47. sezona Serbskopazličanskeho karnewaloweho towarstwa je so sobotu wječor z prěnim kapičkowym wječorom w Njebjelčanskej „Bjesadźe“ zahajiła. Rada jědnatkow, škričkowa garda a princowski por zaćahnychu k staroznatym zynkam na žurlu. Hosćo dožiwichu wotměnjawy program, za kotryž běchu karnewalisća zaso wjele prócy nałožili (hlej 4. stronu). Foto: A. Krječmarjowa

Nětko knježa nory w „Bjesadźe“

póndźela, 20. februara 2017 spisane wot:

Serbskopazličanscy karnewalisća z hosćimi sobotu a wčera zaso hejsowali

Njebjelčicy (bl/SN). Hač Rio, Köln abo Mainz, po wšěm swěće nory hejsuja, zabawjejo so ze spěwom, reju a žortom. Zo by prawy lóštny póstniski wječor dožiwił, pak njetrjebaš sej daloko wulećeć. To nazhonichu lětuši wopytowarjo programa Serbskopazličanskeho karnewaloweho towarstwa.

Nowy serbski pčołar přiwzaty

póndźela, 20. februara 2017 spisane wot:

Chrósćicy (BWa/SN). W Chróšćanskim Dučmanec hosćencu wotmě so minjeny pjatk lětuša hłowna zhromadźizna Serbskeje pčólnicy. Předsyda Jan Wjesela rozprawješe wo dźěławosći towarstwa kaž tež wo stawje pčołarjenja. Minjene lěto wuznamjenješe so z pózdnim, ale mócnym startom do nalěća, kotryž je pčolace ludy sylnje k rojenju pohnuł. Žně mjedu běchu dobre, při čimž rěpik a lipa derje mjedźeštej, robinija skerje snadnje. Miła nazyma wšak tomu polěkowaše, zo je so varroa-roztoč chětro rozmnožił. Tónle škódnik móhł tuž lětsa k wjetšim stratam ludow­ wjesć.

Serbskej pčólnicy přisłuša tuchwilu 42 čłonow z 300 ludami. Čłonojo su 21 do 86 lět stari. Pětr Wencl z Měrkowa bu na pjatkownej zhromadźiznje jako nowy pčołar do towarstwa přiwzaty. Wone planuje lětsa přednošk Bena Deleńka z Drježdźan, wopyt pčolenca jednoho sobustawa pčólnicy a wulět do Delnjeje Łužicy. Za nazymu je předwidźany přednošk wo ameriskim hniłcu (Faulbrut), dźeń a aktualnišej mrětwje tež we Łužicy.

Wo swojich dožiwjenjach a žiwjenskich nazhonjenjach při wandrowanju je Chróšćan Franc Čornak minjeny pjatk na mjeztym dźesatym serbskim wječoru we Łazowskim Domje Zejlerja a Smolerja rozprawjał. Wjace hač 40 připosłucharjow bě přišło. Někotři z nich kupichu sej jeho knihu „Franz im Glück“ a dachu sej ju signować. Foto: Andreas Kirschke

Pod nawodom jejka debić wuknyli

póndźela, 13. februara 2017 spisane wot:

Mjeztym zo tele dny póstniske nory swoje­ kostimy přihotuja, je Domizniske­ a kulturne towarstwo Njebjelčicy­ kónc tydźenja zajimcow na kurs­ debjenja jutrownych jejkow přeprosyło.

Njebjelčicy (aha/SN). Přičina dočasneje zaběry z jutrownym nałožkom je jednora. Njebjelčanka Marja Šefrichowa, kotraž lětsa pjaty raz kružk nawjedowaše, je ze swojimi kmanosćemi posrědkowanja znajomosćow wo debjenju jejkow přewšo požadana. W jeje protyčce so w póstniskim času terminy kopja. Na Kamjenskich rjemjeslniskich wikach, w Budyskim Serbskim muzeju, w Lejnjanskim hosćencu „K lipje“ a na dalšich městnach chce wona swoje kmanosće w debjenju jejkow předstajić.

