zwjazkowe sudnistwo (BGH) so z padom zaběra, wotwisuje wot dalšeho postupowanja zakitowanja, hdyž předleži pisomne wobkrućenje wusuda.
Skorža přećiwo zarjadej
Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow prócuja. K tomu přinošować chce naša serija z pokiwami z weterinarneje mediciny. (27)
Kaž pola čłowjeka hraja tež pola zwěrjatow wjazby ze železom w ćěle wjacore wažne funkcije. Železo je w ćěle jedyn z tak mjenowanych esencielnych mikroelementow (Spurenelement). Hłowna funkcija aktiwneho železa w kreji je wobstatk jako centralny atom hemoglobina, čerwjena barbizna čerwjenych krejnych bańkow, kotrež cyłe ćěło z kislikom zastaruja.
Dalše nadawki spjelnja železo jako wobstatk w imunitnym systemje, w koži abo tež w čuwowym systemje. Tohodla je wažne, zo dóstawa organizm cycakow wšědnje wotpowědne mnóstwo železa z picu, zo njeby k schorjenjam dóšło.
Budyšin. Swój 75. jubilej chce 1. serbska kulturna brigada 1. junija woswjećić. Wotnětka su kartki za zarjadowanje za wšěch něhdyšich brigadnikow a tych, kiž čuja so z brigadu zwjazani, při kasy SLA kaž tež w online-shopje ansambla na předań. Zajimcow wočakuja zabawny swjedźenski program kaž tež kulinariske chłóšćenki. Nad narodninskimi darikami w formje přinoškow bychu so brigadnicy wjeselili.
Darmotne poradźowanja
Budyšin. Krajny rada frakcije Lěwicy Hajko Kozel poskićuje zaso darmotne socialne poradźowanja w byrgarskim běrowje Lěwicy. 5. měrca je wón wot 15 do 17 hodź. na Šulerskej hasy 10 w Budyšinje. Poradźowanje poskićuje Kozel w kóždej wolenej rěči, na přikład tež w rušćinje a ukrainšćinje. Wón ludźi wosebje k tomu namołwja tež serbsce rěčeć. Zamołwići proša wo telefoniske přizjewjenje pod telefonowym čisłom 035932 363727.
Čerstwe produkty sej nakupić
Chrósćicy (SN/mb). Serbska pčólnica ma nowu předsydku: Na swojej hłownej zhromadźiznje w Krawčikec hosćencu minjeny štwórtk wolachu dotalnu městopředsydku Katrin Matkec z Prawoćic do noweje funkcije. Wona naslěduje Jana Wjeselu, kotryž towarstwo 25 lět nawjedowaše a chcyše runja druhim zamołwitosć do młódšeju rukow dać. Jako w lěće 1999 zastojnstwo nastupi, měješe towarstwo 24 čłonow, nětko je jich 46. Wjesela wostanje z čłonom předsydstwa. Městopředsyda je Frank Wowčer z Radworja, pokładnik Pětr Ćemjer z Worklec, kiž naslěduje wjelelětneho pokładnika Jana Wawrika. Jako zapisowarka skutkuje Silwija Fryčowa z Noweje Wjeski, naslědnica Lucije Lipičoweje. Dalšej čłonaj předsydstwa staj Krystof Rjeda z Pančic-Kukowa a Jakub Sćapan z Chrósćic. Weronika Wjencyna hižo njekandidowaše.
Njebjelčicy (JK/SN). Tež, hdyž wobsahuje naćisk lětušeho hospodarskeho plana Njebjelčanskeje gmejny wurunany wuslědk, hrozy jej njewobeńdźomne wysoke zadołženje a z tym konsolidacija. Komornica Andreja Lukašowa je hromadźe z radźićelemi hižo wutoru lětuši plan nastajiła, kotryž je dźakowano dodatnym dochodam z přemysłoweho dawka dosć wurunany a móže so k diskusiji přepodać a pozdźišo krajnoradnemu zarjadej k přizwolenju předpołožić. Do wčerawšeho wuradźowanja mějachu so radźićeljo najprjedy raz za jednu z dweju wariantow naćiska rozsudźić. Samozrozumliwje hłosowachu za tu, kotraž ma lětsa dobry kónc, dokelž so na pozitiwny start złožuje. Ale hižo klětu a potom w lěće 2026 hrozy gmejnje wulki dołh. Falowace dochody z přemysłoweho dawka a čujomnje wyše wudawki za přinoški do wokrjesa a Zarjadniskeho zwjazka Při Klóšterskej wodźe kaž tež za pěstowarnju a wohnjowu woboru přežadaja móžnosće gmejny.
Hižo 33 lět wobhospodarja Burgfried Tannenhauer „Lěsnu korčmu“ při Slěbornym jězorje. Wón nadźija so na bórzomny kónc saněrowanskich dźěłow na južnym pobrjohu jězora.
Bjedrichecy (AK/SN). Typiske zymske dźěła ma tuchwilu na swojim dnjowym planje. Wodowe kašćiki na nuznikach dyrbja so wuměnić. Tež na třěše je mjeńšich reparaturow trěbnych. „Dźěła je dosć – dyrbju wšak so wo zdźerženje twarjenja starać“, powěda Burgfried Tannenhauer, z ćěłom a dušu korčmar a mějićel „Lěsneje korčmy“ při Slěbornym jězorje. Hromadźe ze swojej žonu Ines je w zańdźenych tydźenjach tež špundowanja po cyłym domje wuměnił a kuchnju ponowił. Wona je kucharka a „dobra duša domu“ a stara so z wulkej lubosću wo kulinariske zastaranje hosći.