ZSRP z nowym předsydstwom

póndźela, 13. februara 2017 spisane wot:

Schwalenje lětušeho dźěłoweho plana a wólby noweho předsydstwa Zwjazka serbskich rjemjeslnikow a předewzaćelow (ZSRP) stejachu minjeny pjatk w srjedźišću jeho hłowneje zhromadźizny.

Lejno (SN/BŠe). Hnydom wjacore wuprawy a zarjadowanja su sej łužiscy rjemjeslnicy a předewzaćeljo lětsa zaplanowali. Tak chcedźa na přikład zhromadnje po Delnjej Łužicy kolesować. Ekskursija po Hornjej Łužicy je tohorunja předwidźana. To chcedźa čłonojo Zwjazka serbskich rjemjeslnikow a předewzaćelow pišćeletwarsku twornju Eule wopytać a sej we Wjelećinje wobhladać, kak tam palenc dźěłaja. W septembrje podadźa so na třidnjowsku jězbu do Wittenberga. „Mnozy sobustawojo z Delnjeje Łužicy su ewangelscy. Lětušeje róčnicy reformacije dla smy so rozsudźili tole temati­zować“, zdźěli předsydka ZSRP Monika Cyžowa.

Z wčerawšej Maćičnej akademiju w Budyskim „Wjelbiku“ je tež serbske lěto spominanja na 500. reformaciski jubilej zaběžało. Serbski superintendent Jan Malink rěčeše na temu „Luther a Serbja – legendy a fakty“.

Žane napjatosće, jenož „disonancy“

štwórtk, 09. februara 2017 spisane wot:

SŠT a Domowina so dojednałoj

Budyšin (SN/JaW). Prezidij Domowiny a Serbske šulske towarstwo přihłosujetej naćiskej wo změnje Sakskeho šulskeho zakonja, kotryž běštej CDU a SPD zdźěłałoj. Wo tym a dalšich přede­wzaćach informowaše předsyda Domowiny Dawid Statnik dźensa na nowinarskej konferency w Budyšinje.

Před nimale lětom je wón w Radworju w kruhu swojich pjeć dźěći, přiwuznych a přećelow hišće wjesele stoćiny swjećił. 3. februara je woblubowany lěkar, nadarjeny moler a spisowaćel, sanitarny rada dr. Joachim Nawka, na prawdu Božu wotešoł. 17. februara 1916 bě so wón jako šeste dźěćo sławnej Radworskej wučerskej Nawkec swójbje narodźił. Jeho mać pochadźeše ze znateje Andrickec wučerskeje swójby. Po maturiće na Budyskej Katolskej natwarnej šuli kubłaše so wón na oficěra, štož pak so serbskeho lista staršeho bratra Antona na njeho dla na zbožo nahle skónči. Wot lěta 1940 studowaše we Wienje medicinu a skónči 1950 w Praze studij lěkarstwa. Samsne lěto woženi so z lěkarskej koleginu dr. Marju Brězanec ze Sulšečanskeho młyna. Mandźelskimaj narodźi so pjeć dźěći. Syn Tadej je profesor­ mediciny, dalše dźěći stupachu tohorunja do powołanskich stopow staršeju.­ Dźowka Gabriela je wučerka.

Samonadrěte pjerjo požadane

wutora, 07. februara 2017 spisane wot:
Hdyž kaž nětko prawa zymička knježi, sej čłowjek w nocy tołste poslešćo z husacym pjerjom chwali. Tole wědźa tež na Rownjanskim Njepilic statoku, hdźež su tele dny wjacore razy zhromadnje pjerjo drěli. Dokelž su tajke poslešća a hłowaki jara požadane, maja tam tež stajnje potencielnych woteběrarjow. Pjerjo dodawaja wobydlerjo z Rownoho a wokolnych wsow, wšako na mnohich statokach hišće husy za swójsku potrjebu plahuja. A kaž so to za prawe pjerjodrěće słuša, mějachu sej žony wjele powědać­ a tak někotružkuli wjesnu nowosć zhonichu. Foto: Jost Schmidtchen

nawěšk